«My rašuča nastrojenyja, što Ukraina pavinna pieramahčy ŭ hetaj vajnie» — Blinkien
Dziaržaŭny sakratar ZŠA Entani Blinkien zajaviŭ, što padtrymka Złučanymi Štatami Ukrainy nakiravanaja na jaje stratehičny pośpiech, i adkrytym tekstam skazaŭ, što Ukraina pavinna atrymać pieramohu ŭ vajnie. Jak paviedamlaje «Jeŭrapiejskaja praŭda», pra heta jon skazaŭ na sumiesnaj pres-kanfierencyi ź ministram zamiežnych spraŭ Ukrainy Dźmitryjem Kulebaj padčas druhoha dnia vizitu ŭ Kijeŭ.
Entani Blinkien. Fota: Brendan Smialowski/Pool Photo via AP
Va ŭstupnym słovie jon padkreśliŭ, što dla ZŠA važna dapamahčy zabiaśpiečyć stratehičny pośpiech Ukrainy.
«My pracujem nad tym, kab Ukraina mahła atrymlivać pośpiechi na poli boju ciapier, abaraniajučysia ad rasijskaj ahresii, kab jana była zdolnaja strymlivać i abaraniacca ad dalejšych napadaŭ, i, hałoŭnaje, harantavać prava ŭkrainskaha naroda vyznačać svaju budučyniu», — skazaŭ dziaržaŭny sakratar ZŠA.
U dalejšych adkazach na pytańni Blinkien niekalki razoŭ adkrytym tekstam skazaŭ pra toje, što Ukraina pavinna atrymać pieramohu ŭ vajnie.
«Złučanyja Štaty addanyja tamu, kab harantavać, što Ukraina pieramoža ŭ vajnie, i heta demanstravałasia praź biesprecedentnuju padtrymku, jakuju my akazali i praciahvajem akazvać… My rašuča nastrojenyja, što Ukraina pavinna pieramahčy ŭ hetaj vajnie i atrymać pośpiech dziela svajho naroda i svajoj budučyni», — zajaviŭ Entani Blinkien.
Taksama padčas bryfinhu jon abjaviŭ, što ZŠA daduć dadatkovyja 2 młrd dalaraŭ u vyhladzie ŭniosku ŭ novastvorany fond, metaj jakoha budzie raźvićcio ŭkrainskaha APK i finansavańnie zakupki zbroi.
U pieršy dzień vizitu Blinkien raskazaŭ, što dvuchbakovaje pahadnieńnie pa biaśpiecy ZŠA z Ukrainaj budzie praduhledžvać vajskovuju dapamohu ŭ roznych śfierach i dapamoža nablizicca joj da siabroŭstva ŭ NATA.
Jon taksama padkreśliŭ układ chaŭruśnikaŭ ZŠA ŭ ekanamičnuju i humanitarnuju dapamohu Ukrainy, jaki, pavodle jahonych słoŭ, utraja pieravyšaje amierykanski.
Čytajcie taksama:
Blinkien u Kijevie schadziŭ na abied u piceryju
