«Fantazija biełaruskich orhanaŭ biaźmiežnaja». Litoŭskaja ambasadarka raskazała pra situacyju ź litoŭcam, jaki pamior u biełaruskaj turmie
Paśla paviedamleńnia pra śmierć hramadzianina Litvy ŭ biełaruskaj turmie ambasadarka krainy pa asobych daručeńniach Asta Andryjaŭskienie paviedamiła, što litoŭski bok nieadnarazova słaŭ zapyty na sustreču ź im. Adnak biełaruskija ŭłady ŭrešcie dali adkaz, što arhanizavać sustreču niemahčyma, pakolki čałaviek pamior, piša Delfi.lt.
«Hramadzianin Litvy byŭ zatrymany letaś, u kancy śniežnia, na litoŭska-biełaruskaj miažy. Ambasada atrymała infarmacyju pra heta ŭ studzieni i, viadoma, my adrazu ž zapytali sustreču z hetym hramadzianinam Litvy. My šmat razoŭ pisali, prasili, źviartalisia z nahody sustrečy. Pakolki nam jaje nie dali, my napisali jašče adnu notu», — zajaviła na admysłova sklikanaj pres-kanfierencyi ŭ aŭtorak ambasadarka Litvy pa asablivych daručeńniach u Biełarusi Asta Andryjaŭskienie.
Urešcie, pa jaje słovach, litoŭskim viedamstvam byŭ dadzieny adkaz, što sustreča z zatrymanym niemahčymaja, pakolki jon pamior.
«U adkaz na takuju infarmacyju, niesumnienna, my vyklikali časovaha pavieranaha ŭ spravach Biełarusi ŭ Litvie i paprasili jaho dać infarmacyju pra abstaviny zatrymańnia hramadzianina Litvy, abstaviny jaho śmierci, pryčyny jaho śmierci, čas i ŭsiu astatniuju infarmacyju, jakoj jany vałodajuć», — dadała jana.
«Siońnia my atrymali notu MZS Biełarusi, jakaja paćviardžaje fakt i datu śmierci hramadzianina Litvy, ale nijakaj inšaj infarmacyi pakul nie atrymali. Tamu jašče raz prosim padać usiu infarmacyju pra abstaviny zdareńnia», — paviedamiła Andryjaŭskienie.
U dakumiencie, prysłanym biełaruskimi ŭładami, źmiaščajecca infarmacyja, što litoviec pamior u turmie 9 sakavika. Pavodle źviestak pradstaŭnictva, heta byŭ čałaviek 1953 hoda naradžeńnia, žychar Vilni.
Pa słovach ambasadarki, byvajuć vypadki, kali pra zatrymańnie litoŭskich hramadzian u Biełarusi aficyjna nie paviedamlajecca, i MZS daviedajecca pra ich tolki ad zaniepakojenych svajakoŭ.
«Zatrymanych hramadzian niamała i pry samych roznych abstavinach. Jość šmat vypadkaŭ, kali ludziej zatrymlivajuć na 24 hadziny, 72 hadziny, i my nie atrymlivajem nijakaj aficyjnaj infarmacyi, my atrymlivajem tolki infarmacyju ad svajakoŭ, jakija ŭžo šukajuć svaich svajakoŭ, što adpravilisia ŭ Biełaruś», — skazała Asta Andryjaŭskienie.
Ale nie ŭsim ščaścić być zatrymanymi tolki na karotki čas: «U nas jość tyja, chto zatrymany na praciahły čas, bolš za hod, ale jość vypadki, kali čałaviek nikoli nie vierniecca», — dadała jana, padkreśliŭšy, što ciapier nie moža padrabiazna kamientavać, kolki mienavita litoŭcaŭ zatrymana ŭ Biełarusi.
Pry hetym, pa jaje słovach, «fantazija biełaruskich pravaachoŭnych orhanaŭ biaźmiežnaja», tamu častka abvinavačvańniaŭ, jakija vystaŭlajucca na adras hramadzian Litvy, prosta vydumka.
Čytajcie taksama:
U Biełarusi pamior zatrymany pa padazreńni ŭ kantrabandzie patronaŭ hramadzianin Litvy
