Kitaj nie budzie ŭdzielničać u «samicie miru» pa Ukrainie
Raniej Uładzimir Zialenski publična źviartaŭsia da kitajskaha lidara Si Czińpina z zaklikam uziać udzieł u samicie, jak u Kijevie nazyvajuć kanfierencyju, što projdzie ŭ siaredzinie červienia ŭ Šviejcaryi, piša Radyjo Svaboda.
Si Czińpin. Fota: Tatan Syuflana / AP
Kitaj nie nakiruje svaich pradstaŭnikoŭ na kanfierencyju pa spynieńni vajny va Ukrainie, jakaja projdzie ŭ Šviejcaryi ŭ červieni. Pra heta piša Reuters sa spasyłkaj na čatyry krynicy. Raniej Uładzimir Zialenski publična źviartaŭsia da kitajskaha lidara Si Czińpina z zaklikam uziać udzieł u samicie, jak u Kijevie nazyvajuć kanfierencyju.
Pa słovach surazmoŭcaŭ ahienctva, Piekin pryniaŭ takoje rašeńnie, bo nie byli vykananyja ŭmovy, jakija byli nieabchodnyja dla jaho ŭdziełu. Siarod ich — zaprašeńnie na samit i Rasii, i Ukrainy dla «roŭnaha ŭdziełu ŭsich bakoŭ i sumlennaha abmierkavańnia ŭsich prapanoŭ». Raniej takija ŭmovy taksama ahučvaŭ MZS Kitaja.
Maskva nie zaprošanaja na kanfierencyju, choć Šviejcaryja «pierakananaja, što Rasija pavinna być uciahnutaja ŭ praces» pa ŭrehulavańni kanfliktu. Ukraina nie choča, kab Maskva sarvała praces, tłumačyŭ prezident krainy Uładzimir Zialenski. Rasijskich pradstaŭnikoŭ płanujuć pryciahnuć praz pasrednikaŭ užo na nastupnym etapie. Rasija, u svaju čarhu, zajaŭlała, što nie pryniała b udziełu ŭ sustrečy, navat kali b jaje zaprasili, bo nie maje namieru abmiarkoŭvać vyvad vojskaŭ z Ukrainy.
Usiaho, pa słovach pradstaŭnika šviejcarskaha MZS, na samit zaprasili bolš za 160 delehacyj. «Bolš za 70 dziaržaŭ paćvierdzili svoj udzieł u mirnaj kanfierencyi, bolšaść ź ich — na ŭzroŭni kiraŭnikoŭ dziaržaŭ i ŭradaŭ», — paviedamili ŭ viedamstvie.
Ahienctva Bloomberg raniej pisała, što prezident ZŠA Džo Bajden, chutčej za ŭsio, prapuścić sustreču pa Ukrainie z-za mierapryjemstva pa zbory srodkaŭ na svaju vybarčuju kampaniju.
Prezident Ukrainy Uładzimir Zialenski zaklikaŭ pryjechać na «samit miru» i Bajdena, i Si Czińpina.
«Kali łaska, prajavicie vaša liderstva ŭ nabližeńni miru — sapraŭdy miru, a nie paŭzy pamiž ŭdarami», — kaža jon.
Hazieta Financial Times daviedałasia, što ofis Zialenskaha skłaŭ dla ŭkrainskich čynoŭnikaŭ pamiatku z tezisami dla «ŭzmacnieńnia hramadskaha cisku» na Bajdena i Si Czińpina.
Kanfierencyja, na jakoj buduć abmiarkoŭvać šlachi spynieńnia vajny va Ukrainie, projdzie ŭ Biurhienštoku (Šviejcaryja) z 15 pa 16 červienia.
Čytajcie taksama:
Zialenski: Pucin budzie apładziravać stojačy, kali Bajden praihnaruje samit miru
Krainy NATA paprasili Zialenskaha nie patrabavać siabroŭstva Ukrainy ŭ aljansie
