«Para zaŭsiody była vietlivaj». Źjavilisia novyja fakty pra źniknieńnie i zabojstva ŭ Niamieččynie ŭkrainskich mamy i babuli
Bild raskazaŭ novyja padrabiaznaści vykradańnia piacitydniovaj dziaŭčynki ŭ niamieckim Chakienchajmie i zabojstva jaje ŭkrainskich mamy i babuli.
Ilustracyja Bild
Dzicia było znojdziena ŭ domie pary ŭ cichim žyłym rajonie na ŭskrainie Zandchaŭziena. Heta niemiec Marka A. (44 hady), jaki pracuje ŭ miasnoj kramie, i jaho žonka ruskaha pachodžańnia Ina (43 hady).
Niekalki miesiacaŭ jany adkryta kazali susiedziam i kaleham pa pracy ab budučym «naradžeńni» dački. Pry tym, što ŭ ich užo jość troje synoŭ.
«Jon z honaram pakazaŭ mnie ružovuju šapačku dla dziciaci. Ja ŭsio jašče była ździŭlena, tamu što jaho žonka ŭvohule nie vyhladała ciažarnaj. Ale ja nikoli nie čakała takoha złačynstva. Para zaŭsiody była vielmi vietlivaj i zdavałasia miłaj», — kaža susiedka.
Inšy susied raskazaŭ, što paru zatrymlivała cełaja hrupa zachopu.
«U sieradu ŭviečary, kala 19:00, pierad domam spyniłasia niekalki mašyn ź viskam šyn, ź jakich vyjšli šmatlikija ludzi ŭ maskach. Kali ja vyjšaŭ, moj susied siadzieŭ pierad domam sa źviazanymi rukami. Tolki kali ja patelefanavaŭ u palicyju, ja daviedaŭsia, što heta była palicejskaja apieracyja. Spačatku ja bajaŭsia, što heta była mocnaja ataka», — raspavioŭ susied.
Apošni raz ukrainskuju siamju bačyli ŭ restaranie ŭ supravadžeńni žančyny, jakaja ŭ sacyjalnych sietkach prapanavała im dapamohu z afarmleńniem dakumientaŭ. Pakul niezrazumieła, heta inšaja žančyna ci Ina i ci aryštavanaja jana.
Nahadajem, spačatku było znojdziena cieła maci, zatym žyvaja dziaŭčynka, a potym cieła jaje babuli.
Čytajcie taksama:
Zabojstva 27-hadovaj ukrainskaj biežanki ŭ Hiermanii: žudasny praciah historyi
U Niamieččynie zabili 27-hadovuju biežanku z Ukrainy, jaje maci i novanarodžanuju dačku šukajuć
