Ukrainku, jakaja ŭciakła ad vajny ŭ Biełaruś, śpiarša chvalili ŭ rajonkach, a paśla addali pad sud
U Homielskim abłasnym sudzie sudzili adrazu niekalkich ahraryjaŭ z Homielščyny. Pa spravie prachodzili adrazu 8 čałaviek, i siarod ich — Alena Vitaljeŭna Chienčanka, jakaja raniej u zvodkach ŚMI fihuravała zusim u inšaj jakaści, piša vydańnie «Štodzień».
U pačatku 2023 hoda ŭ akciabrskaj i mazyrskaj rajonnych hazietach «Čyrvony Kastryčnik» i «Žyćcio Paleśsia» vyjšli amal identyčnyja prapahandysckija materyjały pra ŭkrainskuju siamju, jakaja kaliści, jašče ŭ 2014 hodzie, źjechała z Ukrainy, kali pačalisia vajennyja dziejańni na Danbasie, u haścinnuju i mirnuju Biełaruś. Spačatku ŭ Pietrykaŭski rajon, potym u Kalinkavicki. A potym siamja znajšła pracu ŭ Akciabrskim rajonie na fiermie, dzie miascovyja ŭłady dali im navat dom.
Pra takija sacyjalnyja harantyi va Ukrainie siamja mahła tolki maryć, havaryłasia ŭ prapahandysckim artykule. Lilija Chienčanka stała pracavać na fiermie dajarkaj, jaje muž — žyviołavodam, a maci Alena Vitaljeŭna pracavała zahadčycaj składu na fiermie.
Na momant źjaŭleńnia artykuła Alena Vitaljeŭna Chienčanka ŭžo pajšła na piensiju. Adnak nieŭzabavie žančyna z takimi piersanalnymi danymi apynułasia na łavie padsudnych. Razam ź joj sudzili taksama roznaje načalstva ź sielskahaspadarčaha AAT «Kapličy» Kalinkavickaha rajona — usiaho 8 čałaviek. Sprava tyčycca niezakonnaha zbytu bujnoj rahataj žyvioły.
Abvinavačanym inkryminujucca adrazu niekalki artykułaŭ Kryminalnaha kodeksa: 427 č. 2 «Słužbovy padłoh», 426 č. 3 «Pieravyšeńnie ŭłady ci słužbovych paŭnamoctvaŭ», 210 č. 2 «Raskradańnie šlacham złoŭžyvańnia słužbovymi paŭnamoctvami», 210 č. 4 «Raskradańnie šlacham złoŭžyvańnia słužbovymi paŭnamoctvami».
Kryminalnuju spravu pa nielehalnym handli pačali paśla taho, jak Alaksandr Łukašenka u adnym z vystupleńniaŭ papiaredziŭ čynoŭnikaŭ pra žaleznuju dyscyplinu ŭ ahrarnym siektary. Na momant, kali adkryli kryminalnuju spravu, niekatoryja jaje ŭdzielniki byli jašče na voli.
Pavodle śledstva, z 2018 pa 2020 hod było niezakonna pradadziena 500 karoŭ. Sud Mazyrskaha rajona pakaraŭ eks-kiraŭnika «Kapličy» i zaatechnika siami hadami ŭzmocnienaha režymu, a voś bryhadziraŭ fiermaŭ i žyviołavodaŭ vyzvalili ad pakarańnia, pakolki skončyŭsia termin daŭniny złačynstva.
8 lipienia hetuju spravu ŭ kasacyjnym paradku budzie razhladać Homielski abłasny sud.
Čytajcie taksama:
U Hienprakuratury padličyli ŭzrovień karupcyi ŭ krainie
Aryštavanaha za chabar top-mieniedžara Biełčyhunki zvolnili pa karupcyjnym artykule
