Мінабароны Расіі: Галоўная задача расійскіх вайскоўцаў ва Украіне — вызваленне Данбаса
Начальнік галоўнага аператыўнага ўпраўлення Генштаба УС РФ Сяргей Рудской сёння правёў брыфінг у Міністэрстве абароны, дзе зрабіў некалькі заяў. У прыватнасці ён сказаў, што расійская армія «не планавала» штурм акружаных украінскіх гарадоў, аднак дапускае такую магчымасць.
Фота: AP
Па яго словах, расійскія войскі поўнасцю або часткова акружылі цэлы шэраг буйных украінскіх гарадоў — Харкаў, Чарнігаў, Сумы, Марыупаль, прасунуліся з двух напрамкаў на Кіеў. Гэтыя гарады падвяргаюцца абстрэлам і бамбардзіроўцы, але цалкам авалодаць імі расійская армія пакуль не змагла.
Заходнія ваенныя эксперты паказвалі, што для поўнай блакады, не кажучы ўжо пра штурм, такога буйнога горада як Кіеў наяўнай колькасці расійскіх войскаў недастаткова.
«Першапачаткова мы і не планавалі іх штурм, каб не дапусціць разбурэнняў і мінімізаваць страты сярод асабістага складу і мірнага насельніцтва», — сказаў Рудской.
«І хоць такую магчымасць мы не выключаем, аднак па меры выканання асобнымі групоўкамі пастаўленых задач, а яны вырашаюцца паспяхова, нашы сілы і сродкі будуць канцэнтравацца на галоўным — поўным вызваленні Данбаса», — сказаў генерал.
Менавіта Рудской і назваў сёння колькасць стратаў сярод расійскіх вайскоўцаў: 1351 чалавек загінуў і 3825 параненыя.
