Ministr zamiežnych spraŭ Litvy: Dźviery dla biełarusaŭ pryčynienyja, ale zusim začyniać ich nie varta
Ministr zamiežnych spraŭ Litvy Habryelus Łandśbierhis u suviazi z zakryćciom dvuch punktaŭ propusku na miažy ź Biełaruśsiu adznačyŭ, što heta sihnał ab tym, što dźviery dla biełarusaŭ pryčynienyja. Adnak jon praciahvaje trymacca mierkavańnia, što pakul niama nieabchodnaści ŭ dalejšym uzmacnieńni surovaści abmiežavańniaŭ dla biełaruskich hramadzian, piša Delfi.lt.
Habryelus Łandśbierhis. Fota: AP
«Dźviery pryčynienyja, a praviły źlohku pastrožyli i źmianili. Prosta dyskusija dała vynik, i ja dumaju, što na hetym etapie hetaha pavinna być dastatkova», — zajaviŭ Łandśbierhis 1 sakavika žurnalistam.
«Heta dastatkova mocny sihnał, što ŭ Litvu pavinny pryjazdžać tyja, chto dakładna viedaje, što choča być tut, i tyja ludzi, jakija nam bolš za ŭsio patrebnyja», — padkreśliŭ ministr.
Taksama jon zajaviŭ, što było b niapravilna rabić jašče bolš surovymi abmiežavańni, uviedzienyja dla hramadzian Biełarusi, bieručy pad uvahu tolki niejkija vyklučnyja vypadki. Tak ministr adreahavaŭ na vykazvańni biełarusa, jaki niadaŭna publična abraziŭ Litvu, što čarhovy raz dało padstavu dla dyskusii ab nieabchodnaści ŭzmacnieńnia surovaści sankcyj.
«Adzinkavyja vypadki vielmi padahravajuć emocyi i vyklikajuć vialikija sprečki. Heta zrazumieła, tak byvaje, tak dziejničajuć demakratyčnyja hramadstvy. Adnak unosić sistemnyja źmieny z-za adzinkavych vypadkaŭ niapravilna. Nam treba zachoŭvać siabie ŭ rukach, mieć spakojnyja niervy i hladzieć sistemna. Heta majo pažadańnie tym viedamstvam, jakija pavinny prymać hetyja rašeńni», — adznačyŭ ministr.
Tamu, na jahonuju dumku, sistemnyja rašeńni ŭ dačynieńni da biełaruskich hramadzian nie mohuć prymacca na padstavie takich vypadkaŭ.
«Ja nie ŭpeŭnieny, što ŭ nas jość 100 pracentaŭ litoŭcaŭ, jakija pavažajuć litoŭskuju movu, jakija žadajuć žyć u Litvie i robiać usio pavodle svaich abaviazkaŭ i Kanstytucyi. Inšymi słovami, u kožnym narodzie my znojdziem ludziej, jakija pavodziać siabie varoža ŭ adnosinach da intaresaŭ svajho naroda i intaresaŭ dziaržavy, u jakoj jany žyvuć», — skazaŭ Łandśbierhis.
Taksama jon padkreślivaje, što ŭ vyniku pryniatych sistemnych rašeńniaŭ płyń biełarusaŭ, jakija prybyvajuć u Litvu, užo skaraciłasia.
Čytajcie taksama:
