Rasijski deziercir Paciejeŭ vyjechaŭ u ZŠA praź Biełaruś
Pra heta havorycca ŭ rašeńni rasijskaha vajennaha suda.
Byłaja raźviedčyca Hanna Čapman, dajučy pakazańni ŭ sudzie, zajaviła, što pałkoŭnik Słužby zamiežnaj raźviedki Alaksandr Paciejeŭ zdaŭ jaje amierykanskim śpiecsłužbam.
Pra heta paviedamili ŭ paniadziełak padčas abviaščeńnia prysudu ŭ Maskoŭskim akruhovym vajennym sudzie, rašeńniem jakoha Paciejeŭ pryznany vinavatym u dziaržaŭnaj zdradzie i deziercirstvie.
U pryvatnaści, vystupajučy ŭ sudzie z pakazańniami, Čapman zajaviła, što pra jaje ahienturnuju dziejnaść viedała vielmi vuzkaje koła ludziej, siarod jakich byŭ i Paciejeŭ, bo jon źjaŭlaŭsia namieśnikam načalnika ŭpraŭleńnia S. Pa jaje słovach, jana ažyćciaŭlała raźviedvalnuju dziejnaść na karyść Rasii i pieršyja miesiacy znachodžańnia ŭ ZŠA byli dla jaje vielmi spakojnymi.
Adnak prykładna z krasavika 2010 hoda pačalisia zboi ŭ suviazi, i tady jana jašče nie viedała, što jany adbyvajucca ŭ vyniku dziejnaści amierykanskich ahientaŭ. Akramia taho, adznačyła ŭ svaich pakazańniach Čapman, ź joj sustreŭsia čałaviek, jaki nazvaŭ parol i paprasiŭ jaje sustrecca. Na sustrečy jon daŭ joj nielehalny pašpart, jaki Čapman nibyta pa zadańni pavinna była pieradać.
Razumiejučy, što heta moža być pravakacyjaj, dziaŭčyna patelefanavała svajmu kurataru, jaki abvierh infarmacyju, što da jaje byŭ niechta nakiravany, cytujucca pakazańni Čapman ŭ prysudzie vajennaha suda. Prykładna ŭ hety ž čas jana zaŭvažyła, što za joj sočać, i paźniej była aryštavanaja.
U sudzie Čapman zajaviła, što padčas dopytaŭ zrazumieła, što sačyli za joj ź pieršych ža dzion jaje znachodžańnia ŭ ZŠA. Aceńvajučy ŭsiu situacyju, jana ličyć mienavita Paciejeva tym, chto zdaŭ jaje śpiecsłužbam ZŠA.
Z rašeńnia vajennaha suda taksama stała viadoma, što pasolstva ZŠA admoviłasia paviedamić pra miescaznachodžańnie pałkoŭnika SZR. Pavodle prysudu, dziejničajučy naŭmysna na škodu biaśpiecy Rasii i ŭ metach uchileńnia ad niasieńnia vajskovaj słužby, Paciejeŭ vydaŭ ZŠA źviestki, jakija źjaŭlajucca dziaržtajamnicaj. Jak havorycca ŭ rašeńni suda, pałkoŭnik vydaŭ niavyśvietlenym pradstaŭnikam CRU ZŠA sakretnyja źviestki pra rasijskich raźviedčykaŭ, u tym liku i pra Čapman, čym prynios Rasii škodu ŭ raźviedvalnaj dziejnaści.
«Paciejeŭ ździejśniŭ deziercirstva, vyjechaŭšy spačatku ŭ Biełaruś pa ahulnahramadzianskim pašparcie, a zatym z dapamohaj amierykanskich śpiecsłužbaŭ pa padroblenych pašpartnych dadzienych — spačatku ŭ Niamieččynu, a zatym u ZŠA, dzie chavajecca da siońnia», — skazana ŭ sudovym rašeńni. U prysudzie taksama adznačana, što rassakrečvańnie rasijskich raźviedčykaŭ stała mahčymym tolki praz zdradu Paciejeva, jaki mieŭ dostup da ŭsich materyjałaŭ adździeła SZR, słužbovaj infarmacyi, viedaŭ usiu ahienturu adździeła.
Praź jaho dziejańni śpiecsłužbam ZŠA staŭ viadomy miechanizm finansavańnia ahientaŭ za miažoj, a taksama kanały suviazi.
Sud ličyć, što vina padsudnaha ŭ poŭnym abjomie paćviardžajecca materyjałami spravy. Na minułym tydni dziaržabvinavačańnie prasiła pryznačyć Paciejevu pakarańnie ŭ vyhladzie 25 hadoŭ pazbaŭleńnia voli.
U ciapierašni čas abviaščeńnie prysudu praciahvajecca. Pakolki Paciejeŭ znachodzicca za miežami Rasii, jaho sprava słuchajecca kalehijaj z troch sudździaŭ zavočna i ŭ zakrytym režymie — materyjały pastupili ŭ sud pad hryfam «Sakretna». Intaresy padsudnaha pradstaŭlaje advakat pa pryznačeńni.
