Udzieł u Samicie miru paćvierdzili kala 90 krain i mižnarodnych arhanizacyj
Kala 90 krain i arhanizacyj zarehistravalisia dla ŭdziełu ŭ Samicie miru, jaki adbudziecca ŭ Šviejcaryi 15-16 červienia, zajaviła 10 červienia prezidentka hetaj krainy Vijoła Amchierd.
Vijoła Amchierd. Fota: AP Photo/Vadim Ghirda
Ahułam było razasłana kala 160 zaprašeńniaŭ. Pavodle šviejcarskaj prezidentki, bolšaść udzielnikaŭ buduć pradstaŭlenyja na ŭzroŭni kiraŭnikoŭ dziaržaŭ abo ŭradaŭ.
«Pałova ŭdzielnikaŭ — ź Jeŭropy i Paŭnočnaj Amieryki, inšaja pałova — z Paŭdniovaj Amieryki, Afryki, Blizkaha Uschodu i Azii», — zajaviła Amchierd.
Pavodle Vijoły Amchierd, sustreča budzie nakiravanaja na «sumiesnaje vyznačeńnie darožnaj mapy» adnosna taho, jak pryciahnuć Rasiju da budučaha mirnaha pracesu.
Raniej u Ofisie prezidenta Ukrainy paviedamlali, što ŭdzieł u Samicie miru paćvierdzili 107 krain i mižnarodnych arhanizacyj.
Kanferencyja, jakuju ŭkrainskija ŭłady nazyvajuć Hłabalnym samitam miru, adbudziecca 15-16 červienia na raskošnym kurorcie Burhienštok pablizu horada Lucern u Šviejcaryi. Rasiju na samit nie zaprašali, a Kitaj ad udziełu ŭ im admoviŭsia. Taksama ad udziełu raniej admovilisia ŭłady Kambodžy, Pakistana, Saudaŭskaj Aravii, Mieksiki i Nikarahua.
Niekalki klučavych krain, uklučajučy Turcyju, Paŭdniovuju Afryku i Braziliju, pakul nie adkazali na zaprašeńnie. Indyja pahadziłasia ŭdzielničać — adnak pakul niezrazumieła, na jakim uzroŭni.
U toj ža čas Vijoła Amchierd spadziajecca na samit z udziełam Rasii paśla sustrečy pa Ukrainie. Jana adznačyła, što stvaryć umovy dla praviadzieńnia takoha samitu atrymajecca tolki pry ŭmovie sumiesnych dziejańniaŭ usich krain.
Čytajcie taksama:
Rasija namahajecca sarvać Samit miru, a Kitaj vystupaje instrumientam u rukach Pucina — Zialenski
Kitaj nie budzie ŭdzielničać u «samicie miru» pa Ukrainie
Zialenski: Pucin budzie apładziravać stojačy, kali Bajden praihnaruje samit miru
