Сталі вядомыя імёны новых вядучых Top Gear
Сталі вядомыя імёны новых вядучых папулярнай праграмы Бі-бі-сі Top Gear. Імі стануць брытанскі каментатар «Формулы-1», а таксама заснавальнік і былы ўладальнік гоначнай каманды «Джордан» Эдзі Джордан, нямецкая гоншчыца Сабіна Шміц, журналіст Крыс Харыс і тэлевядучы Роры Рыд.
Праграму яны будуць весці разам з амерыканскім акцёрам, зоркай серыяла «Сябры» Мэтам Лебланам, пра ўдзел якога ў праекце стала вядома некалькі дзён таму, а таксама вядомым брытанскім тэле- і радыёвядучым Крысам Эвансам, які агучыў поўны склад вядучых у чацвер у эфіры радыё Бі-бі-сі.
Новыя вядучыя заменяць Джэрэмі Кларксана, Рычарда Хаманда і Джэймса Мэя. Кларксан быў адхілены ад працы ў сакавіку мінулага года праз скандал вакол бойкі з прадзюсарам праграмы. Хаманд і Мэй абвясцілі пра сыход з шоў разам з Кларксанам; пасля ўсе трое падпісалі кантракт з відэасэрвісам Amazon Prime.
Новыя выпускі праграмы Top Gear выйдуць у эфір у маі. Праграма мае аўдыторыю ў 350 млн тэлегледачоў па ўсім свеце, прыносячы Бі-бі-сі даход у памеры 50 млн фунтаў (73 млн даляраў) у год толькі ад продажаў правоў на паказ перадачы за мяжой.
