Пратасевіч заявіў, што заключыў дасудовую дамову са следствам

Раман Пратасевіч у эфіры ютуб-канала «праваабаронцы» Дзмітрыя Белякова заявіў, што заключыў дасудовую дамову са следствам.

Пратасевіч распавёў, што сёння ўпершыню за доўгі час яго выпусцілі з месца, дзе ён знаходзіўся пад хатнім арыштам. Ён працягвае быць пад крымінальным пераследам.

Калі скончыцца расследаванне крымінальнай справы, ён не ведае. Справу вядзе Следчы камітэт.

***

Блогер Раман Пратасевіч быў затрыманы разам са сваёй дзяўчынай Сафіяй Сапегай 23 мая 2021 года пасля прымусовай пасадкі ў Мінску самалёта Ryanair Афіны — Вільня. Паведамлялася, што ў дачыненні да Пратасевіча, які быў галоўным рэдактарам найбуйнейшага беларускага тэлеграм-канала, заведезена некалькі крымінальных спраў.

Аднак пазней дзяржСМІ запісалі з Раманам некалькі інтэрв'ю, ён паўдзельнічаў у рэзананснай прэс-канферэнцыі 14 чэрвеня, яго перавялі пад хатні арышт, і ён завёў акаўнт уТвітары. Але пасля на доўгі час знік з інфармацыйнай прасторы.

Тым часам справа Сафіі Сапегі перададзеная ў суд, яе вінавацяць па сямі артыкулах.