U Mahilovie i Babrujsku pradajuć z aŭkcyjonu handlovyja centry apalnaha biznesmiena
Dva bujnyja handlovyja centry ŭ Mahilovie i Babrujsku vystavili na tarhi za niavypłatu padatkaŭ. Ich uładalnikam źjaŭlajecca handlovy dom «Stralec», jaki naležyć połackamu biznesmienu Uładzimiru Zacharavu. Infarmacyja pra prodažy raźmieščana na sajcie «BiełJurZabieśpiačeńnia».
Handlovy dom «Stralec» u Mahilovie. Fota: arendastrelets.by
Handlovy dom «Stralec» u Mahilovie raźmieščany na vuł. Kaštanavaj, 4. Heta davoli papularnaje miesca z 32 arandatarami, uklučajučy kramy «Jeŭraopt» i «Miła». Za piacipaviarchovy budynak płoščaj 3778,7 kv.m prosiać kala 6,168 młn rubloŭ.
U Babrujsku handlovy centr znachodzicca na vuł. Uljanaŭskaj, 60. Tut dva pavierchi i cokal ahulnaj płoščaj 2678 kv. m. Tam kala 20 arandataraŭ, uklučajučy «Vostraŭ čyścini», «Bielita-Viteks» i inšych. Startavaja cana — kala 3,34 młn rubloŭ.
Tarhi pa hetych dvuch abjektach zapłanavanyja na 30 maja.
Uładzimir Zacharaŭ — adzin z najbujniejšych uładalnikaŭ handlovaj nieruchomaści ŭ Biełarusi. U svoj čas jon uvachodziŭ u top-200 samych upłyvovych biznesoŭcaŭ u krainie. U kancy 2022-ha jon vystaviŭ na prodaž bolš za 30 abjektaŭ nieruchomaści, a ŭ studzieni 2023-ha kampanija «Handlovy dom «Stralec» była zakrytaja, sam ža biznesmien źjechaŭ ź Biełarusi. Krychu paźniej źjaviłasia infarmacyja pra zaviadzieńnie suprać jaho troch kryminalnych spraŭ za niavypłatu padatkaŭ, drabnieńnie biznesu i t. d.
Čytajcie taksama:
Zavočna buduć sudzić połackaha biznesmiena Zacharava
Viadomy połacki biznesmien raspradaje dziasiatki handlovych abjektaŭ pa ŭsioj Biełarusi