Pradstaŭniki Biełarusi stali šostymi na konkursie «Novaja chvala»
Biełaruski hurt Litesound zaniaŭ šostaje miesca na Mižnarodnym konkursie maładych vykanaŭcaŭ papularnaj muzyki "Novaja chvala", što prajšoŭ 31 lipienia ŭ Jurmale.
Pieršaje miesca — u vykanaŭcy z Armienii Sony Šachhieldzian, druhoje — u Taćciany Šyrko z Ukrainy, treciaje — u estonca Uku Suviste. Usiaho za pieramohu zmahalisia 17 vykanaŭcaŭ z 12 krain.
Pa vynikach troch konkursnych dzion biełaruskija vykanaŭcy atrymali ad žury 278 bałaŭ: u pieršy dzień — 92, druhi — 96, treci — 90. Najvyšejšuju sumu bałaŭ žury pastaviła za kampazicyju "Mama" (aŭtar — pradziusier Litesound, kampazitar Valeryj Hałaŭko), najmienšuju — za ŭłasnuju rokavuju kampazicyju Rock tonight.
Pradziusier Valeryj Hałaŭko zadavoleny dasiahnutym vynikam. "Šostaje miesca dla nas — heta pieršaje miesca, — zajaviŭ jon u kamientary BiełaPAN. — My vielmi zadavolenyja pracaj, jakuju zrabili. My realisty, i na miesca ŭ pieršaj piaciorcy nie raźličvali. Jašče ŭ Minsku ja staviŭ zadaču nabrać 270 bałaŭ, ale hetaja norma akazałasia pieravykananaja".
Hałaŭko adznačyŭ vysoki ŭzrovień konkursu. "Usie kažuć, što takoha mocnaha składu, jak sioleta, jašče nie było. Aprača taho, u kankursantaŭ ź inšych krain układvalisia vialikija finansavyja srodki, akazvałasia vialikaja administracyjnaja padtrymka. My ž, pa sutnaści, pryjechali sami pa sabie. Tak što, šostaje miesca Litesound na "Novaj chvali" možna pryraŭnavać da šostaha miesca Kałduna na "Jeŭrabačańni". Pry hetym treba ŭličyć, što "Novaja chvala" — heta konkurs nie pieśni, a vakalnaha majsterstva", — padkreśliŭ pradziusier.
Pavodle jaho słoŭ, była peŭnaja ryzyka ŭ vykanańni rokavaj kampazicyi na treci dzień konkursu — heta vychodziła za miežy fiestyvalnaha farmatu.
"Ale my śviadoma ryzykavali. Pa-inšamu jany nie zmahli b, bo ŭ ich jość 40-tysiačnaja armija fanaŭ, jakija čakali ad svajho hurtu mienavita takuju kampazicyju. Možna skazać, što heta była danina pavahi Litesound svaim pakłońnikam", — patłumačyŭ Hałaŭko.
Jon adznačyŭ, što vyšejšyja bały (11) u apošni konkursny dzień biełaruskija ŭdzielniki atrymali ad takich metraŭ, jak Juryj Antonaŭ i Ihar Kruty.
Na dumku pradziusiera, značeńnie majuć tolki pieršyja try miescy, tamu što jany praduhledžvajuć finansavaje zaachvočvańnie, važnaje dla maładych vykanaŭcaŭ (pryzavy fond "Novaj chvali" składaje 100 tysiač jeŭra: 1 miesca — 50 tysiač, 2-je — 30 tysiač, 3-je — 20 tysiač). Što ž tyčycca dalejšaha raźmierkavańnia miescaŭ, to važnyja nie jany, a zapatrabavanaść, upeŭnieny pradziusier.
Jon padkreśliŭ, što hałoŭnaj metaj Litesound u Jurmale było zajavić pra siabie. "I heta nam udałosia. Tut sabralisia šmat surjoznych pradziusieraŭ. Litesound atrymaŭ vialikuju kolkaść prapanoŭ, zdolnych paŭpłyvać na ich dalejšuju muzyčnuju karjeru. Pierśpiektyŭnyja prapanovy atrymaŭ i ja, jak kampazitar. Možna śmieła skazać, što my zrabili krok na postsavieckuju prastoru", — skazaŭ Hałaŭko.
Siońnia ŭ kancertnaj zale "Dzintary" adbudziecca cyrymonija ŭznaharodžańnia pieramožcaŭ i zaklučny kancert fiestyvalu.
Pavodle słoŭ Hałaŭko, Litesound płanuje viarnucca ŭ Minsk 5 žniŭnia — u hurtu jość asabistyja płany ŭ Jurmale. Pradziusier spadziajecca być u Minsku ŭžo zaŭtra, 2 žniŭnia.
Nahadajem, dla vystupleńnia na "Novaj chvali" byŭ nabrany novy skład hurtu Litesound, u jaki aprača Dźmitryja i Uładzimira Karakinych uvajšli italjanski muzykant i kampazitar Jakopa Masa, jaki raniej supracoŭničaŭ z hurtam, i junaja vykanaŭca Hanna Vahanava.
U 2009 hodzie biełaruski pradstaŭnik Maks Łorens zaniaŭ 10-je miesca, u 2008 — na 14-j pazicyi apynuŭsia Ivan Vabiščevič (Dziadźka Vania).
