Hulniu hoda pierakłali na biełaruskuju movu z dapamohaj niejrasietki
Ciapier prajści Baldur’s Gate III ad pačatku da kanca možna i na rodnaj movie.
Prykład pierakładu niejrasietkaj dyjałohaŭ paplečnicy hałoŭnaha hieroja hicianki Łej'zeł.
Pra pierakład tekstavaj častki hulni paviedamiŭ karystalnik tvitara pad nikam Maleńki Zianon. Jon vykanaŭ pierakład z dapamohaj niejrasietak i ałharytmaŭ, jašče niekalki dzion jon dapracoŭvaŭ pierakład ułasnymi rukami.
Zvyčajnaje prachodžańnie Baldur's Gate III zajmaje kala 75-100 hadzin, nasyčanych dyjałohami, tekstami zadańniaŭ, apisańniami hulniavych rečaŭ i inšym — ahułam bolš za 230 tysiač radkoŭ. Pierakłaści ŭłasnaručna ŭvieś hety abjem biez pryciahnieńnia techničnych srodkaŭ niemahčyma.
Biełarusizavanaje hałoŭnaje mieniu hulni
Biełaruskija hulniavyja błohiery, jakija testavali pierakład, acanili jaho jak «całkam ahnišča». Jany adznačyli, što čakali choć jakoha pierakładu, jaki źjavicca chutka paśla vychadu i nie daviadziecca čakać jašče 10 hadoŭ, kali hulnia całkam stracić aktualnaść i zapisy prachodžańnia jaje biełaruskaj viersii buduć nikomu nie cikavyja.
Biełarusizavanyja elemienty interfiejsu
Pierakład hulni ad «Trasiankusa» pakul nie dastupny ŭ takich servisach jak Steam, ale jaho možna spampavać na sajcie hulniavych modaŭ. Ustanaŭlivajecca mod na ruskamoŭnuju viersiju hulni prostym pieranosam fajłaŭ u patrebnuju tečku. Pakul takija manipulacyi mahčymyja tolki na piersanalnych kampjutarach, ale Larian Studios abiacaje ciaham hoda dadać padtrymku modaŭ, tady biełarusizatar Baldur's Gate III budzie dastupnym dla šyrejšych kołaŭ.
Prykład pierakładu dyjałohaŭ druharadnaha niehulniavoha piersanaža
Jak i luby mašynny pierakład, biełarusizatar Baldur's Gate III nie pazbaŭleny moŭnych chibaŭ. Ale hety prykład dazvalaje spadziavacca, što chutkaje raźvićcio niejrasietak i kampjutarnaj linhvistyki dazvolać biełarusam atrymlivać kantent na rodnaj movie za ličanyja tydni.
U adroźnieńnie ad pierakładu knih, pierakład hulniaŭ nie patrabuje vysokaj dakładnaści pieradačy i jakaści movy, bo patrabavańni nižejšyja. Tak što całkam realna, što nastupnym krokam u ekśpierymientach ź niejrasietkami moža stać mašynnaja ahučka piersanažaŭ.
Viadoma, u mianie jość videa pic.twitter.com/QYy9cqZAWe
Baldur's Gate III — heta adradžeńnie słavutaj sieryi hulniaŭ, jakoj fanaty, jak, naprykład, Siarhiej Čały, čakali amal 20 hadoŭ. Viartańniu da sieryi dapamoh kryzis u žanry: jak i ŭ kiniematohrafie, mnohija kampanii źviartajucca da ŭžo pavieranych časam suśvietaŭ i historyj, vydajučy za apošnija hady ŭsio bolš remiejkaŭ i praciahaŭ tvoraŭ minułych dziesiacihodździaŭ.
Siužet usioj sieryi zasnavany na papularnaj nastolnaj rolevaj hulni Dungeons & Dragons (Padziamielli i Cmoki), dziejańnie jakoj adbyvajecca ŭ adnym z najbolš viadomych vydumanych hulniavych suśvietaŭ — Zabytych Karaleŭstvach (Forgotten Realms).
Biełarusizavany zahruzačny ekran hulni
U novaj častcy na pieršy płan vyjšli ilitydy — złaviesnyja vaśminohapadobnyja istoty, prazvanyja «pažyralnikami rozumu» i nadzielenyja zvyšnaturalnymi zdolnaściami. Jany pieramiaščajucca na latučych karablach i razmnažajucca, adkładvajučy ŭ cieły inšych razumnych istot svaich ličynak. Pratahanist, za jakoha daviadziecca hulać, źjaŭlajecca adnoj z takich achviar ilitydaŭ, i sprabuje z vypadkovymi paplečnikami pazbavicca ad ličynki, jakaja patrochu raźjadaje jamu mozh, ale pry hetym daje ŭnikalnyja telepatyčnyja zdolnaści.
Vaśminohapadobnyja «pažyralniki rozumu» ilitydy — hałoŭnyja antahanisty novaj hulni sieryi. Kadr z trejlera
Hulnia maje vyklučna stanoŭčyja vodhuki krytykaŭ, jakija nazvali jaje viaršyniaj žanra ralavych hulniaŭ. U ramkach The Game Awards 2023, hałoŭnaj premii ŭ halinie hulniavoj industryi, «Brama Bałdura» stała tryumfataram, atrymaŭšy cełych šeść uznaharod: za najlepšuju akciorskuju hulniu, za najlepšuju padtrymku supolnaści, jak najlepšaja rolevaja i najlepšaja šmatkarystalnickaja hulnia, jana taksama pieramahła ŭ naminacyi pa vybary samich hulcoŭ i narešcie zabrała hałoŭny pryz — zvańnie «Hulnia hoda».
«Naša Niva» — bastyjon biełaruščyny
PADTRYMAĆČytajcie taksama:
Čały pajšoŭ u Bramu Bałdura. Hetuju hulniu fanaty čakali amal 20 hadoŭ
