Lisički ŭžo voziać bahažnikami, a voś baraviki čarvivyja
U pieršaj pałovie červienia ŭ hrybnikoŭ Biełarusi «lisičkavy bum». U roznych rajonach źbirajuć hetyja hryby z roznym pośpiecham, ale niekatoryja ŭmudrajucca nahruzić cełyja bahažniki. A voś z baravikami prablemy — bolšaść ź ich čarvivyja, raskazvajuć hrybniki. Vydańnie «Pieršy» padhladzieła cikavyja kadry ŭ supołcy hrybnikoŭ Biełarusi.
Źbirajuć bahažnikami!
Maksim Hunajeŭ 12 červienia źbiraŭ lisički ŭ Čavuskim rajonie Mahiloŭskaj vobłaści. Ich akazałasia tak šmat, što sypali va ŭsiu taru, što była ŭ mašynie. Kaža, paśla ŭzvažvańnia vyjšła 11,5 kiłahram.
Lisički z Čavuskaha rajona
A voś taki bahažnik lisičak sabrali 10 červienia na palihonie kala Sucina Puchavickaha rajona.
Na zimu možna zamarozić za adzin zachod
Niekatoryja navat nie pavieryli, maŭlaŭ, letašnija. Ale hrybnik Aleks raskazaŭ:
«Siońniašniaje. Sumlenna sabranyja ŭdvaich za 5 hadzin. Tam, darečy, na ŭjeździe i vyjeździe pierakupy ŭžo trucca, pa 9 rub. prapanujuć za kh. Masava pajšła lisička. Zasmučajuć tolki hrybniki-słany, jakija na złom hałavy pruć niezrazumieła kudy, šmat drobiazi rastaptanaj».
«Voś jany, soniejki!»
Maryja Žukaviec try dni z 10 pa 12 červienia chadziła ŭ les u Kiraŭskim rajonie Mahiloŭskaj vobłaści. Jość i lisički, i baraviki, i sunicy.
«Sunicy sioleta prosta ašaleli z pamierami. Biełyja adciahvali ad jahad (10 červienia). Sabrała dla siabra, vielmi prasiŭ. Pajechała ŭ inšy rajon (11 červienia), tam lisički napali. A voś 12 červienia tolki jahady, bolš ni na što nie hladzieła» — padzialiłasia Maryja.
Zbory Maryi
Ludmiła ź Biarozy Bresckaj vobłaści taksama sabrała dva košyki lisičak 11 červienia.
«Voś jany, soniejki! Taŭstanohija, vilhotnyja, možna ceły dzień rezać. Trochlitrovaje viadzierca padaryli nie dachodziačy da chaty. Hryby pajšli masava, vielmi šmat małych», — raskazała Ludmiła.
Jość i ŭ Bresckaj vobłaści
Mikałaj Bialkievič źbiraŭ pieršyja lisički i čarnicy ŭ Salihorskim rajonie.
«Zazirnuŭ u miescy, dzie ŭ minułyja hady zaŭvažaŭ lisički. Źjavilisia. U roznych miescach pa-roznamu, dzie adzinočki, dzie siamiejki, jość užo i «prytomlenyja». Na padsmažyć sabraŭ. Buduć doždžyki, budzie i praciah. Čarnicy pačali śpieć. Dumaju, śpiełych nie bolš za 40%. Uradžajnaść siaredniaja. Miarkuju, što aptymalnyja terminy zboru nastupiać praz paru tydniaŭ.
Było paru niečakanych sustreč. Źmiaja, jakaja, zhledzieŭšy mianie, vyrašyła terminova reciravacca. Źlotak nieviadomaj mnie ptušački, jaki siadzieŭ u chvojniku i niezrazumieła, jak tam apynuŭsia», — raskazaŭ Mikałaj pra ŭražańni ad pachodu ŭ les.
Salihorskija dary lesu
Homielskija hrybniki kažuć, što lisički dastajucca nie biez pracy. Ihar Varapajeŭ: «Lisički jość, ale treba šmat chadzić i kamary nie dajuć adpačyć».
Nie biez pracy
Z baravikami prablemy, ale znojdzieny pieršy parasonik!
Hrybniki paviedamlajuć, što baraviki ciapier traplajucca, u asnoŭnym, čarvivyja. Naprykład, Maša Nikitka raskazała pra vyniki pachodu ŭ les u Babrujskim rajonie.
«Prajechalisia my pa baravičkach i lisičkach. Baraviki jość, ale jany pieravažna staryja i čarvivyja na 100%. Tamu my vyrašyli, što lepš papalavać na čystyja lisički, čym za čarvivyja baraviki. Lisički pajšli va ŭsich miescach, ale pa-roznamu: dzieści tolki-tolki pačynajucca, dzieści ŭžo davoli vialikija, a dzieści vyskačyli paštučna. U vyniku zaleva vyhnała nas ź lesu», — padzialiłasia Maša.
Zbor Mašy Nikitki
A Alena Kulik napisała 10 červienia, što ŭ Pinskim rajonie znajšli navat parasonik. Ranavata!
«Va ŭsich lisički, a ŭ nas parasonik. Kasili za płotam i ŭbačyli. Chutčej za ŭsio tolki raskryŭsia, tamu što ŭvohule ceły dzień nie zaŭvažali jaho», — raskazała Alena.
Pieršy parasonik!
U abjavach lisički ciapier pradajuć prykładna pa 30-40 rubloŭ za piacilitrovaje viadro na Homielščynie. U Mahilovie jość prapanova pa 15 rubloŭ za kh. Čarnicy ŭ Kobrynie pradajuć pa 10 rub za kh, u Baranavičach — pa 7 rubloŭ za litr. Jašče ŭ Baranavičach za 10 rubloŭ možna kupić 0,5 litra sunic. Choć jość u tych ža Baranavičach prapanova i pa 13 rubloŭ za litr.
Čytajcie taksama:
Na minskaj Kamaroŭcy źjavilisia lisički, maliny, ahrest i harošak FOTY
Lisički pačali źbirać viodrami. A jakija na ich ciapier ceny?
«Try litry lisičak za paru hadzin». U Biełarusi pajšli hryby
