Z-za piractva BT UEFA moža pazbavić biełaruski futboł finansavańnia
Biełaruskaja fiederacyja futboła i kłuby, jakija ŭdzielničajuć u jeŭrakubkach, mohuć stracić finansavańnie ad UEFA. Usio heta praz žadańnie Biełteleradyjokampanii skraści tranślacyi matčaŭ čempijanatu Jeŭropy-2024, piša «Tribuna».
Ilustracyjnaje fota: BFF
U studzieni 2023 hoda Saviet Ministraŭ faktyčna ŭzakoniŭ u krainie piractva, dazvoliŭšy nie prymianiać zakanadaŭstva ab aŭtarskich pravach u dačynieńni da kantentu, vyrablenaha «niedružalubnymi krainami» i arhanizacyjami, ź imi źviazanymi.
U pieralik takich arhanizacyj Mininfarm uklučyŭ, naprykład, FIFA, što dazvoliła BT biez dazvołu tranślavać čempijanat śvietu pa plažnym futbole.
U lutym 2024-ha ŭ śpisie Mininfarma źjaviŭsia i UEFA, što namiakaje na žadańnie Biełteleradyjokampanii tranślavać matčy Jeŭra-2024 u Hiermanii. Pra toje, što takija tranślacyi sapraŭdy płanujucca na kanale «Biełaruś 5», raskazali krynicy «Trybuny». Adnak heta moža pryvieści da prablem.
UEFA ŭstupiŭ u pierapisku z BTRK, u jakoj sajuz abiacaje abaraniać svaju intelektualnuju ŭłasnaść. U adkaz na pirackija tranślacyi arhanizacyja pahražaje sankcyjami ŭ dačynieńni da BFF i biełaruskich kłubaŭ.
Tak, UEFA pakidaje za saboj prava ŭ jakaści miery ŭ adkaz pazbavić biełaruskich pradstaŭnikoŭ u jeŭrakubkach pryzavych hrošaj. U Lizie čempijonaŭ krainu ŭ novym siezonie pradstaviać minskaje «Dynama», hrodzienski «Nioman», žodzinskaje «Tarpieda» i «Isłač» ź Minskaha rajona vystupiać u Lizie kanfierencyj.
Takoje rašeńnie UEFA moža nanieści surjozny finansavy ŭdar pa kłubach. U jeŭrakubkach, navat nie dachodziačy da hrupy, biełaruskija kłuby štohod zarablajuć 1,5-2 młn jeŭra.
Akramia taho, UEFA moža pazbavić finansavańnia i Biełaruskuju fiederacyju futboła. Pry hetym pastupleńni ad sajuza źjaŭlajucca asnoŭnym składnikam biudžetu BFF, štohod fiederacyja atrymlivaje ad UEFA 10 młn jeŭra.
Čytajcie taksama:
Z Bałharyjaj pačniem, Bałharyjaj i skončym
Prezident UEFA: Biełaruskaja fiederacyja futboła nie źviazanaja z režymam Łukašenki
