Журналісты выявілі імёны 4 тысяч загінулых расійскіх вайскоўцаў. Пра што кажуць гэтыя лічбы?
Як адзначае BBC, даказаная колькасць загінулых расійскіх вайскоўцаў — далёка не поўны спіс страт, а толькі тое, пра што паведамляецца ў адкрытых крыніцах. Гэтая інфармацыя дазваляе прааналізаваць тое, што адбываецца з расійскай арміяй на вайне.
Пахаванне расійскага вайскоўца, які загінуў ва Украіне, у Бураціі
Імкліва расце колькасць забітых добраахвотнікаў. Пры гэтым 20% ад іх колькасці — мужчыны ад 50 гадоў і старэйшыя. Гэта тая катэгорыя, пра гібель прадстаўнікоў якой паведамляюць часцей за астатнія.
Больш за 17% загінулых — гэта афіцэры (у тым ліку адкрыта заяўлена пра гібель 4 генералаў і 21 палкоўніка). Гэта асаблівасць расійскай арміі: большасць функцый па кіраванні падраздзяленнем у баі бяруць на сябе менавіта афіцэры, у той час як у арміях краін НАТА некаторыя падобныя задачы ўскладзеныя на сяржантаў.
За чатыры месяцы вайны Расія страціла як мінімум 42 вайсковых лётчыкаў. Па ацэнцы брытанскай разведкі, гэта звязана з тым, што падрыхтоўка пілотаў у Расіі шмат гадоў ішла па строгім і зацверджаным сцэнарыі з мэтай уразіць высокапастаўленае кіраўніцтва. Гэта перашкаджала маладым пілотам навучыцца хутка прымаць самастойныя рашэнні.
20% загінулых, імёны якіх устаноўленыя, служылі ў паветрана-дэсантных войсках, 19% — у мотастралковых.
Журналісты адзначаюць, што мясцовыя ўлады паведамляюць далёка не пра ўсіх загінулых. На некаторых могілках доля імёнаў, пра якія не паведамлялі публічна, складае ад 30 да 100%.
