«Vyjechaŭ na pałasu sustrečnaha ruchu, prosta ŭ łob». Što kažuć vidavočcy DTZ pad Maładziečnam
Kiroŭca maršrutnaha taksi pačaŭ uchilacca ad sutyknieńnia, ale nie paśpieŭ.
Siońnia, 25 červienia, kala 7-j ranicy niedaloka ad vioski Krynica Maładziečanskaha rajona na aŭtatrasie «Minsk — Maładziečna — Narač» sutyknulisia lehkavy aŭtamabil «Falksvahien» i maršrutka, jakaja jechała ŭ stalicu. Pa śviedčańni vidavočcaŭ, sutyknieńnie było łabavym.
Ludzi, jakija ŭ hety čas jechali mima ŭ aŭtobusie na pracu, raskazali, što bačyli nie mienš za čatyry mašyny chutkaj dapamohi i padraździaleńni ratavalnikaŭ MNS.
Kraj.by źviazaŭsia z adnym z kiroŭcaŭ maršrutnaha taksi. Jon raspavioŭ:
— Heta zdaryłasia adrazu za Krynicaj (prykładna 5 km ad Maładziečna) u kirunku Minska. Maršrutka jechała ŭ bok stalicy i była poŭnaja pasažyraŭ pad zaviazku, bo ŭ hety čas ludzi jeduć na pracu. Bieły lehkavy aŭtamabil «Falksvahien» ruchaŭsia ź Minska i raptam vyjechaŭ na pałasu sustrečnaha ruchu, prosta łob u łob maršrutcy. Kiroŭca maršrutnaha taksi staŭ uchilacca ad sutyknieńnia, ale nie paśpieŭ. Udar pryjšoŭsia jamu ŭ levaje piaredniaje koła, jakoje vyrvała razam sa stojkaj. Maršrutku raźviarnuła na 90 hradusaŭ, i jana lehła na bok. Inšaja maršrutka, jakaja vyjechała z maładziečanskaha vakzała na Minsk a 06:58, užo zabirała pasažyraŭ ź miesca avaryi.
Kiroŭcu, jaki byŭ za rulom maršrutnaha taksi, zavuć Alaksandr. Jon całkam paćvierdziŭ apovied kaleh.
— Nakolki mnie viadoma, usie zastalisia žyvyja. U mianie paciarpieli kala piaci pasažyraŭ. U mašynie «Falksvahien» ja bačyŭ tolki kiroŭcu. Pa-mojmu, jon jechaŭ adzin, i jaho paviezła chutkaja dapamoha.
— Jak vy siabie adčuvajecie?
— Ja? Narmalna, — skazaŭ Alaksandr.
Pryčyny i abstaviny darožna-transpartnaha zdareńnia vyśviatlajuć supracoŭniki Dziaržaŭtainśpiekcyi.
Čytajcie taksama:
Maršrutki i aŭtobusy ź Minska ŭ Barysaŭ i Žodzina buduć chadzić pa-novamu
Poŭnaja ludziej maršrutka pierakuliłasia pa darozie na Hrodna
U Minsku 18-hadovy chłopiec raspyliŭ ślezaciečny haz u maršrutcy
Na praśpiekcie Niezaležnaści ŭ Minsku maršrutka vylecieła na chodniki
U sutyknieńni maršrutki i traktara ŭ Babrujskim rajonie paciarpieli 13 čałaviek, dvoje ŭ reanimacyi
