10 novych sieryjałaŭ, jakija vyjduć viasnoj
Navukovy šedeŭr, palityčnaja satyra i bahata pryznanych zorak. Trymajcie śpis sieryjałaŭ, jakija varta pahladzieć hetaj viasnoj.
Fota: youtube.com
«Režym» (The Regime), 3 sakavika
Adkryvajem viasnu z šaścisieryjnaj palityčnaj satyraj ad studyi Max. «Režym» pradstaŭlaje Kiejt Uinślet u tatalna niečakanym ampłua aŭtarytarnaj lidarki.
Hierainia Uinślet — kiraŭnica krainy ŭ centralnaj Jeŭropie. Niejki čas jana nie pakidaje svoj pałac i ŭ vyniku pavodzić siabie paranaidalna i niestabilna. Jana znachodzić padtrymku ŭ asobie sałdata, ale ŭsie jaje pavodziny tolki škodziać joj i jaje ŭładzie.
«Palavańnie na zabojcu» (Manhunt), 15 sakavika
Zorka «Čužynki», brytaniec Tobias Mienzis, znoŭ upisaŭsia ŭ histaryčny sieryjał. Na hety raz havorka nie pra miaciežnuju Šatłandyju, a pra ZŠA siaredziny 19 stahodździa. Studyja Apple TV+ uziałasia za vielmi viadomaje złačynstva, u jakim bahata biełych plamaŭ — za historyju zabojstva Avraama Linkalna.
Heta raskaz pra napad na amierykanskaha prezidenta i pošuk jaho zabojcy Džona Uiłksa Buta. Słohan sieryjała — «Zamach byŭ tolki pačatkam.
«Pałm-Rajal» (Palm Royale), 20 sakavika
Paśla składanaha trylera pieraklučyciesia na stylnuju kamiedyju. «Pałm-Rajal» — historyja pra amierykanku Maksim Simans, jakaja ŭ 1969-m sprabuje zamacavacca ŭ vyšejšym śviecie kurorta Pałm-Bič.
Razynka hetaj historyi — pop-idał 90-ch Ryki Marcin, jaki hraje tut adnu z hałoŭnych rolaŭ. Budzie šmat pryhožych žančyn i mužčyn, sonca i jarkich kaściumaŭ — asałoda dla vačej!
«Zadača troch cieł» (3 Body Problem), 21 sakavika
Pra hety sieryjał my pisali niekalki miesiacaŭ tamu, kali stała viadoma, što rolu ŭ im atrymaŭ biełaruski akcior Micia Savieljeŭ. U «Zadačy troch cieł» vydatnaja pieršaasnova — kniha znakamitaha kitajskaha fantasta Lu Cysinia.
Sieryjał składajecca ź niekalkich historyj, abjadnanych adnoj pahrozaj: pavodle jaho, chutka čałaviectva sustreniecca ź inšapłaniecianami. Čałaviectva musić zrazumieć, jakim budzie hety pieršy kantakt, i padrychtavacca da jaho. Ad sieryjała šmat čaho čakajuć, bo jaho šouranery — stvaralniki «Hulni tronaŭ» Den Uajs i Devid Bieniaf.
«Vyrakanka Neł» (Renegade Nell), 29 sakavika
U anhlijskich kazkach jość duch Bili Blind, jaki vielmi lubić davać parady. Ciapier na dvary 18 stahodździe, i pierad Blindam paŭstaje składanaja zadača: jon musić dapamahčy razbojnicy Neł Džeksan ačyścić svajo imia ad abvinavačvańniaŭ u zabojstvie.
«Vyrakanku Neł» pazicyjanujuć jak siamiejny sieryjał, i heta pradkazalna, bo prajekt robić studyja Disney+. Ale ŭ toj ža čas u sieryjale bahata trukaŭ: hledziačy pa trejlery, vidovišča atrymałasia dynamičnaje.
«Peryš» (Parish), 31 sakavika
A heta historyja dla amataraŭ kryminału. U jaje centry Hresijan Peryš, były złačynca, jaki byccam by pieratvaryŭsia ŭ ščyraha siemjanina i pracaŭnika. Ale adnojčy jaho syna žorstka zabivajuć i jaho biznes razvalvajecca, a potym sustreča sa starym siabram kančatkova viartaje Peryša na minuły šlach.
Tut budzie hvałt, zabojstvy i stralanina. U hałoŭnaj roli — Džankarła Espazita, zorka sieryjałaŭ «Va ŭsie ciažkija» i «Lepiej zvanicie Sołu».
«Rypli» (Ripley), 4 krasavika
Režysior, pradziusar i scenaryst hetaj vaśmisieryjki — Styvien Zejlijan, scenaryst askaranosnaha «Śpisu Šyndlera», «Hanibała», «Dziaŭčyny z tatuiroŭkaj drakona» i inšych bujnych prajektaŭ. U hałoŭnaj roli — zorny brytaniec Endru Skot, jakoha vy mahli bačyć u roli złoha hienija Maryjarci ŭ «Šerłaku» i šmat u jakich inšych sieryjałach. U trejlery zaśviacilisia i Dakota Feninh z Džonam Małkavičam.
I kali paśla hetaha vam jašče patrebny siužet, to voś jon: u Ńju-Jorku 60-ch žyvie vytančany avanturyst Tomas Rypli. Bahaty čałaviek najmaje jaho, kab Tomas dapamoh viarnuć jaho naravistaha syna ź Italii, i tak pačynajecca šlach Rypli ŭ śviet machlarstva, padmanaŭ i zabojstvaŭ.
Šuhar (Sugar), 5 krasavika
Fota: skrynšot z youtube.com
Trymajcie jašče adzin sieryjał, nabity zorkami industryi. Akramia irłandca Kolina Fareła ŭ hałoŭnaj roli, da «Šuhara» prykłali ruku pradziusary «Amierykanskaj historyi žachaŭ» i «Va ŭsie ciažkija».
Pra siužet sieryjała pakul viadoma niašmat. Raskažam tolki, što heta vaśmisieryjny detektyŭ, pabudavany vakoł hałoŭnaha hieroja Džona Šuhara. Jaho zadača — znajści źnikłuju ŭnučku lehiendarnaha halivudskaha pradziusara.
«Spahadliviec» (The Sympathizer), 14 krasavika
Razam z Robiertam Daŭni-małodšym nyrajem u špijonskaje kino. Vajna ŭ Vjetnamie nabližajecca da kanca, i miascovy žychar, špijon kamunistyčnaha Vjetkonha ŭ armii Paŭdniovaha Vjetnama, lacić u ZŠA. Tam jon astaloŭvajecca ŭ supolnaści ŭciekačoŭ i paralelna z hetym praciahvaje špijonić dla kamunistaŭ.
U «Spahadliŭca» šmatabiacalnyja stvaralniki — kinastudyja A24, što bałuje nas aryhinalnymi karcinami nakštałt «Zony intaresaŭ» pra kamiendanta Aśviencyma, tonkaj ramantyčnaj mieładramy «Minułyja žyćci» abo askaranosnaj fantasmahoryi «Usio, paŭsiul i adrazu». Možna čakać, što i ich «Spahadliviec» budzie na vyšyni.
«Tatuiroŭščyk z Aśviencyma» (The Tattooist of Auschwitz), 2 maja
Bližej da kanca viasny nam abiacajuć mocnuju histaryčnuju dramu pra Druhuju suśvietnuju. Heta ekranizacyja adnajmiennaha ramana pra žyćcio Ludviha Ejzienbierha (Łale Sakałova), aŭstra-vienhierskaha pradprymalnika, jaki pravioŭ amal try hady ŭ Aśviencymie.
Jaho zadańniem było rabić na ciełach viaźniaŭ tatuiroŭki ź ich łahiernym numaram. Tak Łale znajšoŭ kachanuju — Hitu, jakoj dapamahaŭ, dziakujučy svajmu «słužbovamu stanovišču» tatuiroŭščyka. Paśla vajny jon ažaniŭsia na Hicie, ledź nie trapiŭ u kamunistyčnuju turmu, ale razam z žonkaj zdoleŭ emihravać u Aŭstraliju, dzie i pražyŭ da samaj śmierci ŭ 2006 hodzie. Za try hady da jaje, u 2003-m, Łale raskazaŭ pra svajo łahiernaje minułaje piśmieńnicy Chiezier Morys. Z toj hutarki paŭstała kniha, a z knihi — hety sieryjał.
«Naša Niva» — bastyjon biełaruščyny
PADTRYMAĆČytajcie taksama:
Biełaruski artyst źniaŭsia ŭ sieryjale ad Netflix i stvaralnikaŭ «Hulni tronaŭ»
U filmie «Zona intaresaŭ» zło chavajecca prosta za sadovaj ścianoj
«Niebaraki» (Poor Things): pahladzieli samy dziŭny film hoda i raskazvajem, čaho čakać
