«Žyćcio ŭ Dublinie na adnaho kaštuje minimum 4167 jeŭra na miesiac». Biełaruska raskazvaje, jak užo 6 hadoŭ žyvie ŭ Irłandyi
Kaciaryna Łysionak upieršyniu źjechała ź Biełarusi, kali joj było jašče 16 hadoŭ. Tady jana pajechała pa prahramie abmienu ŭ ZŠA na hod. Ciapier žančynie 37, jana pracuje ŭ Google i apošnija 6 hadoŭ žyvie ŭ irłandskim Dublinie. CityDog.io vyrašyŭ bližej paznajomicca z Kaciarynaj i pahutaryŭ pra žyćcio ŭ Irłandyi, pra pierajezdy i pracu ŭ adnoj z samych viadomych kampanij śvietu. A jašče — pra hłabalnych biełarusaŭ i toje, jak jany mohuć palepšyć budučyniu krainy.
Pra žyćcio ŭ Irłandyi i pierajezdy: «Žyllovy kryzis sapraŭdy surjoznaja prablema ŭ krainie»
Pierad tym jak zastacca ŭ Irłandyi, Kaciaryna źmianiła nie adno miesca žycharstva. Naprykład, paśla viartańnia z ZŠA ŭ Biełaruś dziaŭčyna praviała hod u Minsku, a potym pastupiła ŭ Mižnarodny ŭniviersitet LCC u Litvie. Tam jana žyła nastupnyja 6 hadoŭ, skončyła bakałaŭryjat i pačała pracavać u brytanskaj daśledčaj kampanii Euromonitor International.
— Potym ja viarnułasia ŭ Minsk prykładna na hod, kab pracavać u Promwad u śfiery raźvićcia biznesu. A zatym znoŭ pierajechała ŭ Vilniu, dzie pačała vučycca ŭ mahistratury, i viarnułasia ŭ Euromonitor.
Praz paru hadoŭ moj muž padaŭsia na pasadu ŭ Google Ireland. Jon pierajechaŭ tudy. Ja skončyła vučobu, padała zajaŭku na pasadu mieniedžarki pa raźvićci partniorstvaŭ u Google i dałučyłasia da kampanii ŭ Dublinie. Tamu asnoŭnaj pryčynaj pierajezdu stali pracoŭnyja mahčymaści dla nas abaich.
My prapracavali ŭ Google paru hadoŭ, a potym zvolnilisia i pierajechali ŭ Novuju Ziełandyju. Spačatku ja raźvivała zapał da fatahrafii, ale mianie znajšli rekruciory Yahoo NZ — i ja pačała pracavać tam. My daśledavali rehijon, u peŭny momant vyrašyli, što nie chočam zastavacca tam doŭhaterminova, — i ja padała zajaŭki na pasady ŭ Jeŭropie.
Mnie pašancavała atrymać pasadu ŭ Google, dałučyŭšysia da ich kamandy prodažaŭ u Vialikabrytanii i Irłandyi. Voś tak my viarnulisia ŭ Dublin 6 hadoŭ tamu i pakul zastajomsia tut.
— Vy tak časta pierajazdžali. Mabyć, z kožnym razam adaptacyja davałasia ŭsio lahčej? Ci ja pamylajusia?
— Kali brać ahułam, ja žyła ŭ ZŠA kala dvuch hadoŭ, u Litvie — amal vosiem hadoŭ, u Novaj Ziełandyi — dva hady, a ŭ Irłandyi — kala vaśmi hadoŭ u ahulnaj kolkaści. Darosłaj ja pražyła ŭ Biełarusi tolki dva hady.
Emihracyja zaŭsiody składanaja, niezaležna ad taho, kolki razoŭ vy pierajazdžajecie. My ŭdaskanalili pracesy i viedajem, čaho čakać, ale ŭsio roŭna kožny raz heta ciažki dośvied.
Ja zaŭsiody rekamienduju ludziam pračytać bolš pra cykł adaptacyi ekspataŭ, kab padrychtavacca da taho, što budzie. Typovyja fazy cykłu adaptacyi: padrychtoŭka, «miadovy miesiac», kulturny šok i adaptacyja. U siarednim patrabujecca dva hady, kab pryvyknuć da novaj krainy, i samyja składanyja miesiacy — ad 9-ha da 18-ha.
Ale važna pamiatać, što z pravilnym padychodam i časam usio naładzicca. I heta narmalna — adčuvać siabie nienarmalnym i zmahacca ź ciažkaściami. Emihracyja — składany prajekt.
— Raskažycie krychu pra Irłandyju: jak vy sami jaje adčuvajecie? Ci byli jakija-niebudź składanaści, ź jakimi sutyknulisia?
— Irłandyja — moj treci dom: pieršy — Biełaruś, druhi — Litva. Adnak moj dośvied mocna abumoŭleny pracaj u hłabalnaj technałahičnaj kampanii.
U našym ofisie pracuje bolš za 7000 čałaviek — i tam stvoranyja ŭsie mahčymyja ŭmovy: ad miedycynskaha centra da banka i spartzały. Tamu mnie było praściej adrazu znajści svaju supołku siabroŭ, ź jakimi my siabrujem užo dziesiać hadoŭ. Da taho ž anhlijskaja mova akazałasia lahčejšaj dla adaptacyi, čym litoŭskaja, tamu i z administracyjnymi dy biurakratyčnymi pytańniami było praściej spravicca.
Ja nie vielmi dobra znajomaja z paŭsiadzionnym žyćciom u Irłandyi, ale mahu dakładna skazać, nakolki pryjaznaj kraina akazałasia da ekspataŭ. Ciapier u ŚMI šmat navin, jakija pakazvajuć roznyja mierkavańni, ale amal za 10 hadoŭ u Irłandyi ja nikoli nie čuła nivodnaha ksienafobskaha abo antyimihranckaha vykazvańnia ŭ svoj adras. Častkova ja tłumaču heta historyjaj Irłandyi, dzie amal u kožnaj siamji jość svaja historyja imihracyi z-za ciažkaściaŭ u minułym.
— Ci doraha žyć u Irłandyi? Kolki prykładna treba vydatkoŭvać na pradukty, pobyt, zabavy, kab adčuvać siabie bolš-mienš kamfortna?
— Dublin ličycca adnym z samych darahich haradoŭ Jeŭropy, hałoŭnym čynam z-za niedastupnaści arendnaha žylla.
Siaredniaja arendnaja płata ŭ Dublinie pieravyšaje 2300 jeŭra. Košt na žyllo na 88% vyšejšy za siaredni pa ES. Pry hetym poŭnapracoŭnyja rabotniki ŭ Irłandyi ŭ siarednim zarablajuć 3683 jeŭra ŭ miesiac da vypłaty padatkaŭ. Žyllovy kryzis źjaŭlajecca sapraŭdy surjoznaj prablemaj u krainie.
Raźlikovyja štomiesiačnyja vydatki siamji z čatyroch čałaviek składajuć 3781 jeŭra, adzinokaha čałavieka — 1093 jeŭra. I heta ŭsio biez uliku arendnaj płaty. Taksama Irłandyja maje druhi samy darahi hramadski transpart u Jeŭropie, a ceny na hateli i restarany na 29,5% vyšejšyja za siaredniejeŭrapiejskija. Heta daje peŭnaje ŭjaŭleńnie pra toje, nakolki tut doraha.
Uvohule pytańnie hrošaj vielmi subjektyŭnaje, i ŭzrovień kamfortu budzie zaležać ad taho, što mienavita patrabujecca, kab adčuvać siabie kamfortna. Naprykład, dohlad za dziećmi ŭ Irłandyi vielmi darahi, tamu vam treba budzie dadać u siarednim jašče 1300 jeŭra ŭ miesiac na dzicia za dziciačy sadok.
Kali vy žyviacie ŭ Dublinie sami, vam spatrebicca jak minimum 50 000 jeŭra na hod (4167 jeŭra na miesiac) da vypłaty padatkaŭ, kab žyć. Dla siamji z troch čałaviek dobrym zarobkam była b suma ŭdvaja bolšaja: kala 90 000 — 100 000 jeŭra.
Pra pracu ŭ Google: «Ja nikoli asabliva nie cikaviłasia karjernaj leśvicaj»
— Jak i kali vy pačali pracavać u Google? I jak naohuł vy pryjšli ŭ HR?
— Ja pačynała ŭ jakaści mieniedžarki pa partniorskich adnosinach u vydavieckim adździaleńni Google (Online Publishing Group). Mnie daviałosia pracavać z rehijonam SND i stać pieršym čałaviekam, jaki ŭstanaviŭ niekatoryja premijalnyja kantrakty na manietyzacyju. Heta byŭ cudoŭny dośvied.
U cełym praces najmu ŭ Google vielmi prazrysty i padrabiazna apisany na karjernym sajcie: jak padrychtavać reziume, čaho čakać na sumoŭjach i hetak dalej. Tam jość usia nieabchodnaja infarmacyja, jakaja moža dapamahčy ŭsim kandydatam padrychtavacca jak maha lepš.
Maja karjernaja trajektoryja ŭ Google zusim nie liniejnaja, ja nikoli asabliva nie cikaviłasia karjernaj leśvicaj. Mianie bolš cikaviła adkryćcio roznych mahčymaściej: mienavita tak ja źmianiła piać kamandaŭ u Google. Pracavała ŭ śfiery partniorstva z SND, u account management ź Vialikabrytanijaj i Irłandyjaj, kansultantkaj pa raźvićci kamandy i ŭnutranaj trenierkaj, kiravała kamandaj pa HR-apieracyjach, a ciapier pracuju mieniedžarkaj stratehičnych HR-prahram. I mnie heta vielmi padabajecca.
Ja dumaju, što heta byŭ vielmi pravilny vybar na maim šlachu — pierachod sa śvietu prodažaŭ u HR. Adnak ja sumuju pa sustrečach z klijentami, kamandziroŭkach i bonusach ad prodažaŭ (uśmichajecca).
— A ŭ čym ciapier zaklučajecca vaša praca?
— Jak mieniedžarka stratehičnych HR-prahram ja maju dźvie častki svajoj raboty: pracu ź ludźmi ŭ jakaści HR-partniorki/coach i pracu z pracesami/prajektami/change management. Heta najlepšaja kambinacyja dla mianie, jakaja dazvalaje atrymać najmacniejšy prafiesijny dośvied: praca ź ludźmi i raźvićcio adnosin, praca z ahulnaj karcinaj, analiz danych i stratehija.
Abodva typy pracy majuć svaje pieravahi i składanaści. Pastajannaje navučańnie — heta toje, što dapamahaje stać lepš. Nie dumaju, što ja kali-niebudź pierastavała vučycca z momantu atrymańnia majoj pieršaj stupieni mahistarki. Ja skončyła druhuju mahistraturu ŭ Dublinie, a ciapier pracuju nad kandydackaj dysiertacyjaj pa lidarskim raźvićci/koŭčynhu. I zusim niadaŭna ja padała zajaŭku na atrymańnie siertyfikata Six Sigma Green Belt dla majoj raboty z pracesami i prajektami.
— Mnie zdajecca, ad takoha tempu chočaš nie chočaš, a budzieš adčuvać stomlenaść i emacyjnaje vyharańnie. Jak vy adnaŭlajeciesia?
— Pa-za miežami majoj asnoŭnaj pracy ja taksama pracuju prafiesijnym karjernym koŭčam. I jak koŭč ja vyvučała, jak kłapacicca pra siabie, jak źmiaščać emacyjnyja nahruzki i jak raźvivać miechanizmy pieraadoleńnia stresu.
Ja pracuju sa svaim supiervajzieram u koŭčynhu, jaki dapamahaje mnie. Ale ŭ asnoŭnym ja zasiarodžvajusia na tym, kab pravilna zakłaści asnovy: son, ježa, fizičnyja nahruzki.
Akramia taho, u mianie ŭžo šmat hadoŭ vielmi strohija miežy pamiž pracaj i asabistym žyćciom. Raniej ja pracavała zvyšuročna ci pa vychadnych, ale apošnija 10 hadoŭ pačynaju pracu svoječasova i zakančvaju svoječasova, pry hetym zaŭsiody rablu poŭny pierapynak na abied. A jašče ŭ mianie jość kamanda, jakaja padtrymlivaje mianie: moj muž, moj sabaka, maje siabry, moj terapieŭt i moj koŭč.
Pra hłabalnych biełarusaŭ: «Dziakujučy svaim viedam, dośviedu i šyrokim pohladam jany mohuć istotna dapamahčy Biełarusi»
— Ciapier možna pačuć słovazłučeńni «hłabalnyja ludzi», «hłabalnyja biełarusy». Što treba razumieć pad hetym?
— Nu, časta tak nazyvajuć biełarusaŭ, jakija źjechali za miažu. Ale ja z hetym nie vielmi zhodnaja. Kudy važniej, što ŭ čałavieka ŭ hałavie, a nie dzie jon žyvie. Bo što takoje hłabalnaje myśleńnie? Heta kali ty dobra razumieješ i pavažaješ roznyja kultury, adkryty da inšych ludziej i dumak, kali ŭmieješ prystasavacca da novaha asiarodździa.
Takija ludzi spakojna pracujuć ź ludźmi z usiaho śvietu, jany ŭmiejuć kamunikavać ź inšaziemcami, razam vyrašać prablemy. Jany nie bajacca raznastajnaści, lubiać mižnarodnyja prajekty i ŭmiejuć karystacca suśvietnymi sietkami i resursami.
Tamu hłabalny biełarus ci biełaruska — heta čałaviek z takim voś śvietapohladam, niezaležna ad taho, žyvie jon (jana) u Biełarusi ci nie.
— A jak hłabalnyja biełarusy mohuć dapamahčy Biełarusi palepšyć jaje budučyniu?
— Hłabalnyja biełarusy dziakujučy svaim viedam, dośviedu i šyrokim pohladam mohuć istotna dapamahčy Biełarusi ŭ samych roznych śfierach.
Naprykład, u śfiery adukacyi heta moža być supracoŭnictva z univiersitetami, anłajn-kursy i padtrymka reformaŭ. U biznesie hłabalnyja biełarusy mohuć inviestavać u startapy, stvarać pracoŭnyja miescy i realizoŭvać sumiesnyja prajekty. U palitycy jany mohuć łabiravać intaresy Biełarusi i padtrymlivać reformy. U achovie zdaroŭja heta mohuć być kansultacyi, stažyroŭki, abmien dośviedam i humanitarnaja dapamoha. U technałohijach supracoŭnictva moža ažyćciaŭlacca ŭ raspracoŭcy praduktaŭ, tranśfiery technałohij i adkryćci centraŭ daśledavańniaŭ.
Akramia taho, hłabalnyja biełarusy mohuć spryjać zachavańniu kultury, raźvićciu hramadzianskaj supolnaści i mižnarodnaj salidarnaści.
Kab źmieny ŭ Biełarusi tryvali, ruch hłabalnych biełarusaŭ pavinien abjadnoŭvać ludziej z roznym dośviedam, u tym liku moładź i dziaciej, znachodzić lidaraŭ u roznych biełaruskich supołkach i zhurtoŭvać ich dla stvareńnia ahulnaha bačańnia i metaŭ. Hety ruch pavinien mieć mocnuju ideju i brend, jakija buduć natchniać ludziej na doŭhi čas, a nie tolki na karotki paryŭ, jakija buduć vykarystoŭvać siłu supolnaści.
Nam treba prapanoŭvać roznyja mahčymaści dla ŭdziełu, nam treba adyści ad čorna-biełaha myśleńnia i zaachvočvać raznastajnaść dumak.
Čytajcie taksama:
16 biełarusak, na jakich varta padpisacca ŭ sacsietkach, kab adukoŭvacca
