Vivat Operalia!
Z 25 krasavika da 2 maja ŭ miłanskim opiernym teatry Ła‑Skała prachodziŭ mižnarodny konkurs vakalistaŭ Operalia. Piša Julija Andrejeva.
Z 25 krasavika da 2 maja ŭ miłanskim opiernym teatry Ła‑Skała prachodziŭ mižnarodny konkurs vakalistaŭ Operalia. Hetaje muzyčnaje spabornictva ličycca adnym z samych prestyžnych chacia b tamu, što jaho zasnavalnikam i mastackim kiraŭnikom źjaŭlajecca Płasida Daminha. Piša Julija Andrejeva.
Sioleta konkurs Operalia prachodziŭ užo ŭ 18‑y raz. Kožny hod hety konkurs pravodzicca ŭ rozny čas i ŭ roznych opiernych teatrach śvietu. Niaźmiennaj zastajecca tolki ideja i rehłamient. Ideja ŭ tym, kab dać mahčymaść talenavitym śpievakam va ŭzroście ad 18 da 30 hadoŭ zaklučać kantrakty sa słavutymi opiernymi teatrami śvietu. Niezdarma ž Daminha zaprašaje ŭ žury nie piedahohaŭ i śpievakoŭ, a dyrektaraŭ takich lehiendarnych teatraŭ, jak Mietrapoliten Opiera (Ńju‑Jork), Kovient Harden (Łondan), Ła‑Skała (Miłan), Teatr Šatle (Paryž), Teatr Liseu (Barsiełona), a taksama viadomych režysioraŭ, dyrektaraŭ fiestyvalaŭ. Sprytnym vokam i vucham hetyja ludzi vyznačajuć najbolš pierśpiektyŭnych artystaŭ i adkryvajuć pierad imi dźviery svaich teatraŭ. I choć daloka nie ŭsie łaŭreaty stali paśla vydatnymi śpievakami, jość siarod ich i sapraŭdnyja znakamitaści: mieca‑saprana Džojs dy Danata), tenary Chase Kura i Rałanda Viljason.
Vialikija nadziei ŭskładajucca i na łaŭreataŭ 2010 hodu. Darečy, užo prosta trapić na Operalia — heta hrandyjozny pośpiech, bo dla ŭdziełu ŭ konkursie treba prajści nadzvyčaj ciažki papiaredni adbor. Štohod u paryžskuju štab‑kvateru pastupaje nie mienš za 1000 zajavak z usiaho śvietu. Śpiecyjalnaje žury prasłuchoŭvaje hukazapisy i adbiraje 40 udzielnikaŭ, jakim apłačvajecca daroha ŭ abodva kancy i pražyvańnie ŭ hateli. Sioleta ŭ daminhaŭskim konkursie ŭpieršyniu zaśpiavała biełaruska — studentka 4‑ha kursa Sankt‑Pieciarburhskaj kansiervatoryi Nadzieja Kučar (Nadine Koucher, jak pišacca jaje proźvišča na YouTube). Na žal, niahledziačy na svaje fienamienalnyja vierchnija noty, jana dajšła tolki da druhoha turu — nie chapiła artystyzmu. Ale spadziajusia, što našuju śpiavačku zaŭvažyli i daduć joj mahčymaść daskanalić svoj vakalny i teatralny talent u Miłanie ci Ńju‑Jorku.
Nie dastałosia pryzoŭ i 23‑hadovamu ŭkrainskamu barytonu Andreju Bandarenku, za jakoha my zaŭzieli praź internet‑telebačańnie. Bałazie, finał konkursu tranślavaŭsia na kanale http://www.medici.tv, i na chutkaści 1 miehabit/s možna było i hladzieć, i słuchać.
A voś jašče adzin ŭkrainiec, bas Jaŭhien Arłoŭ,— razam ź italjanskim tenaram Džardana Łuka i saprana Rozaj Fieoła) zdabyŭ «srebra» i 20 000 dalaraŭ. U dadatak, Roza Fieoła zdabyła pryz za vykanańnie sarsueły (ispanskaj apierety). Hetuju ŭznaharodu Płasida Daminha zasnavaŭ u honar svajoj pamierłaj maci, Piepity Embił de Daminha, jakaja była zorkaj hetaha žanru. Anałahičnaja premija ŭ honar Płasida Daminha‑starejšaha była prysudžanaja amierykanskamu tenaru Natanielu Piku. Sarsueła — advolnaja častka spabornictva. Ale mnohija kankursanty, nie tolki ispancy, achvotna śpiavajuć ispanskuju muzyku. Škada, što ŭ biełarusaŭ niama svajoj nacyjanalnaj apierety!
«Bronzu» i 10 000 dalaraŭ atrymała rasijanka Dynara Alijeva i paŭdniovakarejski bas Čchie Džun Lim.
Svaich haspadaroŭ znajšła i najvyšejšaja ŭznaharoda konkursu — 30 000 dalaraŭ plus hadzińnik «Roleks». Jana dastałasia 22‑hadovamu rumynskamu tenaru Stefanu Popu i bałharskaj śpiavačcy Soni Jončavaj, jakaja śpiecyjalizujecca na vykanańni staražytnych opier. Stefan Pop i Roza Fieoła dadatkova atrymali pryz hladackich simpatyj.
Zrešty, najbolš efiektnaja ŭznaharoda dastałasia nie im, a amierykanskamu bas‑barytonu Rajanu Mak‑Kini, jaki staŭ pieršym łaŭreatam premii imia Birhit Nilsan za najlepšaje vykanańnie opier Vahnera i Štraŭsa. Hetuju premiju Płasida Daminha zasnavaŭ na tyja hrošy, jakija sam atrymaŭ letaś z ruk šviedskaha karala ŭ jakaści premii imia Birhit Nilsan. Słavutaja šviedskaja śpiavačka, jakaja pamierła ŭ 2005 hodzie, zaviaščała kožnyja 2‑3 hady vypłačvać pryz pamieram u miljon dalaraŭ za vydatnyja dasiahnieńni ŭ opiery. I pieršuju premiju jana asabista prysudziła Płasida Daminha, ale paprasiła trymać heta ŭ tajamnicy ciaham troch hadoŭ paśla jaje śmierci. Cyrymonija pieradačy premii adbyłasia 13 kastryčnika 2009, i tady ž Daminha paabiacaŭ, što na hetyja hrošy budzie vypłačvać maładym śpievakam u ramkach Operalia śpiecyjalnuju premiju.
Darečy, sam maestra padčas konkursu sumiaščaŭ rolu staršyni žury z rolaj dyryžora. U svaje amal 70 hadoŭ jon poŭny entuzijazmu i enierhii. Pobač ź im u žury była jahonaja žonka Marta — u minułym vydatnaja śpiavačka i opierny režysior. A ŭ pačatku cyrymonii ŭznaharodžańnia ŭsie ŭdzielniki, jakija prajšli ŭ druhi tur (u tym liku i biełaruskaja śpiavačka) pa tradycyi praśpiavali choram konkursny himn, napisany synam maestra — Płasida Daminha‑małodšym.
