Kolki razoŭ i dzie byvali na froncie Uładzimir Zialenski i Uładzimir Pucin
Prezident Ukrainy nie raz jeździŭ na pieradavuju, na samyja haračyja ŭčastki frontu, a što rasijski? Sabrali ŭsie viadomyja fakty.
Uładzimir Zialenski i Uładzimir Pucin.
Naviedvańnie prezidentam Ukrainy linii frontu za dva hady ŭzbrojenaha kanfliktu stała zvykłaj źjavaj. My zmahli sabrać źviestki pra amal dva dziasiatki takich pajezdak.
Pieršy raz na liniju frontu Uładzimir Zialenski adpraviŭsia ŭ mai 2022 hoda. Tady jon naviedaŭ Charkaŭ i Charkaŭskuju vobłaść.
Druhaja pajezdka na pieradavuju adbyłasia 5 červienia. Hetym razam Viarchoŭny hałoŭnakamandujučy pajechaŭ u Lisičansk, za jaki išli žorstkija bai. Na žal, utrymać horad nie atrymałasia. U lipieni jon byŭ akupavany rasijskimi vojskami.
U siaredzinie červienia Zialenski naviedaŭ pieradavyja pazicyi ŭkrainskich vojskaŭ u Mikałajeŭskaj vobłaści, a 8 lipienia pabyvaŭ u Dnieprapiatroŭskaj vobłaści.
Uładzimir Zialenski padčas naviedvańnia Mikałajeŭskaj vobłaści. 18 červienia 2022 hoda. Fota: president.gov.ua
U vieraśni Viarchoŭny hałoŭnakamandujučy prybyŭ u tolki što vyzvaleny Izium, a ŭ listapadzie, praź niekalki dzion paśla vyzvaleńnia horada, naviedaŭ Chierson.
U śniežni 2022 hoda adbyłasia pajezdka na pieradavyja pazicyi USU na Danbasie. U čas hetaj pajezdki 6 śniežnia Zialenski zapisaŭ videazvarot da abaroncaŭ Słavianska na fonie steły z nazvaj horada. A 20-21 śniežnia Viarchoŭny hałoŭnakamandujučy byŭ u samaym haračym punkcie — horadzie Bachmucie. Novaja pajezdka ŭ hety horad adbyłasia 22 sakavika 2023 hoda.
U 2023 hodzie Zialenski dvojčy byŭ u Aŭdziejeŭcy. Pieršy raz — 16 krasavika, a druhi ŭ samym kancy hoda — 29 śniežnia. U toj čas za horad išli intensiŭnyja bai. Svaim vizitam Viarchoŭny hałoŭnakamandujučy imknuŭsia padtrymać bajavy duch svaich vojskaŭ. Adnak praz paŭtara miesiaca, 16 lutaha 2024 hoda, było pryniata rašeńnie pakinuć horad.
23 maja minułaha hoda Uładzimir Zialenski pryjazdžaŭ na pieradavyja pazicyi USU pad Marjinkaj i Vuhladaram, a praź miesiac (26-27 červienia) naviedaŭ vojski na Biardzianskim i Mielitopalskim napramkach.
Uładzimir Zialenski ŭ čas naviedańnia Biardzianskaha napramku. 26 červienia 2023 hoda. Fota: V_Zelenskiy_official / Telegram
U Dzień Sił śpiecyjalnych apieracyj (SSA) 29 lipienia Viarchoŭny hałoŭnakamandujučy naviedaŭ kamandny punkt taktyčnaj hrupy SSA ŭ Časavym Jary na Bachmuckim napramku, a praz dva tydni (14 žniŭnia) byŭ na pieradavoj u Danieckaj vobłaści, dzie naviedaŭ štaby vaśmi bryhad USU.
Kali zhadać pajezdki Uładzimira Zialenskaha za šeść miesiacaŭ hetaha hoda, to siarod ich naviedvańnie pieradavych pazicyj ukrainskich vojskaŭ u Rabocinie (4 lutaha), na kupianskim napramku (19 lutaha), Zaparožskaj (27 sakavika) i Danieckaj (harady Słaviansk i Časaŭ Jar, 19 krasavika) abłaściach.
U čas naviedvańnia Danieckaj vobłaści, 19 krasavika 2024 hoda. Fota: pres-słužba prezidenta Ukrainy
26 červienia Zialenski pryjechaŭ u horad Pakroŭsk u Danieckaj vobłaści, dzie sustreŭsia z bajcami dźviuch bryhad. U čas pajezdki im byŭ pradstaŭleny novy kamandujučy Abjadnanymi siłami hienierał Andrej Hnataŭ.
Paviedamlajecca, što padčas pajezdki Zialenski raskrytykavaŭ čynoŭnikaŭ, jakija nie pryjazdžajuć u pryfrantavyja rajony.
Viarchoŭny hałoŭnakamandujučy Uzbrojenymi siłami Rasii Uładzimir Pucin, u adroźnieńnie ad Uładzimira Zialenskaha, za dva hady vajny naviedaŭ pryfrantavyja terytoryi tolki niekalki razoŭ.
U śniežni 2022 hoda pres-słužba Kramla paviedamlała pra pajezdku Pucina ŭ «štab» vojskaŭ, jakija ŭdzielničajuć u vajennych dziejańniach. Ale nie było nijakich udakładnieńniaŭ adnosna miescaznachodžańnia «štaba».
Uładzimir Pucin padčas naviedańnia štaba hrupoŭki vojskaŭ «Dniapro» na chiersonskim kirunku. Skryn videa
19 sakavika 2023 hoda Pucin naviedaŭ akupavanyja Krym i Maryupal, a 17 krasavika — štab hrupoŭki vojskaŭ «Dniapro» na chiersonskim kirunku i štab nacyjanalnaj hvardyi «Uschod» u tak zvanaj «ŁNR».
Čytajcie taksama:
Uładzimir Pucin ździejśniŭ rabočuju pajezdku ŭ Maryupal — pres-słužba
Zialenski pravioŭ pasiadžeńnie Staŭki ŭ Charkavie
Zialenski: Byŭ na froncie, heta ščaślivy dzień — na ŭsich kirunkach było prasoŭvańnie
