Śviatara z-pad Biełharada aryštavali za zabojstvy ŭ 1990-ja
Jak śćviardžaje śledstva, śviatar maje šyrokija złačynnyja suviazi ŭ kryminalnym asiarodździ i nieadnarazova ŭdzielničaŭ u ździajśnieńni asabliva ciažkich złačynstvaŭ.
Śviatar Stanisłaŭ Dziemianciejeŭ. Darečy, u pačatku 2010-ch jon aktyŭna repościŭ dopisy Alaksieja Navalnaha
Jak paviedamlaje vydańnie «Kommiersant'», Śledčy kamitet Rasii razhladaje kryminalnuju spravu, fihurantami jakoj źjaŭlajucca śviatar Stanisłaŭ Dziemianciejeŭ i vajskoviec Ihar Sialucin. Jašče adzin ich padzielnik užo zahinuŭ na froncie.
Pa viersii śledstva, jany źjaŭlalisia ŭdzielnikami arhanizavanaj kryminalnaj hrupoŭki, jakaja była stvorana jašče ŭ kancy 1980-ch-pačatku 1990-ch hadoŭ ź liku žycharoŭ Hubkinskaha rajona Biełharodskaj vobłaści Rasii. Złačynstvy, u tym liku zakaznyja zabojstvy i vykradańni ludziej, hrupoŭka ździajśniała z 1997 pa 2017 hady.
Niepasredna Dziemianciejeŭ i Sialucin abvinavačvajucca ŭ zabojstvie dvuch i bolš čałaviek (častka 2 artykuła 105 Kryminalnaha kodeksu Rasii), jakija byli ździejśnieny ŭ kancy 1990-ch.
Jak paviedamlaje vydańnie, Ihara Sialucina abvieścili ŭ mižnarodny vyšuk, ale znajšli na froncie, dzie byŭ snajpieram i nieadnarazova adznačaŭsia kamandavańniem za bajavyja pośpiechi.
Ihar Dziemianciejeŭ, jaki paśla chryščeńnia atrymaŭ imia Jaŭstafij, źjaŭlajecca śviatarom Hubkinskaj jeparchii Ruskaj pravasłaŭnaj carkvy. U jeparchii žurnalistam paviedamili, što baciuška časova ździajśniaŭ nabaženstvy ŭ chramie siała Bielanichina Procharaŭskaha rajona Biełharodskaj vobłaści.
Jak paviedamlajecca, Maskoŭski haradski sud adchiliŭ skarhu na aryšt fihurantaŭ kryminalnaj spravy, zajaviŭšy, što abvinavačanyja vałodajuć šyrokimi złačynnymi suviaziami ŭ kryminalnym asiarodździ, tamu ŭ vypadku admieny abranaj miery strymańnia mohuć schavacca ad kryminalnaj adkaznaści.
Čytajcie taksama: