Chłopcy sa Śmiłavickaha kaledža sa stalovymi ružami ŭzarvali tyktok
Chłopcy sa Śmiłavickaha dziaržaŭnaha kaledža źnianacku pračnulisia zorkami tyktoku. Ich videa nabrali bolš za 6,5 miljona prahladaŭ, a ŭ kamientaryi pryjšli sotni fanatak. Sakret niečakanaj papularnaści — ružy ź mietału ŭ honar 8 Sakavika.
Pieršaje videa źjaviłasia 5 dzion tamu — u im chłopcy pakazvajuć, jak svaimi rukami zrabić brutalny padarunak na Mižnarodny žanočy dzień. Majstar-kłas zakančvajecca frazami:
— Svaim mamam my ŭžo zrabili ružy. Nu a dziaŭčatam — u pracesie. Bo ich u nas šmat.
Na raźvitańnie hučyć smačny cmok. I voś za hetu buśku ŭ kamientaryjach razharełasia bojka. Šmat dziaŭčat pretendavała na toje, kab jana była mienavita dla ich. Rolik nabraŭ 5,6 miljona prahladaŭ i kala 495 tysiač łajkaŭ, a taksama bolš za 6 tysiač kamientaryjaŭ.
U nastupnym videa chłopcy raspaviali nastaŭniku, što naličyli ŭžo bolš za 140 mietaličnych ruž i źbilisia ź liku. Toj prapanavaŭ padaryć kvietki dziaŭčatam na 8 Sakavika. Hetaje videa mienš čym za sutki ŭžo nabrała kala 1,2 miljona prahladaŭ i bolš za 70 tysiač łajkaŭ.
U kamientaryjach znoŭ šmat chto zachaplaŭsia — i ružami, i chłopcami, i ich nastaŭnikam. Adna dziaŭčyna adznačyła, što ŭ jaje jość takaja ruža: «Ź joj nie strašna chadzić pa vulicach u ciemry. A tak pryhožaja!»
Ale ž u hety raz chapiła i krytyki: «Žyvym dziaŭčatam treba daryć žyvyja kvietki. Hetyja da pomnikaŭ adniasicie».
Darečy, pamiatajecie dramu ŭ Minsku, kali dziaŭčyna aburyłasia tym, što joj dasłali 151 ružu nie taho pamieru? Zdajecca, chłopcy sa Śmiłavickaha dziaržaŭnaha kaledža mahli b dapamahčy joj hłabalna vyrašyć prablemu. Dyj mietaličnyja ružy dakładna nie zavianuć.
Čytajcie taksama:
Dzie tańniejšyja ciulpany — u pradaŭcoŭ na vulicy ci ŭ kramie?
Biełarus pieratvaryŭ adzin z pakojaŭ u ciaplicu i vyroščvaje tam ciulpany na prodaž
Drama ŭ Minsku: dziaŭčynie padaryli 151 ružu nie taho pamieru
