U Dnieprapiatroŭsku prahrymieli vybuchi
— 27 paranienych, ź ich 9 dziaciej
Hladzi jašče: Najnoŭšaja historyja teraktaŭ va Ukrainie + fota i videa
U centry Dnieprapiatroŭska kala tramvajnaha prypynku «Opierny teatr» adbyŭsia vybuch, piša TSN. Paciarpieli 4 čałavieki, 3 ź ich u ciažkim stanie. Jak paviedamlajecca, vybuchnuŭ śmiećcievy bak. Vybuch adbyŭsia ŭ momant, kali da prypynku padjechaŭ tramvaj ź vialikaj kolkaściu ludziej. Na miescy pracujuć apieratyŭnyja słužby MNS i MUS.
Nieŭzabavie na Pryvakzalnaj płoščy adbyŭsia druhi vybuch. Tudy nakiravalisia milicyja i karety «chutkaj».
Jak paviedamili vidavočcy, vybuch adbyŭsia kala śmietnicy.
Ad vybuchu na vulicy Siarova ŭ bližejšych damach vybiła vokny. Na vulicy ŭtvarylisia zatory. Miascovyja žychary narakajuć na pieraboi ŭ pracy mabilnaj suviazi.
Jak paviedamlaje Interfaks-Ukraina, u Dnieprapiatroŭsku adbyŭsia treci vybuch. Jon prahučaŭ niepadalok ad parku Hłoby. Paciarpieła žančyna, jaje špitalizavali z ranieńniem ruki. Pavodle infarmacyi karespandenta, taksama prahrymieŭ čaćviorty vybuch. Paviedamlajecca, što ad jaho nichto nie paciarpieŭ.
Pavodle papiarednich dadzienych MNS Ukrainy, u vyniku vybuchaŭ u Dnieprapiatroŭsku paciarpieli 27 čałaviek, ź ich 9 dziaciej, piša Korrespondent.net.
Pra heta paviedamili ŭ pres-słužbie Ministerstva nadzvyčajnych situacyj. U viedamstvie ŭdakładnili, što 25 z hetych paciarpiełych byli špitalizavany.
Pry hetym 13 čałaviek byli traŭmavanyja z-za vybuchu kala 11:50 na tramvajnym prypynku na praśpiekcie Karła Marksa. Jašče 11 čałaviek, u tym liku 9 dziaciej, paciarpieli pry druhim vybuchu, jaki adbyŭsia kala 12:20 kala kinateatra, jak adznačaje MNS, «Radzima» (pa dadzienych milicyi — «Panarama»).
Pavodle apošnich dadzienych, u Dnieprapiatroŭskuju abłasnuju balnicu imia Miečnikava paśla 4-ch vybuchaŭ špitalizavanyja 12 čałaviek, paviedamlaje Interfaks-Ukraina.
Jak paviedamiŭ žurnalistam hałoŭny ŭrač balnicy Siarhiej Ryžankoŭ, try čałavieki byli ahledžany i adpuščanyja, adzin čałaviek byŭ pieraviedzieny ŭ špital № 6.
Na dadzieny momant u reanimacyi zastajucca 8 čałaviek, ź ich — adna 16-hadovaja dziaŭčyna, znachodzicca ŭ ciažkim stanie, u jaje irvanyja rany tvaru. 2 čałavieki z 8 praapieravanyja, adnamu amputavali ruku.
Akramia taho, siarod paciarpiełych ad vybuchu ŭ Dnieprapiatroŭsku 10 padletkaŭ, paviedamiła krynica ŭ adnoj z haradskich balnic. Pa słovach surazmoŭcy, heta padletki, navučency mantažnaha technikuma, dzie adbyŭsia treci vybuch.
Miascovaja milicyja prosić haradžanaŭ i haściej horada pa mahčymaści nie karystacca hramadskim transpartam i nie spuskacca ŭ mietro.
U Dnieprapiatroŭsk terminova vypraviŭsia ministr unutranych spraŭ Ukrainy Vital Zacharčanka.
Prakuratura Dnieprapiatroŭskaj vobłaści kvalifikuje vybuchi ŭ Dnieprapiatroŭsku jak terakty, paviedamlaje Interfaks-Ukraina. Prakuror Dnieprapiatroŭskaj vobłaści raspačaŭ kryminalnuju spravu ŭ suviazi z vybuchami ŭ horadzie pa r.2 art. 258 KK Ukrainy (terarystyčny akt). Pra heta paviedamiŭ kiraŭnik pres-słužby Hienprakuratury Juryj Bojčanka.
Prezident Ukrainy Viktar Janukovič vybuchi ŭ Dnieprapiatroŭsku nazyvaŭ čarhovym vyklikam dla ŭsioj krainy.«Ja viedaju toje, što i vy viedajecie. Ja paśpieŭ pierahavaryć z kiraŭnikom SBU, ministram unutranych spraŭ. Pakul inšaj infarmacyi niama. My viedajem, što jość paciarpiełyja, razumiejem, što heta dla nas čarhovy vyklik, dla ŭsioj krainy», — skazaŭ jon žurnalistam. Pa słovach Janukoviča, dla rasśledavańnia vybuchu «buduć zadziejničany lepšyja śledčyja».
Vybuchi ŭ Dnieprapiatroŭsku nie źjaŭlajucca padstavaj dla abjaŭleńnia nadzvyčajnaha stanovišča ŭ krainie, zajaviŭ u adkaz na pytańni žurnalistaŭ ministr justycyi Ukrainy Alaksandr Łaŭrynovič.
«Zhodna z zakonam Ukrainy, siońnia jašče niama takich padstavaŭ, kab kazać ab nadzvyčajnym stanoviščy. Jon moža być tolki na terytoryi dziaržavy. Jon nie moža być u asobnym rehijonie»,— cytuje Łaŭrynoviča ŭkrainskaja reakcyja radyjo «Svaboda».
Pa słovach ministra, vybuchi ŭ Dnieprapiatroŭsku źjaŭlajecca teraktam. «Heta pa-za sumnievami. Kali heta prosta nieŭraŭnavažany čałaviek, abo akt pomsty — heta nie moža być takaja kolkaść vybuchaŭ, tak skaardynavana, u karotki čas u takim horadzie i ŭ jaho centralnaj častcy. Ja dumaju, što heta — surjozna padrychtavanaja apieracyja», — adznačyŭ Alaksandr Łaŭrynovič.
Ukrainski žurnalist: Bolš praŭdapadobnaj vyhladaje biznes-versija dnieprapiatroŭskich vybuchaŭ
Jak raspavioŭ biełaruskaj redakcyi radyjo «Svaboda» dnieprapiatroŭski žurnalist Juryj Rajchiel, vybuchi byli dosyć mocnymi, tamu chłapki było čuvać na vialikaj adlehłaści.
U Dnieprapiatroŭsku vybuchi zdaralisia i raniej, ale jany adbyvalisia daloka ad centru i nasili vidavočny charaktar kamercyjnych razborak. Juryj Rajchiel skieptyčna acaniŭ versii ab niejkich palityčnych matyvach hetych vybuchaŭ. Separatystaŭ u Dnieprapiatroŭsku niama, a tyja, chto vystupaje pad takimi lozunhami ŭ Krymu abo Zakarpaćci, słabyja. Anarchistaŭ na Ŭkrainie taksama niama, jak niama levych radykałaŭ. Tyja, kaho nazyvajuć pravymi radykałami, vyznajuć parlamenckija metady palityčnaj baraćby.
Na dumku žurnalista, bolš praŭdapadobnaj vyhladaje biznes-versija. Dva tydni tamu ŭ Dnieprapiatroŭsku byŭ zabity kala svajho domu, taksama ŭ centry horadu, viadomy biznesmen Hienadź Aksielrod, jaki vałodaŭ niekalkimi bujnymi budaŭničymi firmami. Jany pracavali ŭ centry, i vakoł ich užo daŭno isnavała napružańnie.Hety biznesoviec naležaŭ da hrupy tych, kamu ŭdałosia zavałodać ułasnaściu byłoha premjera Paŭła Łazarenki. I, na dumku Rajchiela, kali hetaja versija dakładnaja, mahčyma, toje, što zdaryłasia, abvostryć supiarečnaści pamiž dnieprapiatroŭskaj elitaj i danieckaj, jakaja sprabuje ŭziać pad kantrol biznes pa ŭsioj krainie.
Heta sustrakaje procidziejańnie, jakoje narastaje ŭsiudy, asabliva va ŭschodniaj častcy Ŭkrainy, dzie «danieckija» asabliva aktyŭnyja. Heta supraćstajańnie moža stać palityčnym, asabliva paśla parlamenckich vybaraŭ u kastryčniku, kali stanie bolš jasnaja rasstanoŭka palityčnych sił u krainie.
Zatrymanyja pieršyja padazravanyja ŭ arhanizacyi vybuchaŭ u centry Dnieprapiatroŭska, paviedamlajuć miascovyja ŚMI sa spasyłkaj na ŭłasnyja krynicy ŭ pravaachoŭnych orhanach.
«Spracavali vielmi prafiesijna, u vybuchoŭcy šmat mietaličnaha rečyva», — paviedamlaje krynica.
Sprava ŭziata na kantrol SBU Dnieprapiatroŭskaj vobłaści.
ES i Rasija prapanavali Ukrainie dapamohu ŭ rasśledavańni teraktu
Jeŭrapiejski Sajuz zakłapočany vybuchami ŭ Dnieprapiatroŭsku, havorycca ŭ zajavie pradstaŭnika JEZ pa zamiežnych spravach i palitycy biaśpieki Ketryn Eštan, paviedamlaje Korrespondent.net
«Vysoki pradstaŭnik była šakavanaja i zakłapočana ŭ suviazi z vybuchami ŭ Dnieprapiatroŭsku, pra jakija stała viadoma siońnia. Jaje pieršyja dumki byli z achviarami hetych napadaŭ, z členami ich siemjaŭ i siabrami», — havorycca ŭ zajavie.
Akramia taho, u zajavie Eštan havorycca, što Jeŭrasajuz taksama prapanavaŭ Ukrainie akazać dapamohu ŭ suviazi z vybuchami ŭ Dnieprapiatroŭsku.
Svaju dapamohu Ukrainie u piatnicu prapanvała i Rasija.
***
Nahadajem, što ŭ listapadzie minułaha hoda ŭ Dnieprapiatroŭsku ŭ vyniku vybuchu zakładzienaj u śmietnicu bomby zahinuŭ 27-hadovy miascovy žychar. Pieršapačatkova pravaachoŭnyja orhany raspačali kryminalnuju spravu pa artykule p. 5 č. 2 art 115 KK Ukrainy (naŭmysnaje zabojstva), adnak paźniej prakuror Dnieprapiatroŭskaj vobłaści vynies pastanovu ab pierakvalifikacyi składu złačynstva pa prykmietach č.3 st.258 KK (terakt).
