Što nie tak z pašpartam «Novaj Biełarusi» dla kedebista, pakazanym na ANT
Pry bolš detalovym razhladzie ŭvahu na siabie źviartaje niekalki momantaŭ.
Pašpart, pakazany na ANT. Skryn videa siužeta
U efiry telekanała ANT pakazali, jak śćviardžajecca, pašpart «Novaj Biełarusi» nibyta ź pieršaj probnaj partyi. Jon vydadzieny na imia Kołasava Hienadzia Balasłavaviča. Prykoł u tym, što heta nieisnujučy piersanaž, čyjo imia ŭjaŭlaje saboj abrevijaturu KHB.
Čamu jon niepadobny da sapraŭdnaha?
Ihar Tur trymaje pašpart, jaki nibyta vydaŭ Ofis Cichanoŭskaj. Skryn videa ANT
Identyfikacyjny numar
U pašpartach «Novaj Biełarusi» jon budzie tym ža, što i ŭ vydadzienym raniej zvyčajnym pašparcie (ale numar samoj knižki budzie inšy).
Asabisty numar ujaŭnaha kedebista pačynajecca ź ličby 5. Ale heta niemahčyma. «Kołasaŭ» — 1978 hoda naradžeńnia, tamu jaho numar pavinien pačynacca ź ličby 3. Bo 5 stavili dla mužčyn, jakija naradzilisia ŭ 21-m stahodździ. Paźniej sistemu numaracyi źmianili, ale na momant naradžeńnia «Kołasava» jana była takoj.
Kod krainy
U pakazanym na ANT pašparcie staić BLR — kod Biełarusi. Adnak pradstaŭnik Abjadnahaha pierachodnaha kabinieta Valer Kavaleŭski raniej kazaŭ, što jany damovilisia ź inšaj krainaj, jakaja dazvolić karystać jaje numar. Što heta budzie za kraina, nie nazyvałasia, ale biełaruski kod dakładna stajać nie budzie.
Detali afarmleńnia
U pakazanym na ANT pašparcie, zaŭvažajuć u Kabiniecie, nie tyja šryfty, apošniaja staronka papiarovaja, a nie polikarbanatnaja, niapravilnaja tranślitaracyja (pavinna było b być Hienadź, a nie Hienadž).
Tak musić vyhladać apošniaja staronka. Skryn videa prezientacyi pašparta «Novaj Biełarusi»
Jak raniej prakamientavaŭ Kavaleŭski, u Kabinieta jašče niama ŭzoraŭ i pryjom zajavak na atrymańnie pašpartoŭ nie adkryvaŭsia.
Čytajcie taksama:
Jak prapahandyst Ihar Tur staŭ lubimčykam Łukašenki i kolki zarabiŭ u 2020-m
