Błohier Blišč raskazaŭ, jak nie zmoh patrapić u Saudaŭskuju Araviju, Aman i Kurdystan
Što pasłužyła pieraškodaj?
Aravijski paŭvostraŭ na kratach Google.
Błohier Dzianis Blišč na svaim sajcie raskazaŭ historyju niaŭdałaha padarožža. Jon spadziajecca, što jaho vopyt dapamoža inšym biełarusam, jakija płanujuć naviedać krainy Aravijskaha paŭvostrava.
Pa słovach błohiera, pieršapačatkova jon płanavaŭ z horada Šardža ŭ Arabskich Emiratach palacieć u stalicu Amana Maskat, zatym naviedać Irakski Kurdystan i Saudaŭskuju Araviju, a ŭ kancy — Bachrejn i Katar.
Pry płanavańni pajezdki jon źviarnuŭ uvahu na prastatu atrymańnia vizaŭ. Bachrejn vydaje elektronnuju vizu praź niekalki dzion paśla zvarotu. Katar vydaje pa prybyćci. U Arabskija Emiraty i Aman dla biełarusaŭ biaźvizavy ŭjezd.
Sproba atrymać vizu ŭ Saudaŭskuju Araviju
Vizu ŭ Saudaŭskuju Araviju Blišč pasprabavaŭ atrymać u pasolstvie Karaleŭstva ŭ Tbilisi (Hruzija), dzie jon ciapier znachodzicca. I tut pačalisia składanaści. Jak piša błohier, pasolstva jaho nakiravała ŭ vizavy centr. Tam jamu patłumačyli, što biez dazvołu na žycharstva ŭ Hruzii dakumienty pryniać nie mohuć.
I heta vyhladaje dziŭnym. Jak adznačaje błohier, pasolstva Saudaŭskaj Aravii niama ŭ Biełarusi, tamu dla atrymańnia vizy nieabchodna jechać, naprykład, u susiedniuju Rasiju. Dziela cikaŭnaści jon napisaŭ u adnu z turfirmaŭ Rasii. Adtul jamu adkazali, što biełarusam nie dapamahajuć.
Ale na hetym błohier nie spyniŭsia. Pošuk u internecie padkazaŭ, što Saudaŭskaja Aravija vydaje biaspłatnyja tranzitnyja vizy na 96 hadzin usim žycharam płaniety, jakija majuć bilet ich nacyjanalnych avijakampanij ci aformili zapyt na śpiecyjalnym sajcie. Nieabchodnaja jašče strachoŭka, nabytaja ŭ Saudaŭskaj Aravii.
Jak piša błohier, na sajcie paznačana, što termin razhladu zapytu składaje ad niekalkich chvilin da niekalkich sutak. Ale pa fakcie, jak piša błohier, jaho zapyt ad 4 sakavika tak i praciahvaje znachodzicca ŭ statusie «na razhladzie».
Viza ŭ Irakski Kurdystan
Irakski Kurdystan maje šyrokaje samakiravańnie i vydaje svaje ŭłasnyja vizy. Jak daviedaŭsia błohier, na sajcie elektronnych viz hetaj aŭtanomii biełaruski pašpart byŭ pryznany jak prydatny dla atrymańnia vizy.
Blišč pačaŭ afarmlać zajaŭku na sajcie i ŭ kancy vyśvietliłasia, što ŭładalnikam pašpartoŭ z «Śpisu B» (kudy ŭvachodzić i biełaruski pašpart) nieabchodna paznačyć «reference number» — paručalnictva ad miascovaj turkampanii ci advakatury ŭ vyhladzie śpiecyjalnaha numaru, jaki jany atrymlivajuć u miascovych uładaŭ z uniasieńniem zakładu za turysta.
Błohier znajšoŭ niekalki kampanij, jakija byli hatovyja jamu dapamahčy. Ale ŭ vyniku z-za adklučanaj u krainie sistemy Western Union tak i nie zmoh apłacić pasłuhu. A z kryptavalutaj nichto nie zachacieŭ zajmacca.
Nie puścili ŭ Aman
Błohier skarektavaŭ svaju pajezdku i vylecieŭ u Šardžy. I tam jaho čakała samaje kryŭdnaje. Mužčynu ź biełaruskim pašpartam nie pasadzili na samalot u Aman, patłumačyŭšy, što nieabchodna viza dla naviedańnia hetaj krainy. Nasamreč viza dla biełarusaŭ (jak i rasijan) nie patrebna, ale pamiežniki ŭ AAE ab hetym nie viedajuć.
Pa słovach Blišča, doŭhija razmovy ź mieniedžaram na stojcy rehistracyi skončylisia ničym. «Jon zvaniŭ u Aman, adsyłaŭ fotku pašparta niekudy i ŭ vyniku admoviŭ u pasadcy», — piša błohier.
U vyniku Blišč palacieŭ u Iran, dzie pravioŭ tydzień i zastaŭsia zadavoleny hetaj krainaj. Ale heta ŭžo inšaja historyja.
Čytajcie taksama:
Błohier Blišč: «Najvialikšaja duraść, jakuju prydumali milenijały, — vyharańnie». Jamu adkazali
Šenhien dla biełarusaŭ: mahčymyja varyjanty, košt pytańnia i historyi z žyćcia
U jakija krainy biełarusy mohuć adpravicca na adpačynak bieź vizy? Śpis vialiki, ale jość niuansy
