Čarhiniec: «Što ž vaš prezident narabiŭ?!»
Staršynia Hramadskaj rady pa maralnaści Mikałaj Čarhiniec paviedamiŭ, što taja praca, jakaja viałasia napiaredadni kancerta hurtu Rammstein u Minsku, dała plon.
Staršynia Hramadskaj rady pa maralnaści Mikałaj Čarhiniec paviedamiŭ, što taja praca, jakaja viałasia napiaredadni kancerta niamieckaha hurtu Rammstein u Minsku, dała plon.
«Vy pomnicie, paśla kancerta Rammstein Radu pa maralnaści chacieli razdrakonić naša roznaja presa. Heta była ich sproba paździekavacca. Nijakaja my nie cenzura, jak sprabavała padać apazicyjnaja presa.
Pa hurtu Rammstein my vystupili nie z punktu hledžańnia, kab jaho nie dapuścić.
Nam prakrucili videazapis adnaho z kancertaŭ, dzie śviatary našy zakryvali tvary ad soramu za toje, što tam adbyvajecca.
I my zapatrabavali: «Raźbiaryciesia, bratki, što heta za kancert. I kali tam jość parnucha, treba jaje nie dapuścić». Pasłuchali nas. Kažuć, što moładzi kancert spadabaŭsia», — adznačyŭ Čarhiniec.
Kali hienierała papraknuli jaho knihaj «Tajny Avalnaha kabinieta», jakaja ŭtrymlivaje intymnyja sceny, piśmieńnik pasprabavaŭ pakazać vartaść tvora.
«Amierykancy ŭprošvajuć mianie čaćviorty hod pieravydać. A kali ŭličyć, što jon pieravydadzieny ŭ dvanaccaci krainach i siemnaccać razoŭ vydavaŭsia ŭ Biełarusi i Rasii… Reč idzie pra toje, što rabiŭ prezident Amieryki. Vy nie znojdziecie tam nivodnaha fakta prydumanaha, kali havorka idzie ab «salonaści». Vy paprakajecie: «Aj-aj, što ž tam napisaŭ!?».
A ja mahu skazać: «Aj-aj, što ž vaš prezident narabiŭ?!»
Ja pisaŭ praŭdu».
Hramadskaja rada pa maralnaści była stvoranaja ŭ 2009 hodzie na prapanovu Biełaruskaj pravasłaŭnaj carkvy i Sajuza piśmieńnikaŭ Biełarusi. Uznačaliŭ jaje Mikałaj Čarhiniec. U radu ŭvajšli pradstaŭniki vialikich kanfiesij, jakija dziejničajuć u Biełarusi. U jaje šerahach mitrapalit Fiłaret, arcybiskup Tadevuš Kandrusievič, kampazitar Ihar Łučanok i inšyja.
