Amierykanskija demakraty abmiarkoŭvajuć zamienu Bajdena z-za pravalnych debataŭ z Trampam
Pradstaŭniki i prychilniki Demakratyčnaj partyi abmiarkoŭvajuć zamienu ich kandydata, prezidenta ZŠA Džo Bajdena ŭ vybarčym śpisie z-za jaho pravalnaha vystupu na debatach z kandydatam ad respublikancaŭ Donaldam Trampam. Pra heta paviedamlaje Politico sa spasyłkaj na bolš čym dziasiatak pradstaŭnikoŭ demakrataŭ i ich donaraŭ.
Donald Tramp i Džo Bajden na debatach. Fota: AP Photo/Gerald Herbert
Adzin z daradcaŭ partyi skazaŭ vydańniu, što «nie mienš za paŭtuzina klučavych donaraŭ dasłali jamu paviedamleńnie pra «katastrofu», i što demakratam «treba niešta rabić», ale pryznaŭ, što «mała što mahčyma, kali» Bajden nie adydzie ŭbok.
Adzin z najbujniejšych donaraŭ partyi i prychilnik Bajdena skazaŭ, što prezidentu para zaviaršyć svaju kampaniju. Jon nazvaŭ vystup Bajdena «najhoršym u historyi» i adznačyŭ, što jon nastolki «drenny, što nichto nie budzie źviartać uvahi na chłuśniu Trampa».
«Bajden pavinien adyści. Biez sumnievu», — skazaŭ donar u tekstavym paviedamleńni, prapanoŭvajučy alternatyŭny śpis na čale z hubiernatarami štataŭ Merylend i Mičyhan.
Adzin z daradcaŭ bujnych donaraŭ demakrataŭ skazaŭ, što jany pisali niezadavolenyja paviedamleńni, u jakich niekatoryja ź ich pytalisia: «Što heta, čort biary?»
«Naša adzinaja nadzieja na toje, što jon adydzie, my damovimsia pra źjezd partyi ci jon pamre. U advarotnym vypadku nam kaniec», — skazaŭ daradca donaraŭ.
Zrešty, navat tyja, chto ŭ pryvatnym paradku skardziŭsia na vystup Bajdena, śćviardžajuć, što tolki jon sam moža vyrašyć hetaje pytańnie.
U kampanii dziejnaha prezidenta ZŠA adkazali na krytyku, i adzin z daradcaŭ nazvaŭ jaho «adzinym čałaviekam, jaki kali-niebudź pieramahaŭ Donalda Trampa».
Staršy daradca najvyšejšych słužbovych asob Demakratyčnaj partyi raskazaŭ Politico, što choć nichto nie čakaŭ majstar-kłasa ad Bajdena, toj adkryta rasčaravaŭ.
«Jon vyhladaŭ kiepska ŭ dačynieńni da svajho pasłańnia, pa sutnaści, pa kontrarhumientach, prezientacyi, drenny ŭ dačynieńni da nievierbalnych srodkaŭ. U hetych debatach dla jaho nie było nivodnaj śvietłaj plamy. Adziny stanoŭčy momant — heta toje, što heta adbyłosia ŭ červieni, a nie ŭ kastryčniku», — reziumavaŭ jon.
Sam Bajden adchiliŭ aściarohi adnosna svajho niaŭdałaha vystupu na debatach suprać Donalda Trampa ŭ čaćvier. Adkazvajučy na pytańnie The Hill pra zakliki niekatorych demakrataŭ vybyć z prezidenckaj honki abo pra toje, ci jość u jaho niejkija aściarohi adnosna svajho vystupu, Bajden skazaŭ, što nie turbujecca praz heta. «Ja dumaju, my dobra spravilisia», — skazaŭ jon.
Ciapierašni kiraŭnik Biełaha doma taksama paskardziŭsia na drennaje samaadčuvańnie padčas debataŭ, adznačyŭšy, što ŭ jaho balić horła. Akramia taho, pavodle jaho słoŭ, «ciažka vieści debaty z chłusam». «New York Times adznačyła, što jon (Donald Tramp) schłusiŭ 26 razoŭ», — skazaŭ Bajden.
Hołas prezidenta padčas debataŭ časta byŭ chrypłym, što Bieły dom paźniej patłumačyŭ prastudaj. Jak adznačaje vydańnie, taksama časam jon hublaŭ chod dumak ci nie moh vyrazna sfarmulavać svaju dumku.
Pavodle źviestak fłeš-apytańnia, praviedzienaha CNN siarod naziralnikaŭ za debatami, 67% apytanych skazali, što Tramp pieramoh u debatach, u paraŭnańni z 33%, jakija skazali, što pieramoh Bajden.
U toj ža čas ciapierašniaja pieršaja łedzi ZŠA Džył Bajden pachvaliła svajho muža, niahledziačy na toje, što naziralniki krytyčna aceńvajuć jaho vystup na debatach.
«Džo, ty zrabiŭ takuju vydatnuju pracu! Ty adkazaŭ na ŭsie pytańni, ty viedaŭ usie fakty», — skazała jana paśla zakančeńnia debataŭ.
Palitołah Tomas Jehier z Kiolnskaha ŭniviersiteta taksama miarkuje, što Bajden padrychtavaŭsia da debataŭ nie horš, čym Tramp, adnak heta nie dapamahło jamu vyhladać upeŭniena.
«Adzinaja prablema ŭ tym, što heta [jahonyja adkazy] nikoha nie cikaviła. Samaje hałoŭnaje pytańnie było: «Jon mocny?» I adkaz byŭ adnaznačnym — nie», — skazaŭ jon u razmovie z Bild.
Čytajcie taksama:
Tramp upeŭniena pieramoh Bajdena na debatach
Tramp padčas debataŭ z Bajdenam nazvaŭ nieprymalnymi ŭmovy Pucina pa spynieńni vajny
Padčas debataŭ z Trampam Bajden zhadaŭ Biełaruś
Treci kandydat. U Robierta Kienedzi-małodšaha ŭsio bolš šancaŭ uklučycca ŭ prezidenckuju honku ŭ ZŠA
