Hanna Hierman: mała chto viedaje, što ŭ Savieckim Sajuzie rasstralali jaje baćku
Imia polskaj śpiavački Hanny Hierman viedali va ŭsim Savieckim Sajuzie. Jaje pieśni «Nadiežda», «Echo», «Kohda ćvieli sady» dahetul u mnohich ludziej ulublonyja, bo jany poŭnyja śviatła i dabryni. Hańnie Hierman udałosia zachavać dušu čystaj, niahledziačy na ciažkija vyprabavańni.
Hanna Hierman. Fota Wikimedia Commons
Hanna Hierman naradziłasia 14 lutaha 1936 hoda ŭ horadzie Urhienč va Uźbiekistanie ŭ siamji naščadkaŭ niamieckich i hałandskich pierasialencaŭ. Jaje baćku aryštavali pa falšyvym abvinavačańni ŭ špijanažy i rasstralali, kali dziaŭčyncy byŭ adzin hod. Siamja pra heta daviedałasia tolki praz 20 hadoŭ, kali mužčyna byŭ reabilitavany. Praz hod paśla aryštu baćki ŭ siamji zdaryłasia jašče adno hora — pamior małodšy brat Hanny.
Źleva naprava: maci Irma, baćka Jaŭhienij, maleńkaja Hanna i jaje babula Hanna. Skryn videa GLOSNADZIEI / YouTube
Paśla aryštu baćki dziaŭčynka razam z maci časta mianiali miesca žycharstva. U 1942 hodzie jaje maci vyjšła zamuž druhi raz — za palaka, jaki pajšoŭ vajavać u składzie 1-j piachotnaj dyvizii imia Tadevuša Kaściuški. Mužčyna źnik bieź viestak, ale šlub z palakam daŭ siamji prava ŭ 1946 hodzie vyjechać u Polšču, što davała mahčymaść źbiehčy z savieckaha piekła.
Hanna Hierman razam z svajoj maci Irmaj. Skryn videa Glosnadziei / YouTube
Hanna Hierman vydatna śpiavała i dobra malavała, ŭ junactvie jana maryła stać mastakom. Ale jaje maci i babula ličyli, što takaja adukacyja nie zmoža prakarmić jaje ŭ budučyni, i paśla himnazii Hanna pastupiła na hieałahičny fakultet Urocłaŭskaha ŭniviersiteta i paśpiachova skončyła jaho.
Šlach da słavy
U studenckija hady dziaŭčyna vystupała na scenie moładzievaha teatra «Kałambur» i surjozna zachapiłasia estradaj. Paśla ŭniviersiteta ŭ 1962 hodzie Hierman atrymała dazvoł na estradnuju dziejnaść i pačała vystupać z kancertami ŭ nievialikich polskich haradach.
Hanna Hierman u pačatku karjery śpiavački. Skryn videa Glosnadziei / YouTube
Tryumfam dla śpiavački-pačatkoŭcy staŭ Mižnarodny fiestyval pieśni ŭ Sopacie ŭ 1964 hodzie. Tam jana vykanała kampazicyju «Tancujučyja Eŭrydyki» i zaniała pieršaje miesca siarod polskich vykanaŭcaŭ i druhoje miesca ŭ mižnarodnym rejtynhu.
U tym ža hodzie Hanna Hierman dała svaje pieršyja kancerty ŭ SSSR, Bielhii dy inšych krainach. Vynikam vialikaha hastrolnaha turu staŭ pieršy dysk, zapisany na firmie «Miełodyja», jaki razyšoŭsia vielizarnym tyražom.
U 1965-m śpiavačka zapisała kampazicyju «Horad zakachanych», jakaja stała papularnaj. U 1966 hodzie Hierman upieršyniu źjaviłasia ŭ kino, syhraŭšy nievialikuju rolu ŭ polskim filmie «Marskija pryhody». Ale akciorskaja karjera Hanny Hierman nie zadałasia. Jak aktorka žančyna źjaviłasia jašče ŭ troch filmach i tolki ŭ epizadyčnych rolach.
U kancy 1966 Hierman padpisała trochhadovy kantrakt ź italjanskaj studyjaj hukazapisu. Da taho času ŭ SSSR było pradadziena bolš za miljon jaje płaścinak.
U 1967 hodzie śpiavačka pradstaŭlała Polšču na fiestyvali ŭ San-Rema, ale nie prajšła ŭ finał. Nieŭzabavie paśla hetaha jana adpraviłasia ŭ rekłamny tur pa Italii. U lipieni taho ž hoda Hierman vystupiła na fiestyvali pieśni ŭ Nieapali, staŭšy pieršym zamiežnym udzielnikam za ŭsiu historyju fiestyvalu.
Avaryja i viartańnie na scenu
Padčas hastrolaŭ u Italii Hierman trapiła ŭ surjoznuju aŭtamabilnuju avaryju. Adbyłasia jana 27 žniŭnia 1967 hoda. Aŭtamabil sa śpiavačkaj urezaŭsia ŭ bietonnuju zaharodu na darozie pamiž Farli i Miłanam z-za taho, što mieniedžar Hanny zasnuŭ za rulom. Śpiavačku vykinuła na darohu praz łabavoje škło. Hierman atrymała pierałomy i traŭmy ŭnutranych orhanaŭ i bolš za tydzień nie prychodziła ŭ prytomnaść. Paŭhoda jana lažała nieruchoma, a zatym prachodziła reabilitacyju, iznoŭ navučajučysia chadzić.
U 1970 hodzie artystka viarnułasia na scenu. Adnoj ź pieršych piesień, zapisanych Hierman paśla viartańnia na scenu, była «Nadzieja».
Na 1970-ja hady prypaŭ pik papularnaści śpiavački ŭ Savieckim Sajuzie. Pieśni ŭ jaje vykanańni «Nadzieja», «Kali ćvili sady», «Piaščota» hučali na radyjo i telebačańni. Cykł telepieradač «Śpiavaje Hanna Hierman» vyjšaŭ na ekrany ŭ 1975 hodzie. U tym ža hodzie śpiavačka zrabiła hastrolny tur, padčas jakoha była ŭpieršyniu vykanana kampazicyja «A jon mnie padabajecca».
U 1977 hodzie znakamitaść zaprasili na «Pieśniu hoda», dzie jana vykanała kampazicyju «Recha kachańnia».
Hanna Hierman nie pieranosiła vinu za hibiel svajho taty na prostych savieckich ludziej, jana abjeździła z kancertami ŭvieś Saviecki Sajuz. Hetyja vystupy prynosili joj i vialikija hanarary, žyćcio ŭ Polščy tady było zusim niezamožnym.
Asabistaje žyćcio
Sa svaim budučym mužam Źbihnievam Tucholskim Hierman paznajomiłasia va Urocłavie ŭ 1960 hodzie. Jon pracavaŭ navukovym supracoŭnikam i pryjechaŭ u horad pa pracy. Paznajomilisia jany prazaična. Źbihnieŭ paprasiŭ Hierman dahledzieć rečy, pakul jon vykupajecca ŭ race.
Hanna Hierman razam z mužam Źbihnievam. Skryn videa Glosnadziei / YouTube
Niekalki hadoŭ para žyła ŭ hramadzianskim šlubie. Adnosiny jany ŭzakonili tolki paśla taho, jak Hanna patrapiła ŭ aŭtakatastrofu. U maładości artystka była zaniataja karjeraj, a ŭpieršyniu zaciažaryła, kali joj było 39.
Daktary adhavorvali zorku ad rodaŭ, uličvajučy ŭzrost i surjoznaść pieraniesienych traŭm. Ale jana nie pahadziłasia na abort i ŭ listapadzie 1975 hoda naradziła syna. Chłopiec, jakoha nazvali Źbihnievam, jak i tatu, pajšoŭ pa šlachu baćki i ŭ žyćci: jon staŭ navukoŭcam, daśledčykam historyi čyhunki. Jaho hałoŭnaj pracaj stała kniha «Technika na słužbie daktryny» pra płany pierakidvańnia vojskaŭ savieckaha błoku.
Hanna Hierman razam z synam Źbihnievam. Skryn videa Glosnadziei / YouTube
Chvaroba
Na piku papularnaści ŭ Hanny Hierman vyjavili rak kostki. Strašny dyjahnaz daktary pastavili ŭ siaredzinie 1970-ch hadoŭ. Uvosień 1980 hoda, paśla viartańnia śpiavački z kancertaŭ u Aŭstralii, byŭ recydyŭ zachvorvańnia. Ad vystupaŭ pryjšłosia admovicca. Siły končylisia. Śpiavačka nie mahła pakidać dom. Jaje muž zmušany byŭ zvolnicca z pracy dla taho, kab dahladać svaju kachanuju.
Hierman, dobry čałaviek pa žyćci, niahledziačy na ŭsie pakuty, u apošnija hady pryśviaciła siabie čytańniu Biblii, pisała psałmy i pieśni, pryśviečanyja Bohu, jakija zapisvała na chatni mahnitafon.
Hierman zrabili niekalki apieracyj. Daktary doŭha zmahalisia za jaje žyćcio, ale pieramahčy chvarobu nie zmahli. 25 žniŭnia 1982 hady śpiavački nie stała.
U adnym ź intervju Hanna Hierman skazała:
«Ja dumaju, što ŭ kožnaha z nas jość svaja zorka. Heta moža być kachańnie, praca, maciarynstva… Treba tolki zrabić usio, kab jaje źziańnie nie zhasła. Maja zorka — pieśnia».
Čytajcie jašče:
Byłaja palitźniavolenaja śpiavačka Meryjem Hierasimienka vystupiła z kancertam u Varšavie
