Лукашэнкаўскі аналітык: Без еўрапейскіх датацый Польшча ператворыцца ў Балгарыю, а Украіна можа разваліцца
Украіна — гэта краіна, якая сёння балансуе на мяжы развалу. Такое меркаванне выказаў праўладны палітычны аналітык Юрый Шаўцоў у эфіры АНТ.
«Чым адрозніваецца Украіна ад Польшчы: Украіна ўжо даўно трымае курс на захад, але яна не атрымала такіх датацый, якія атрымала Польшча. І не атрымае. Калі мы гаворым пра Украіну, мы кажам аб адным полюсе адной усходнееўрапейскай ўстаноўкі: атрымліваць грошы за імітацыю канфрантацыі з Расіяй. Але гаворым аб тым полюсе, які не мае шанцаў на развіццё. Украіна — гэта, на мой погляд, краіна, якая балансуе на мяжы развалу», — заявіў Юрый Шаўцоў.
Польшчы ж, на думку аналітыка, развал не пагражае, незалежна ад таго, ці падтрымае яе фінансава Захад або не. «Стане чымсьці кшталту Балгарыі. А Украіна можа разваліцца», — лічыць ён.
У Балгарыі, на якую спасылаецца праўладны аналітык, сярэдняя зарплата дасягнула 780 еўра (605 еўра пасля выплаты падаткаў).
