«Imknusia raźviejać stereatypy pra našu krainu». Uradženka Biełarusi raskazała, jak rychtujecca da finału konkursu «Mis Polšča»
U Polščy pačałosia hałasavańnie za najlepšuju ŭdzielnicu nacyjanalnaha konkursu pryhažości Miss Polonia. Pakul jano idzie ŭ sacyjalnych sietkach, a finał šou adbudziecca 28 červienia. U liku finalistak — uradženka Biełarusi Bažena Varona, jakaja prosić biełarusaŭ padtrymać jaje. Most pahavaryŭ ź joj pra dva miesiacy padrychtoŭki da finalnaha šou.
Bažena Varona. Fota ź jaje staronki ŭ instahramie
Miss Polonia — nacyjanalny konkurs pryhažości ŭ Polščy. Na im vybirajuć pradstaŭnicu krainy na mižnarodnych konkursach «Mis Śvietu», «Mis Ziamla», «Mis Hrand Internešnł», «Mis Interkantyniental» i «Mis Začaravańnie». Udzielničać u konkursie Miss Polonia mohuć tolki hramadzianki Polščy, ale Bažena ŭžo atrymała polski pašpart. Jana prajšła kastynh, vyjšła ŭ paŭfinał, a zatym i ŭ finał.
Prajekt z pryznačeńniem
Bažena raskazvaje, što paśla paŭfinału arhanizatary patłumačyli finalistkam, što «ciapier jany ŭžo publičnyja fihury».
«I da hetaha majo žyćcio było davoli aktyŭnym, ale ciapier ja atrymlivaju jašče bolš prapanoŭ ad roznych arhanizataraŭ vystupać na ich mierapryjemstvach. Tamu ciapier u mianie vielmi nasyčany hrafik. Taksama paśla vychadu ŭ finał nam paviedamili, što my pačynajem udzielničać u mierapryjemstvach, dzie kožnaja kankursantka rychtuje prajekt z peŭnym pryznačeńniem. U mianie byŭ cykł Kwadrans dla zdrowia psychicznego («15 chvilin psichałahičnaha zdaroŭja») u ramkach majho padkasta «Oby do poniedziałku». Ja jaho viała razam ź psichołaham Ahnieškaj Čajkoŭskaj-Viendarf. My abmiarkoŭvali aktualnyja psichałahičnyja temy».
Bažena raskazvaje, što jaje misija ŭ tym, kab hramadstva nadavała bolš uvahi nie tolki fizičnamu aśpiektu zdaroŭja, ale i psichičnamu. Jaje prajekt aryjentavany na žančyn.
«Pavyšajučy psichałahičnuju daśviedčanaść i padajučy roznyja formy emacyjnaj padtrymki, my možam dapamahčy žančynam viarnuć pačućcio ŭłasnaj hodnaści i ŭnutranaj siły, jakija časam hublajucca pierad roznymi žyćciovymi ciažkaściami».
Bažena Varona. Fota ź jaje staronki ŭ instahramie
«Vykonvajem pieśni razam»
Taksama Bažena pracavała nad prajektam Korona z głowy: Dźwięki wolności («Karona z hałavy: huki svabody»). Jon źviazany z zachapleńniem dziaŭčyny — śpievami. Biełaruska choča adradzić zabytyja polskija pieśni 1950-70-ch hadoŭ.
«Mahčyma, jany ŭžo nie takija aktualnyja, ale ŭ ich jość duša, šarm i hłyboki sens. My vykonvajem hetyja pieśni razam ź ludźmi ŭ chośpisach, škołach abo na roznych mierapryjemstvach. Heta nie prosta moj vystup, a ahulnyja śpievy, jakija stvarajuć atmaśfieru adzinstva i svabody praz muzyku».
Akramia tvorčych inicyjatyŭ, finalistki pastajanna ŭdzielničajuć u fotasiesijach i zdymkach da hała-finału, jaki adbudziecca 28 červienia.
U mai ŭ finalistak prajšli zdymki-vizitoŭki, dzie jany raskazali pra siabie. U toj dzień kankursantki ŭpieršyniu sustrelisia ŭsie razam. U paŭfinale było 103 udzielnicy, a ŭ finał prajšli 24 kankursantki z roznych krain śvietu.
Dziadula vučyŭsia ź Niemanam
Z červienia arhanizatary konkursu zapuścili ŭ sacyjalnych sietkach hałasavańnie za «Miss Polonia sacyjalnych sietak». Bažena — finalistka pad numaram 11.
«Na kožnaj sustrečy ja starajusia raskazvać pra Biełaruś i jaje histaryčnyja miaściny, padkreślivajučy, što Lida — moj rodny horad — znachodzicca ŭsiaho za 40 kiłamietraŭ ad Navahradka, dzie naradziŭsia Adam Mickievič. Moj dziadula vučyŭsia ŭ adnym kłasie z Česłavam Niemanam. Budučy finalistkaj, ja starajusia raźviejać stereatypy ab našaj krainie i zaprašaju ŭsich paśla konkursu naviedać Biełaruś, kab ubačyć mnostva cikavych miescaŭ».
Biełaruskaja dyjaspara ŭ Polščy moža padtrymać suajčyńnicu, dasłaŭšy SMS na numar 73601 z tekstam MISSPOLONIA.11 (košt — 3,69 złotaha z PDV). Hałasavańnie praciahniecca da 27 červienia. A 28 červienia možna budzie padtrymać Baženu i na finalnym šou, jakoje budzie tranślavacca ŭ pramym efiry. Budzie zapuščana asobnaje hałasavańnie za «Miss Polonia telehledačoŭ».
«Płanuju svaje dziejańni na budučyniu»
Napieradzie ŭ kankursantak pres-kanfierencyja i vyjezd na padrychtoŭku da finału, jaki projdzie ŭ Zakapanym. 14 červienia finalistki adpraviacca na miesca praviadzieńnia, a 26 červienia viernucca ŭ Varšavu na prymierki, bo dla kožnaj udzielnicy buduć šyć indyvidualnyja sukienki i kaściumy.
«Napieradzie nas čakaje nasyčany pieryjad. Vielmi šmat času idzie na konkurs, a na sustrečy ź siabrami i blizkimi praktyčna ničoha nie zastajecca. U hety čas ja zakančvaju ŭniviersitet, i na hetym tydni ŭ mianie abarona dypłoma pa kryminalistycy.
U inšych kankursantak situacyja jašče bolš składanaja. Niekatoryja ź ich pavinny pryjazdžać ź inšych krain, takich jak Anhlija i Šviecyja, dzie jany vučacca. A prylatajuć, kab udzielničać u zdymkach i mierapryjemstvach.
I ŭžo ciapier važna ŭmieć trymać bałans i nie zabyvać, što konkurs rana ci pozna skončycca. Tamu ja pradumvaju i płanuju svaje dziejańni na budučyniu, kab być hatovaj da žyćcia paśla konkursu i nie žyć tolki hetym pieryjadam».
Čytajcie taksama:
Uradženka Lidy vyjšła ŭ finał hałoŭnaha polskaha konkursu pryhažości
Dzie tusić łukašenkaŭskaja moładź? Pje ŭ «Lebiadzinym», adpačyvaje ŭ Paryžy i Miłanie
