«Vidavočna, kolkaść skarocicca». Jak adabjecca na stanie Katalickaj carkvy zadumanaja ŭładami pierarehistracyja parafij?
Pavodle pryniataha ŭ 2024 hodzie zakona ŭ Biełarusi z 1 lipienia pačynajecca pierarehistracyja relihijnych arhanizacyj, jakimi taksama źjaŭlajucca pravasłaŭnyja i katalickija parafii, a taksama pratestanckija supolnaści. Ci stanie pracedura prablemaj dla katalickich viernikaŭ, Katolik.life spytaŭ u śviataroŭ.
Fota ilustracyjnaje
Apytanyja śviatary nie čakajuć, što sama pracedura budzie vialikaj ciažkaściu.
Adnak vidavočna, što ahulnaja kolkaść parafij istotna skarocicca — asabliva va ŭschodniaj častcy Biełarusi, dzie paśla adnaŭleńnia struktur Katalickaj carkvy ŭ 1990-ch hadach masava rehistravali parafii ŭ miescach, dzie jany isnavali ŭ dakamunistyčnyja časy.
Akramia adnaŭleńnia histaryčnych parafij, rehistravali i novyja, ale ŭ mnohich ź ich na praciahu minułych 30 hadoŭ nieabchodnaj kolkaści viernikaŭ nie nabrałasia. Tamu faktyčna ŭ niekatorych parafijach nijakaj dziejnaści nie viałosia, jany isnavali tolki na papiery.
Na likvidacyju takich supolnaściaŭ užo padali zajavy. Naprykład, heta adna z parafij na uschodzie Biełarusi, jakaja źjaviłasia jašče pry Vialikim Kniastvie Litoŭskim, a nanava była rearhanizavanaja ŭ 1990-ch. Tut zachavalisia ruiny kaścioła, jaki, adnak, adnavić niemahčyma. U parafii faktyčna niama viernikaŭ.
Tamu likvidacyja padobnych parafij — heta taksama vyrašeńnie prablemy dla Katalickaj carkvie, jakoj časam «uciuchvali» avaryjnyja budynki śviatyń, adnaŭleńnie jakich patrabuje vielizarnych srodkaŭ.
Siarod parafij, jakija buduć likvidavanyja, jość niekatoryja bolš-mienš «žyvyja», adnak nieabchodnaj kolkaści viernikaŭ tam taksama niama: pavodle novych pravił, zasnavalnikami supolnaści pavinny być jak minimum 20 čałaviek. Pry hetym nieabchodna paznačać miesca pracy viernikaŭ, uvodziacca i niekatoryja inšyja abmiežavańni.
Ale, pa sutnaści, novaja pracedura pakazvaje realny stan rečaŭ u Carkvie. Jak padkreślivajuć śviatary, likvidacyja nie aznačaje, što ŭ hetych miescach nie budzie dušpastyrskaj apieki viernikaŭ.
A jakija ciažkaści mohuć uźniknuć pry pierarehistracyi «žyvych» parafij, mierkavać pakul rana.
Čytajcie taksama:
Startavali piešyja pilihrymki ŭ Budsłaŭ. Niekatoryja pałomniki projduć 300 kiłamietraŭ
Katalickaje «Radyjo Maryja» pierajechała ŭ sinahohu
U Hrodnie pabudujuć kaścioł z redkim dla Biełarusi niabiesnym zastupnikam
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)