«Pasłuhi prastytutak i darahija hadzińniki». Kiraŭnik Mižnarodnaha sajuza bijatłanistaŭ byŭ padkupleny Rasijaj
Były prezident Mižnarodnaha sajuza bijatłanistaŭ Anders Beseberh atrymaŭ u Narviehii turemny termin. Za što jamu płaciła Maskva?
Anders Beseberh u 2009 hodzie. Fota: AP Photo/ Lee Jin-man
Jak paviedamlaje narviežskaja dziaržaŭnaja teleradyjokampanija NRK, narviežski sud razhledzieŭ materyjały spravy 77-hadovaha Andersa Beseberha (Anders Besseberg), byłoha prezidenta Mižnarodnaha sajuza bijatłanistaŭ (IBU). Hety post narviežac zajmaŭ bolš za čverć stahodździa — z 1993 pa 2018 hod.
Beseberh byŭ vymušany pakinuć svaju pasadu pa abvinavačańni ŭ karupcyi ŭ 2018 hodzie. U asnovie jaho była infarmacyja byłoha kiraŭnika Maskoŭskaj antydopinhavaj łabaratoryi Ryhora Rodčankava, jaki ŭciok u ZŠA, ab tym, što Beseberh dapamahaŭ chavać stanoŭčyja dopinh-proby rasijskich bijatłanistaŭ.
Tady ž u domie Beseberha byŭ praviedzieny pieratrus, a sam jon byŭ dastaŭleny na dopyt. U domie spartyŭnaha funkcyjaniera była znojdziena kalekcyja z 13 hadzińnikaŭ luksavych brendaŭ. Jon zmoh rastłumačyć pachodžańnie tolki piaci ź ich.
Akramia materyjałaŭ dopytu abvinavačańnie zasnoŭvajecca na dakumientach pravierki IBU źniešniaj kamisijaj, praviedzienaj u studzieni 2021 hoda. Śledstva vyvučyła pakazańni infarmataraŭ, pratakoły pieratrusaŭ, praviedzienych aŭstryjskaj i narviežskaj palicyjaj, a taksama spravazdaču Suśvietnaha antydopinhavaha ahienctva (WADA).
Na asnovie vyvučeńnia bolš za 70 dakumientaŭ Beseberhu ŭ 2023 hodzie vystavili abvinavačańnie ŭ karupcyi i atrymańni chabaraŭ.
Śledčyja śćviardžajuć, što kiraŭnik IBU u pieryjad z 2009 pa 2018 hod prymaŭ u padarunak raskošnyja hadzińniki, ekskluziŭnyja pajezdki na palavańnie, biaspłatna karystaŭsia pieradadzienym u lizinh aŭtamabilem u abmien na svajo maŭčańnie, a taksama maŭčańnie byłoha hienieralnaha sakratara IBU niemki Nikol Reš pa spravach ab dopinhu ŭ rasijskim bijatłonie.
Śledstva dapuskaje, što Beseberh taksama moh vykarystoŭvać svoj upłyŭ na vykankam IBU, kab harantavać udzieł rasijskich spartsmienaŭ u zimovych Alimpijskich hulniach u Pchiončchanie ŭ 2018 hodzie i vybary Ciumieni jak miesca praviadzieńnia čempijanatu śvietu 2021 hoda pa bijatłonie.
Jak vynikaje z materyjałaŭ spravy, Beseberha ŭ jaho pajezdkach u Rasiju pad vyhladam pierakładčycy časta supravadžała vydzielenaja rasijskim bokam prastytutka. Funkcyjanier pryznaŭsia, što atrymaŭ ad byłoha vykanaŭčaha dyrektara Sajuza bijatłanistaŭ Rasii Siarhieja Kuščanki hadzińnik Omega (koštam kala $18 tys.), a ad čatyrochrazovaha alimpijskaha čempijona Alaksandra Cichanava — hadzińnik Ulysses Nardin ($3,6 tys.).
Sud taksama abvinavaciŭ Beseberha ŭ tym, što ŭ 2013 hodzie pad vyhladam pajezdki ŭ Ciumień dla ahladu stadyjona, jon znachodziŭsia tam na palavańni. U 2018 hodzie, kali hety horad byŭ kandydatam na praviadzieńnie čempijanatu śvietu pa bijatłonie, pajezdka na palavańnie paŭtaryłasia.
Akramia hetaha, Beseberh ździejśniŭ šerah pajezdak na palavańnie ŭ Aŭstryju i Čechiju. Jany byli prafinansavanyja kampanijami i klučavymi ludźmi, jakija zaklučyli markietynhavyja damovy z IBU. A vydatki na lizinh aŭtamabila BMW 2011 koštam kala 80 tysiač dalaraŭ uziała na siabie miedyjakampanija Infront.
Sam Beseberh usie šeść hadoŭ admaŭlaŭ abvinavačańni ŭ karupcyi, choć i pryznaŭ, što karystaŭsia pasłuhami prastytutak, jakim sapraŭdy nie płaciŭ.
U hetuju piatnicu były prezident Mižnarodnaha sajuza bijatłanistaŭ byŭ pryznany vinavatym pa spravie ab karupcyi pa vaśmi punktach abvinavačańnia. Sud pryhavaryŭ jaho da 3 hadoŭ i 1 miesiaca turemnaha źniavoleńnia.
Čytajcie taksama:
Rodčankaŭ u intervju Bi-bi-si źjaviŭsia ŭ mascy: Kali patrebna była kaardynacyja, padklučałasia FSB
«Jeŭropa vyhnała špijonaŭ Uładzimira Pucina. Ciapier jany viartajucca» — The Financial Times
