50 čałaviek atrymali traŭmy paśla taho, jak samalot rezka straciŭ vyšyniu ŭ palocie
Usio z-za niaspraŭnaha kresła piłota.
Fota: Photo by Bruce Bennett / Getty Images
Kancern Boeing rekamiendavaŭ avijakampanijam pravieryć kresły ŭ kabinie piłotaŭ samalotaŭ 787 Dreamliner paśla incydentu z łajnieram čylijskaj avijakampanii Latam, jaki rezka straciŭ vyšyniu padčas palotu z Aŭstralii ŭ Novuju Ziełandyju, piša Bi-bi-si.
U paniadziełak samalot, jaki vykonvaŭ rejs LA800 z aŭstralijskaha Sidneja ŭ novaziełandski Oklend, padčas palotu «pravaliŭsia» na 100 mietraŭ, u vyniku čaho 50 čałaviek atrymali traŭmy. 12 čałaviek, u tym liku try členy ekipaža, trapili ŭ balnicu.
Paviedamlałasia, što strata vyšyni adbyłasia z-za niekatorych techničnych prablem. Rasśledavańnie jašče praciahvajecca.
Raniej vydańnie Wall Street Journal sa spasyłkaj na krynicy paviedamiła, što pa adnoj ź viersij, pryčynaj moh stać ustalavany ŭ śpincy kresła piłotaŭ pieramykač, jaki zakliniła.
Pa źviestkach WSJ, člen ekipaža (bortpravadnik abo bortpravadnica), jaki padavaŭ ježu piłotam, vypadkova zakranuŭ pieramykač, jaki zabiaśpiečvaje elektrarehuloŭku siadzieńniaŭ. U vyniku pieramykač zakliniła, a kresła prasunułasia napierad, šturchnuŭšy piłota na šturvał.
Surazmoŭca vydańnia spasyłajecca na krynicy, jakija znajomyja z papiarednimi vynikami rasśledavańnia.
Pa danych WSJ, u čaćvier kampanija Boeing razasłała avijakampanijam, jakija ekspłuatujuć samaloty Dreamliner, pamiatku, i rekamiendavała pravieryć pracu kresłaŭ.
U Boeing zajavili, što razhladajuć mahčymaść uniasieńnia źmianieńniaŭ u instrukcyju pa ekspłuatacyi samalota.
Mataryzavanyja kresły Boeing 787 i inšych sučasnych pasažyrskich łajnieraŭ raspracavany tak, kab piłoty mahli svabodna pierasoŭvacca ŭnutry ciesnaj kabiny.
«Heta padobna na siadzieńnie ŭ vašaj mašynie: kali b jany raptam pačali ruchacca sami pa sabie praź pieramykač, jaki zakliniła, što b vy zrabili?»— kaža kansultant pa avijacyjnaj biaśpiecy i piłot Džon Koks, padkreślivajučy, što nie čuŭ pra padobnyja vypadki raniej.
Raniej dva śledčyja z čylijskaha ŭpraŭleńnia hramadzianskaj avijacyi prybyli ŭ Novuju Ziełandyju, kab uziać udzieł u rasśledavańni. U im taksama ŭdzielničajuć pradstaŭniki Latam Airlines.
Padčas incydentu pasažyraŭ, jakija nie byli pryšpilenyja, rezka padkinuła ŭ pavietra. Niekalki čałaviek atrymali traŭmy hałavy.
«Niekatoryja surjozna paciarpieli, — raspavioŭ adzin z pasažyraŭ. — Ludzi byli pa-sapraŭdnamu napałochanyja».
U Latam Airlines paviedamili, što samalot pryziamliŭsia ŭ aeraporcie Oklenda pa raskładzie, i dadali, što škadujuć ab tym, što zdaryłasia.
Avijakampanii rajać pasažyram zastavacca pryšpilenymi ramianiami biaśpieki na praciahu ŭsiaho palotu na vypadak pazaštatnych situacyj.
Čytajcie taksama:
«Biełavija» viarnuła mahčymaść vybirać miescy na rejs pry anłajn-rehistracyi
Aeraport Minsk šukaje «tajemnych pasažyraŭ» dla manitorynhu svaich pasłuh