Čakać pryjšłosia paŭtary hadziny, a śniadanki skončylisia: błohierka raspaviała, jak schadziła ŭ novaje minskaje kafe
U stalicy naprykancy sakavika źjaviłasia novaje kafe Bistroteka, dzie za 20 rubloŭ na čałavieka možna sabrać set z čatyroch straŭ. Śniadankami abiacajuć karmić uvieś dzień. Što pra heta miesca dumajuć minčuki?
Interjer novaha kafe Bistroteka. Fota: instahram kafe
Fud-ahlad Bistroteka źniała błohierka, jakaja padpisana ŭ tyktoku jak margo_kep.
— U niadzielu ŭ 12 hadzin dnia my nie zmahli tudy patrapić, tamu što była poŭnaja pasadka. Pačakali paŭtary hadziny i nas puścili pajeści.
Dziaŭčynie spadabałasia toje, što im adrazu prynieśli biaspłatnuju vadu.
— Nadyšoŭ čas užo ŭsim uvieści biaspłatnuju vadu. Ja nie chaču tracić hrošy na jaje. Tamu dziakuj.
U Bistroteka abiacajuć padavać haściam śniadanki ŭvieś dzień (da 22 hadzin), adnak błohiercy skazali, što jany ŭžo skončylisia, i prapanavali vybrać łanč. Zhodna z kancepcyjaj kafe, u ich za 20 rubloŭ možna vybrać set z čatyroch roznych straŭ — kožnaja dadatkovaja budzie kaštavać 5 rubloŭ.
— Akiej, 20 rubloŭ-čelendž: ja ŭziała krem-sup, jałavičnyja ščočki, bulbačku i zialonuju sałatu. Ja ŭ cełym zadavolenaja: usio śviežaje, smačnaje, raznastajnaje, jakasnaje. Adzinaje, moža być, chaciełasia b, kab ščočki bolš razvalvalisia.
Chłopiec błohierki zamoviŭ sup z tamataŭ, łazańniu, kurania z sousam kary i rymskuju picu — atrymałasia 25 rubloŭ. Jon zastaŭsia całkam zadavoleny.
Za dva dni videa nabrała kala 422 tysiač prahladaŭ i amal 20 tysiač łajkaŭ. U kamientaryjach ździŭlajucca, što ŭ 2024 hodzie takija ceny jašče isnujuć. Chacia, kaniešnie, niechta aburajecca tym, što ŭ stałoŭcy možna i bolš tanna pajeści: «45 rubloŭ za adzin pryjom ježy! U stałoŭcy za hetyja hrošy moža jeści 9 čałaviek — i ŭ boj pracavać».
Čytajcie taksama:
Na pieršym paviersie HUMa adkryłasia kaviarnia ź vidam na horad i pirožnymi pa 3,5 rubla
Minskaje kafe ŭniesła dziaŭčynu ŭ čorny śpis — pryčyna niestandartnaja
