Barak Abama, prezident i miuzikł
Novy vitak abamanii: u Niamieččynie pastavili miuzykł pavodle prezidenckaj bijahrafii.
Na Baraka Abamu, jaki pierabyŭ na pasadzie prezidenta ZŠA jaki hod, usio syplucca i syplucca dabroty: jon atrymaŭ Nobieleŭskuju premiju miru, z dnia jaho naradžeńnia ŭ niekatorych akruhach štatu Ałabama zrabili dziaržaŭnaje śviata, i voś pryśpieła čarha miuzikła, zroblenaha pavodle žyćciapisu pieršaha čornaha prezidenta Amieryki.
«Nadzieja! Muzyčny apovied pra Baraka Abamu» -- hetak nazyvajecca miuzikł, jaki pakažuć u Niamieččyny ŭžo na nastupnym tydni. Pastanoŭkau pradstaviać śpiarša ŭ Frankfurcie. Jana raskaža pra 20 apošnich hadoŭ z žyćcia Baraka Abamy. Historyja raspaviadajecca z vusnaŭ šarahovych čykahcaŭ, jakija z zachapleńniem nazirajuć za čornaskurym palitykam, jaki prynosić istotnyja źmieny i novyja pavievy śpiarša ŭ hramadskaje žyćcio Čykaha, a potym — i ŭsioj Amieryki.
U miuzikle prahučać kampazicyi ŭ styli soŭł, hośpieł, chip-chop i viadoma, rokavyja napievy. U šmat jakich tekstach pieśniaŭ buduć vykarystoŭvacca słohany ź pieradvybarčaj honki. Navat samu nazvu NORIE! («Nadzieja!») dramaturhi pryŭłaścili sa znakamitaha, vytrymanaha ŭ sinie-čyrvonaj palitry, pieradvybarčaha płakata Abamy. Stvaralniki miuzykła kažuć, što ŭ pastanoŭcy prahučać čullivyja partyi Baraka i jahonaj žonki Mišel, a taksama duet pamiž prezidentam i dziaržsakratarkaj Chiłary Klintan. Navat spabornik Abamy na vybarach, Džon Makkiejn razam sa svajoj partniorkaj Saraj Pejlin, atrymali svajo ŭvasableńnie ŭ pastanoŭcy. Miuzikł — dźviuchmoŭny: aktory buduć pramaŭlać i śpiavać pa-anhielsku i pa-niamiecku.
Ale ž pradusary, vidać, mocna dumajuć, ci varta šumu ŭsia abłava — i pakul što pradajuć kvitki tolki na premjeru (košt kvitka ŭ Siecivie: 49-150 jeŭraŭ).
«My šmat repietujem, pa 12 hadzin u dzień, ale nam samim pakul nieviadoma, ci budzie pastanoŭka mieć praciah u vyhladzie hastrolaŭ, — skazaŭ u intervju aktor Džymi Uiłsan, jaki ŭvasablaje ŭ miuzikle amierykanskaha prezidenta, — Tak što pakul čakajem premjery, a tam pabačym».
Čamu mienavita Niamieččyna? U adroźnieńnie ad samich Štataŭ, dzie papularnaść Abamy, dziakujučy jaho ścipłym pośpiecham u spravie davańnia rady ekanamičnamu kryzisu, za apošni čas istotna źniziłasia, u FRN abamanija pa-raniejšamu ŭ mocy, na jakuju paŭpłyvaŭ pazaletašni pałki vystup Abamy pierad 20 tysiačami niemcaŭ u samym centry Bierlinu, a taksama efiektnaje źjaŭleńnie jaho padnačalenaj, Chiłary Klintan na śviatkavańni 20-hodździa padzieńnia Bierlinskaha muru.
