Čamu čarhaviki nie chočuć jechać u Sokał?

Nie šukajcie ŭ słovie «dziŭny» niehatyŭnaha kantekstu. Prosta były pasiołak Sokał zusim nie padobny da typovaha minskaha mikrarajona. Jaho nie źbirajucca kropkava ŭščylniać, na tutejšych vulicach dastatkova zielaniny, a ŭ dvarach — volnaj prastory. Žyćcio ŭ mikrarajonie cichaje i pavolnaje, jak haračaja červieńskaja ranica. Jakaja heta stalica? Miłaja hłuchmień!

U traŭni načalnik upraŭleńnia žyllovaj palityki Minharvykankama Alaksandr Aŭramienka zajaviŭ, što niezaniatyja ŭčastki pad žyllovaje budaŭnictva zastalisia tolki ŭ Vialikim Traściancy i ŭ hetym mikrarajonie. Ale mnohija čarhaviki, jakim prapanavali tut budavacca (u pieršuju čarhu šmatdzietnyja siemji), ad mahčymaści admaŭlajucca, addajučy pieravahu tamu, kab dačakacca bolš vyhadnaha varyjantu. Čym ža im nie dahadziŭ Sokał?

Haradski pasiołak byŭ sfarmavany ŭ pačatku 1980-ch. Pieršapačatkova tut budavali žyllo dla rabotnikaŭ aeraporta, jakija i składali bolšaść nasielnictva. Zakrytym avijacyjnym miastečkam Sokał, zrešty, tak i nie staŭ. Paśla dałučeńnia da Kastryčnickaha rajona Minska kolkaść «čužyncaŭ», jakija nie mieli nijakaha dačynieńnia da avijacyi, pačała ŭzrastać. Ciapier u byłym pasiołku žyvie kala 5 tysiač čałaviek, a ŭ pierśpiektyvie kolkaść pavinna pavialičycca ŭ šeść razoŭ.

Z cyvilizacyjaj mikrarajon źviazvaje aŭtobus 112-ha maršrutu. Ad stancyi mietro «Mahiloŭskaja» jechać siudy kala 20 kiłamietraŭ. Adlehłaść zusim nie fatalnaja, Sokał my b nazvali hatovym staličnym «spadarožnikam», jaki adpaviadaje praktyčna ŭsim patrabavanym paramietram. A mienavita — bolš-mienš raźvitaja infrastruktura, niadrennyja transpartnyja kamunikacyi, uparadkavanaść zabudovy. Nie chapaje pracoŭnych miescaŭ, vytvorčaści, ale ŭ płanach uładaŭ kamunalnaja zona fihuruje.

Cikava, čamu tady staŭku zrabili na Smalavičy i Zasłaŭje, kali idealny «spadarožnikavy» varyjant pad samym nosam? Na hetaje pytańnie nie mohuć dać adkaz i sami hienieratary idej ź Minharvykankama.

Terytoryja byłoha pasiołka nievialikaja, centr kampaktny, uskrainy — u zonie piešachodnaj dastupnaści. Jość dźvie hałoŭnyja architekturnyja «daminanty»: carkva i vysačeznaja kamunalnaja «vieža».

Zabudova źmiašanaja. «Panelki» typavyja, katedžy dahledžanyja i, za redkim vyklučeńniem, biez pretenzij na staličny šyk.

Avijacyjnaja simvolika prysutničaje ŭ nazvach vulic i pamiatnych doškach na damach.

Z pryčyny, što Sokał — heta Minsk, ceny na nieruchomaść tut adpaviednyja. Na śpiecyjalizavanych sajtach my znajšli prapanovy ab prodažy katedžaŭ i za 150, i za 300 tysiač dalaraŭ. Apošniaja ŭklučaje ŭčastak 11 sotak, ubudavany haraž, pładanosny sad, chleŭ. Jość varyjanty i daražejšyja — paŭmiljona u.a. za dom.

Kvater na prodaž vystaŭlena niašmat, košty adroźnivajucca. Pakoj u «dvušcy», da prykładu, pradajuć za 16 tysiač dalaraŭ, 2-pakajovuju kvateru (60 mietraŭ u novabudoŭli) sprabujuć zbyć amal za 56 tysiač, trochpakajoŭka ŭ piacipaviarchoŭcy mietražom 70 «kvadrataŭ» acenienaja ŭ 68 tysiač. Chtości skaža — całkam adekvatnyja prapanovy. A chtości pakrucić palcam la skroni.

— Aktyŭnaje budaŭnictva ŭ hetym mikrarajonie budzie praciahvacca. U 2010 hodzie UKB našaha rajona pabudavaŭ, uvioŭ i zasialiŭ 4 žyłyja damy — heta kala 36 tysiač kv.m žylla. Maksimalna da 2030 hoda ŭ mikrarajonie Sokał budzie pražyvać kala 30 tysiač čałaviek, — skazaŭ niadaŭna kiraŭnik administracyi Kastryčnickaha rajona Anatol Žukoŭski.

Rajon novabudoŭlaŭ:

My zajšli ŭ adzin z damoŭ, mahiloŭskija lifty ŭparta admaŭlalisia vieźci nas na apošni pavierch. A paśla «tavar alimpijskaj jakaści» zusim pierastaŭ reahavać na naciskańnie knopak. Moža, razumnaja mašyna pryznała niaprošanych haściej?

Žyllo tut, zrešty, buduć budavać i dalej. A jak ź infrastrukturaj, jakaja i pałochaje čarhavikoŭ? Słova Žukoŭskamu.

— Ciapier u Sokale adstaje budaŭnictva abjektaŭ sacyjalnaj śfiery. Užo pabudavanyja dva handlovyja abjekty, zajmajemsia rekanstrukcyjaj dziciačaj daškolnaj ustanovy. Płanujecca, što ciaham najbližejšych 5 hadoŭ zapracuje jašče adna škoła, dva dziciačyja sadki, bo ŭ hety mikrarajon u asnoŭnym zasialajucca maładyja siemji ź dziećmi, — rapartuje kiraŭnik administracyi.

Ech, čaho tolki nie źbiralisia pabudavać u Sokale! Z vusnaŭ roznych čynoŭnikaŭ lilisia sałodkija abiacańni. Mikrarajon płanavali ŭzbahacić spartyŭna-azdaraŭlenčym kompleksam dla moładzi, sfarmavać tut try hałoŭnyja płoščy, u tym liku handlovuju. Chiba tolki akvapark i ladovy pałac tutejšym žycharam pakul abiacany nie byŭ…

Voś i Mikałaj Ładućka, kažučy pra płany ŭ dačynieńni da Sokała, zajaviŭ, što mikrarajon budzie «intensiŭna» raźvivacca. Siudy zapuściać maršrutki, pabudujuć za 40 młrd palikliniku. Dzie ŭziać hrošy? Minski kiraŭnik, budučy jašče na pasadzie v.a., prapanavaŭ taki varyjant — pradavać učastki pad indyvidualnuju zabudovu.

— My hetyja placoŭki, kab mieć srodki na raźvićcio infrastruktury, vystavim na aŭkcyjon, — maryŭ Ładućka. — Ja dumaju, što ŭ hetym miescy jany buduć zapatrabavanyja. Viadoma, tam buduć nie takija ceny, jak na placoŭki ŭ Minsku, ale ŭsio roŭna heta buduć hrošy, srodki, jakija my ŭkładziem u raźvićcio infrastruktury hetaj terytoryi.

Što vykanana, a što nie? Pahulaŭšy pa Sokale, my pahavaryli ź miascovymi žycharami. Maładyja pradkazalna narakali na adsutnaść zabaŭlalnaj infrastruktury, bo ŭ mikrarajonie niama navat zvyčajnaj kaviarni, a viečaram tolki i zastajecca pić piva na łavačkach ci jechać u Minsk.

Pažyłyja, naadvarot, radavalisia, što staličnaja kultura pakul nie zrabiła na Sokał razburalnaha ŭździejańnia. U byłym pasiołku, jak i 30 hadoŭ tamu, cišynia i spakoj. Tut vierchavienstvujuć nie mašyny, a ludzi, tut možna chadzić u tapkach u kramu i sušyć bializnu na viaroŭkach kala padjezda. Hałoŭnaje — tut pakul jašče možna žyć sabie na radaść, što ŭ Minsku ŭžo prablema. «Nizašto nie pramianiaju kvateru ŭ Sokale na takuju ž u Kamiennaj Horcy, — skazaŭ nam adzin ź piensijanieraŭ, jaki adpačyvaŭ na łavačcy kala padjezda. — Navat kali mnie za heta dapłaciać».

Možacie śmiajacca, ale my praniklisia hetymi słovami. Sokał padaŭsia nam całkam samadastatkovym žyłym rajonam, sa svajoj «dušoj», kali možna tak skazać.

— Adkryli b zabaŭlalny centr, z boŭlinham, naprykład, — viarnuła nas da realij žyćcia maładaja matula, paprasiŭšy pry hetym cyharetku. — Pakul tut čyścieńka i spakojna, ale ad nudy možna zvarjacieć!

Pra pierśpiektyvu takich inicyjatyvaŭ my pacikavilisia ŭ rajonnym adździele architektury. Čakali pačuć čarhovaje «voś-voś», ale hałoŭny architektar rajona Alena Suchadołava była ščyraja.

— Učastak na 20 sotak pad budaŭnictva šmatfunkcyjanalnaha kompleksu vystaŭlali na aŭkcyjon niekalki razoŭ, — paviedamiła jana. — Ale jon nie zapatrabavany inviestarami. Ludzi skardziacca na infrastrukturu? Dy ŭsio ŭ ich narmalna! Narmalnyja kramy, usiaho chapaje. Jość kaviarnia, z nahody taho, što jana nie zadavalniaje žycharoŭ, zvarotaŭ nie było. Moža być, niama dziciačych sadkoŭ i škoł, ale my płanujem raźvivać tam indyvidualnaje žyllovaje budaŭnictva, tamu i sadki, i škoły najbližejšym časam pabudujem.

Alena Suchadołava zajaviła nam, što na raźvićcio Sokała horad robić staŭku.

— Ja zhodnaja, što heta praktyčna hatovy mikrarajon-«spadarožnik». Sokał budzie raźvivacca. Detalovym płanam tam praduhledžanaja vialikaja kamunalnaja zona, kab ludzi mahli pracavać, nie vyjazdžajučy ŭ Minsk. Płanujem raźvivać niaškodnyja vytvorčaści. Plus praciahniecca vulica Vaŭpšasava, da centra možna budzie dajechać vielmi chutka. Zastałosia znajści trošački hrošaj…

Ci varta vieryć spadaryni architektaru? Voś užo pra što nie chočacca havaryć. Jašče ŭ 2008-m sajt Minharvykankama viaščaŭ, što pobač z Sokałam pačynajecca budaŭnictva novaha avijaramontnaha zavoda, jaki inviestar pačaŭ vynosić z terytoryi «Minsk-Sici». Mikrarajonu i tady abiacali burnaje i «intensiŭnaje» raźvićcio. Što z hetaha vyjšła, usim vydatna viadoma. «Pieśnia ab Sokale» — adna ź lubimych minskich pieśniaŭ.

Źjazdžajučy ź mikrarajona, my byli hatovyja zrazumieć, čamu minskija čarhaviki pakul nie rvucca abzavodzicca tut žyllom. Vieryć abiacańniam jany nie chočuć, patryjarchalny spakoj Sokała ich nie zadavalniaje. Dakarać ludziej za heta, mabyć, nie varta.

realt.onliner.by

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH

0

0

0

0

0

0