Dzie ŭ Minsku možna zrabić pryščepku ad kleščavoha encefalitu
U Biełarusi majucca vakcyny rasijskaj i jeŭrapiejskaj vytvorčaści, jakija trochi adroźnivajucca adna ad druhoj.
Vakcynacyja ad kleščavoha encefalitu abaviazkovaja dla ludziej, jakija prafiesijna pracujuć u lesie, ale jana dastupnaja i dla nasielnictva, zajaviŭ padčas pres-kanfierencyi hałoŭny pazaštatny infiekcyjanist kamiteta pa achovie zdaroŭja Minharvykankama Śviatasłaŭ Vielhin, piša «Sputnik».
«U dačynieńni da nasielnictva jana (vakcyna) mienš raspaŭsiudžanaja, tolki apošnim časam stała nabyvać papularnaść. Ale jana dastupnaja», — padkreśliŭ Vielhin.
Pavodle jaho słoŭ, u Minsku pryščepku ad kleščavoha encefalitu robiać u centry vakcynaprafiłaktyki na bazie Haradskoj dziciačaj infiekcyjnaj kliničnaj balnicy na Jakuboŭskaha.
«Tudy možna patelefanavać i daviedacca ab najaŭnaści ŭ krainie vakcyny», — parekamiendavaŭ infiekcyjanist.
Akramia hetaha, vakcynu možna zamović u centralnych rajonnych paliklinikach. Taksama mnohija pryvatnyja miedycynskija centry robiać pryščepki, dadaŭ Vielhin.
Jon taksama adznačyŭ, što ŭ krainie majucca vakcyny rasijskaj i jeŭrapiejskaj (zvyčajna aŭstryjskaj) vytvorčaści, jany trochi adroźnivajucca pa składzie.
Hałoŭny pazaštatny infiekcyjanist taksama źviarnuŭ uvahu, što adroźnivajuć zachodni i ŭschodni encefalit, apošni praciakaje bolš ciažka.
«Raniej my zvyčajna rekamiendavali vakcynacyju ludziam, jakija iduć na spłavy, kudy-niebudź u tajhu, mienavita ŭ Rasiju, tam, dzie raspaŭsiudžany ŭschodni kleščavy encefalit. Jon vyklikaje ciažkija nastupstvy — pacyjenty mohuć traplać na štučnuju vientylacyju lohkich i navat śmiarotnyja vyniki mohuć być», — skazaŭ Vielhin.
Štohod u krainie fiksujecca kala 200 vypadkaŭ kleščavoha encefalitu, zvyš 2 tysiač — łajm-barelijozu. Štohod pa dapamohu da miedykaŭ u Biełarusi źviartajecca kala 50 tysiač čałaviek, jakija paciarpieli ad klaščoŭ.
Čytajcie taksama:
U Baranavičach ludzi zarazilisia kleščavym encefalitam, choć klaščy ich nie kusali
Stała viadoma, jakuju hrupu kryvi najbolš lubiać klaščy
Dva čałavieki akazalisia ŭ reanimacyi ŭ Hrodnie z-za ŭkusaŭ klaščoŭ
