«Buduć aryštavanyja sotni ludziej». Pucin zahadaŭ FSB začyścić Minabarony, kab pakarać za pravały va Ukrainie
Biesprecedentnaja kampanija pa aryšcie vysokapastaŭlenych rasijskich hienierałaŭ, jakuju zapuścili siłaviki paśla adstaŭki kiraŭnika Minabarony Siarhieja Šajhu, prachodzić sa zhody Kramla. A jaje najvažniejšaja pryčyna — heta žadańnie śpiecsłužbaŭ sapchnuć na vojska vinu za niaŭdačy va Ukrainie, a taksama atrymać kantrol nad vializnymi biudžetami vajennaha viedamstva, piša The Moscow Times sa spasyłkaj na svaje krynicy.
Fota: Minabarony RF
«Idzie žorstkaja začystka. FSB začyščaje kamandu Šajhu. Heta čakany praces. Siłaviki atrymali dazvoł na samym viersie [u kiraŭnictvie krainy]», — skazała krynica, blizkaja da Kramla.
«Da zaviaršeńnia čystak jašče daloka. Nas čakajuć novyja aryšty», — dadała jana.
Supracoŭniki śpiecsłužbaŭ, adkaznyja za rasśledavańni karupcyi, zjavilisia ŭ kompleksie budynkaŭ Ministerstva abarony na Frunzienskaj nabiarežnaj u Maskvie jašče da taho, jak stała viadoma ab aryšcie namieśnika ministra Cimura Ivanova, adnaho z najbližejšych i daŭnich paplečnikaŭ Šajhu. Pa słovach krynicy, blizkaj da Minabarony, heta adbyłosia ŭ kancy krasavika, heta značyć, kali Šajhu jašče zastavaŭsia ministram, ale ŭžo hublaŭ upłyŭ.
«Ciapier tam [u budynku Minabarony] bolš čekistaŭ, čym vajskoŭcaŭ, mnie zdajecca», — kaža surazmoŭca The Moscow Times.
Za dva tydni paśla zvalnieńnia Šajhu pa kryminalnych spravach, źviazanych z karupcyjaj, byli aryštavanyja ŭžo čatyry vysokapastaŭlenyja hienierały rasijskaha vojska. Uviečary ŭ čaćvier Śledčy kamitet paviedamiŭ ab piatym aryštavanym aficeru.
Razmova moža patencyjna iści ab adnoj z «samych maštabnych čystak» u sučasnaj rasijskaj historyi, i praces tolki nabiraje abaroty, skazaŭ The Moscow Times čynoŭnik rasijskaha ŭrada.
«Ja dumaju, da kanca hoda ahułam pa ŭsich padraździaleńniach Minabarony buduć aryštavany sotni ludziej», — dadaŭ jon.
Pa słovach inšaha čynoŭnika kabmina, materyjałaŭ ab karupcyjnych schiemach u Minabarony zaŭsiody «była kuča», i zavodzilisia kryminalnyja spravy. «Ale pakul Šajhu byŭ ministram i mieŭ vialiki upłyŭ, śledčym nie dazvalali davać im chod», — raspaviadaje surazmoŭca The Moscow Times.
Kampanija, na jakuju FSB atrymała dazvoł u Kramli, pakazvaje, što va ŭmovach vajennaha času ŭ supraćstajańni dźviuch viadučych u Rasii siłavych struktur — armii i FSB — pieramohu atrymlivajuć śpiecsłužby, ličyć krynica, blizkaja da Kramla.
«U pravale ŭvarvańnia vinavaty musić być niechta adzin. Heta ci śpiecsłužby, jakija zajmalisia raźviedkaj i analityčnaj padrychtoŭkaj vajny i abiacali Pucinu tryumfalnuju apieracyju i chutkuju pieramohu. Ale pravalilisia. Albo «druhoje vojska śvietu» pad kiraŭnictvam Šajhu, jakoje pavinna było zabiaśpiečyć Pucinu pieramohu. Ale akazałasia papiarovym tyhram i paciarpieła katastrofu», — tłumačyć surazmoŭca The Moscow Times.
Pa vynikach pierastanovak, jakija paśla inaŭhuracyi na piaty termin zładziŭ Pucin, pasady pazbaviŭsia nie tolki Šajhu, ale i kaardynatar śpiecsłužbaŭ, sakratar Savieta biaśpieki Mikałaj Patrušaŭ. Tym nie mienš, FSB usio ž atrymlivaje pieramohu ŭ hetym supraćstajańni: jana moža atrymać zaachvočvańnie i ŭznaharody za «baraćbu z karupcyjaj» u vyšejšych ešałonach ułady.
«Zadača-maksimum — pastavić svaich ludziej i kantralavać samaje smačnaje, tyja napramki, dzie jość vialikija biudžety, — tłumačyć čynoŭnik urada. — Ci vy surjozna ličycie, što niechta ź ich u hety momant dumaje pra śpiecapieracyju?»
23 maja stała viadoma, što vajskovy sud u Maskvie aryštavaŭ na dva miesiacy načalnika Hałoŭnaha ŭpraŭleńnia suviazi Uzbrojenych sił Rasii — namieśnika načalnika Hienštaba hienierał-lejtenanta Vadzima Šamaryna. SK abvinavačvaje jaho ŭ atrymańni chabaru ŭ pamiery 36 miljonaŭ rubloŭ.
U siaredzinie maja byŭ uziaty pad vartu načalnik Hałoŭnaha ŭpraŭleńnia kadraŭ Minabarony Juryj Kuźniacoŭ pa padazreńni ŭ atrymańni chabaru ŭ pamiery 30,5 młn rub.
A ŭ kancy krasavika, niezadoŭha da sychodu Šajhu z pasady ministra abarony, pa takim ža artykule byŭ aryštavany i adpraŭleny ŭ SIZA namieśnik ministra abarony Cimur Ivanoŭ. Jaho abvinavačvajuć u atrymańni chabaru ŭ pamiery 1,185 młrd rub.
Akramia taho, byli aryštavany były kamandujučy 58-j armijaj Paŭdniovaj vajennaj akruhi hienierał Ivan Papoŭ (jaho abvinavačvajuć u machlarstvie) i kiraŭnik departamienta pa zabieśpiačeńni dziaržzakazu Minabarony Uładzimir Viercialecki.
Čytajcie taksama:
Šolc: Rasija na vajnie va Ukrainie hublaje 24 tysiač čałaviek u miesiac
Makron zaklikaŭ praciahvać padtrymlivać Ukrainu: Mir — heta nie kapitulacyja
Pad Charkavam zahinuŭ były śpiecnazaviec ź Lidy, jaki vajavaŭ na baku Rasii
