Biznesmien Muraŭjoŭ, jaki 7 hadoŭ prasiadzieŭ u biełaruskaj turmie, źbirajecca sudzicca za svaju majomaść u Aŭstryi
Svajo pieršaje intervju biełaruski pradprymalnik Alaksandr Muraŭjoŭ, jaki mieŭ biźnies u Aŭstryi, daŭ Aŭstryjskamu ahienctvu druku. U im jon raskazaŭ pra toje, jak straciŭ usiu svaju majomaść i biznes dy jak jaho katavali ŭ zaścienkach biełaruskaha KDB, piša «Biełsat».
Alaksandr Muraŭjoŭ u svajoj kvatery ŭ Dubai (Abjadnanyja Arabskija Emiraty). 25 studzienia 2024 hoda. Fota pieradadziena redakcyi «Biełsata»
Biełaruski pradprymalnik Alaksandr Muraŭjoŭ, jaki žyvie i maje chołdynh u Aŭstryi, doŭhi čas farmalna byŭ adnym z najbujniejšych aŭstryjskich inviestaraŭ u Biełarusi. U 2015 hodzie KDB Biełarusi pasadziŭ jaho na 11 hadoŭ, a Aŭstryja jurydyčna dapamahała ŭ hetym sumnieŭnym sudovym viadzieńni, raskazvaje APA.
U intervju APA Alaksandr Muraŭjoŭ raskazaŭ, što, akramia źbićcia ŭ SIZA KDB, jamu pahražali zabojstvam.
«Jany skazali mnie, što ja mahu ličyć, što mianie ŭžo niama ŭ žyvych i što maje dzieci navat nie znojduć majoj mahiły», — skazaŭ jon. Heta byŭ surjozny cisk, zajaviŭ pradprymalnik.
Jašče da vynikovaha prysudu ŭ 2017 hodzie Łukašenka publična zajaviŭ, što pahražaŭ Muraŭjovu turmoju, kali toj nie pojdzie na jahonyja ŭmovy. Pra heta i šmat inšych detalaŭ pradprymalnik raspavioŭ sa svajho časovaha prytułku ŭ Dubai. Jon pajechaŭ tudy na nastupny dzień paśla vyzvaleńnia ŭ kancy 2022 hoda.
Alaksandr Muraŭjoŭ z pamiatnymi adznakami «Motavieła» ŭ Dubai. 25 studzienia 2024 hoda
APA nahadvaje, što ŭ Biełarusi Muraŭjoŭ byŭ paśpiachovym pradprymalnikam. U 2002 hodzie aŭstryjskaja handlovaja kampanija ATEC, źviazanaja z Muraŭjovym, kupiła 65% škłozavoda ŭ pasiołku Jalizava. U 2006 hodzie za ekanamičnyja pośpiechi Łukašenka navat uznaharodziŭ Muraŭjova miedalom. A na nastupny hod ATEC Holding GmbH zmahła kupić u dziaržavy 99,72% akcyj zavodu «Motavieła», jakija ŭ 2013 hodzie pierajšli da ATEC Investment GmbH.
Tym nie mienš, Muraŭjoŭ śćviardžaje, što nibyta nie atrymlivaŭ niejkich prefierencyj ad režymu.
«Z taho času, jak mnie spoŭniłasia 22 hady, nichto nikoli nie padtrymlivaŭ mianie», — skazaŭ Muraŭjoŭ, jaki naradziŭsia ŭ 1966 hodzie i zajmajecca biznesam z 1988 hoda.
U 2015 hodzie ŭłady Biełarusi rezka spynili jahonuju pradprymalnickuju dziejnaść: paśla taho jak jon admoviŭsia pieradać u dar dziaržavie akcyi «Motavieła», što naležać ATEC Investment GmbH, KDB 1 červienia 2015 hoda źmiaściŭ jaho ŭ svaju turmu. Usiaho Muraŭjovu daviałosia pravieści tam bolš za try hady.
Akramia jak u padatkovych pravaparušeńniach, biznesoŭca abvinavačvali ŭ nievykanańni inviestycyjnych płanaŭ na «Motavieła». Muraŭjoŭ paličyŭ abvinavačvańni sfabrykavanymi. Tym nie mienš u 2017 hodzie jamu prysudzili ahułam 11 hadoŭ pazbaŭleńnia voli z kanfiskacyjaj aktyvaŭ. Prytym sud u Minsku nie tolki kanfiskavaŭ pryvatnyja aktyvy Muraŭjova, ale i eksprapryjavaŭ akcyi, što naležali nie jamu, a źviazanaj ź im aŭstryjskaj chołdynhavaj kampanii.
Traŭmatyčnym dla biełarusa było i toje, što jon straciŭ svoj dom u Aŭstryi. U 2020 hodzie abjekt byŭ pradadzieny za 2,1 młn jeŭra kampanii, što naležyć viadomamu vienskamu pradprymalniku Marcinu Cho.
Ahułam Muraŭjoŭ i aŭstryjskaja chołdynhavaja kampanija, što za toj čas była likvidavanaja, stracili vielizarnyja sumy, jakija jon ciapier choča viarnuć u sudovym paradku. Havorka idzie pra sumu ad 40 da 274 miljonaŭ jeŭra. Da aryštu jahonaja hrupa mieła hadavy abarot 200 miljonaŭ jeŭra, rastłumačyŭ biełarus, jaki ciapier sprabuje jašče i adnavić dazvoł na žycharstva ŭ Aŭstryi.
Čytajcie taksama:
Byłoha ŭładalnika «Motavieła» vyzvalili ŭmoŭna-daterminova — «Biełsat»
Eks-uładalnik «Motavieła» Muraŭjoŭ vyjšaŭ na volu i vyjechaŭ u Dubaj — Office Life
