Jakaja raka ŭ Biełarusi samaja chałodnaja, a jakaja samaja źvilistaja?
14 sakavika ŭ mnohich krainach adznačajecca Mižnarodny dzień rek, jaki raniej mieŭ nazvu Mižnarodny dzień baraćby suprać płacin, za reki, vadu i žyćcio, paviedamlaje Minpryrody. I ŭ suviazi z hetym pryvodzić cikavuju statystyku pra biełaruskija reki.
Raka Cna na Łahojščynie
Usiaho ŭ našaj krainie naličvajecca 20,8 tysiač rek, ahulnaja praciahłaść jakich — 90,6 tysiač kiłamietraŭ.
Usie vadajomy majuć ledavikovaje pachodžańnie i ŭtvoranyja dziakujučy rastavańniu vialikaha Vałdajskaha ledavika 13 tysiač hadoŭ tamu, śćviardžajuć u Ministerstvie.
Daŭžynia samaj maleńkaj raki — 166 m, hłybinia — nie bolš za paŭtara mietra. Heta raka Skiema. Jana złučaje dva aziory — Miastra i Narač.
A samaja doŭhaja raka Biełarusi — Dniapro. Praŭda, ź jaho 2145 km na terytoryju našaj krainy prypadaje tolki 690 km. Na druhim miescy — Biarezina ź jaje 613 km, i heta pieršaje miesca z usich rek, jakija ciakuć vyklučna ŭ Biełarusi.
Z usioj raznastajnaści vodnych mahistralaŭ tolki 9 biełaruskich rek majuć ahulnuju daŭžyniu bolš za 500 km — heta ŭžo nazvanyja Dniapro i Biarezina, a taksama Dźvina, Nioman, Prypiać, Buh, Haryń, Sož i Vilija.
Samaj chałodnaj rakoj krainy pryznanaja Isłač, a samaj unikalnaj pa składzie ryb — Vilija, kudy zachodzić na nierast łasoś.
Samaja źvilistaja raka Biełarusi — Drysa, za što jaje lubiać amatary vodnych spłavaŭ. Jana vyłučajecca sistemaj azior, jakija ŭvachodziać u račny basiejn, i adroźnivajucca redkaj malaŭničaściu.
«Pojma raki Prypiać, napeŭna, adno z samych dziŭnych miescaŭ našaj krainy. Jaje zabałočanaja dalina, jakaja pakryvajecca pavodkavymi i tałymi vodami na 2-5 miesiacaŭ u hodzie, — unikalny kutok pryrody. Raku, viadomuju kapryznym noravam i niepradkazalnaściu, navat nazyvajuć biełaruskaj Amazonkaj u centry Jeŭropy», — śćviardžajuć u Minpryrody.
Dźvina i Dniapro — reki z bahatym histaryčnym minułym, jany kaliści byli častkaj staražytnaha vodnaha šlachu, jaki źviazvaŭ Skandynaviju ź Vizantyjskaj impieryjaj i atrymaŭ nazvu «z varahaŭ u hreki». Raskopki na ich bierahach śviedčać pra najaŭnaść pierachodnych punktaŭ u vyhladzie ŭmacavanych pasieliščaŭ, jakija adyhryvali vialikuju rolu ŭ žyćci siaredniaviečnaj Jeŭropy.
Čytajcie taksama:
Jakaja suviaź pamiž BiełAES i atłantyčnym łasosiem? Akazvajecca, samaja niepasrednaja
