U Homielskim rajonie adstreł biazdomnych sabak daručyli palaŭničym
Ułady Homielskaha rajona ŭskłali adkaznaść za źniščeńnie sabak na Biełaruskaje tavarystva palaŭničych i rybałovaŭ (BTPR), jakoje ciapier uznačalvaje eks-ministr MUS Ihar Šunievič. Chacia zakon heta zabaraniaje, piša «Fłahštok».
Fota: vecteezy.com
Ab pierachodzie da adstrełu badziažnych sabak paviedamiła hazieta Homielskaha rajvykankama, kudy źviarnuŭsia žychar Ziabraŭki z pytańniem pra vialikauju kolkaść u pasiołku badziažnych sabak.
«Vyrašać pytańnie tradycyjnym adłovam akazałasia nieefiektyŭna, tamu jašče letaś vyrašylisia na kardynalnyja miery», — paviedamiła ŭ adkaz vydańnie — ciapier «pa damoŭlenaści ź Biełaruskim tavarystvam palaŭničych i rybałovaŭ patencyjna niebiaśpiečnyja žyvioły adstrelvajucca».
Pradstaviŭšysia miascovym žycharom, «Fłahštok» patelefanavaŭ u Ziabraŭski sielvykankam z prośbaj ukazać pravavyja padstavy. Staršynia Jaŭhien Nikicin paviedamiŭ, što takoje rašeńnie pryniata na ŭzroŭni rajona:
«Kali parušajecca niejkaja biaśpieka hramadzian, to heta dazvolena. … Jość rašeńnie [Homielskaha] rajvykankama. Jak u nas było ŭ Cahielni, čałavieka sabaki da śmierci zahryźli…. Heta było 4 hady ci 5 tamu».
U Nacyjanalnym rejestry pravavych aktaŭ takoje rašeńnie Homielskaha rajvykankama abo Savieta deputataŭ znajści nie ŭdałosia.
Situacyju z pravamiernaściu adstrełu bieznahladnych sabak «Fłahštok» paprasiŭ prakamientavać śpiecyjalista arhanizacyi «Ekadom»: «Mnie zdajecca, pad nieefiektyŭnaściu adłovu staršynia schavała niežadańnie vazicca z prytułkami, usypleńniem, dy i adsutnaściu narmalnych prytułkaŭ u rehijonach. I što značyć «patencyjna niebiaśpiečnyja»?
U Biełarusi kantrol kolkaści žyvioł rehuluje zakon — pałažeńnie «Ab paradku dziejnaści arhanizacyj pa adłovie, adstrele, utrymańni i eŭtanazii bieznahladnych žyvioł». U vyklučnych vypadkach pa rašeńni miascovych vykanaŭčych i rasparadčych orhanaŭ dapuskajecca adstreł bieznahladnych žyvioł u adpaviednaści z punktam 14 «Praviłaŭ utrymańnia svojskich sabak, katoŭ, a taksama adłovu bieznahladnych žyvioł u nasielenych punktach Respubliki Biełaruś».
Ale tut nie padobna na vyklučny vypadak. Jany prosta vyrašyli ŭ svaim rajonie zabić na praviły. Ale navat u vyklučnym vypadku hetym nie moža zajmacca niechta pabočny, navat BTPR».
Pa słovach śpiecyjalista, bryhady pa adłovie bieznahladnych žyvioł stvarajucca ŭ nasielenych punktach pry arhanizacyjach, vyznačanych miascovymi vykanaŭčymi i rasparadčymi orhanami. U nievialikich nasielenych punktach adłoŭ bieznahladnych žyvioł moža rabicca bryhadami ź inšych haradoŭ na dahavornaj asnovie.
«U pałažeńni jość pra ahresiŭnych i padazravanych u šalenstvie žyvioł, ale navat ich nie adstrelvajuć, a časova ŭsyplajuć!»
Surazmoŭca ŭdakładniaje, što ŭ adpaviednaści z punktam 13 tych ža praviłaŭ, ahresiŭnych bieznahladnych žyvioł, jakija padazrajucca ŭ šalenstvie, a taksama ŭ miescach, dzie niemahčyma prymianić pastki i inšyja sposaby adłovu, dazvalajecca ich časovaje ŭsypleńnie z dapamohaj śpiecyjalnych strelbaŭ sa strełami. Dozy lekavych preparataŭ vyznačajucca vieterynarnym rabotnikam. Rabotniki bryhad pa adłovie žyvioł pavinny prajści abaviazkovaje navučańnie pa abychodžańni sa śpiecyjalnymi strelbami.
«BTPR znoŭ šmat na siabie biare, jany zaraz i kolkaść miadźviedziaŭ kantralujuć, i sabak», — kaža surazmoŭca.
Čytajcie taksama:
«Heta čałaviek, jaki nie baicca kryvi». Šunievič raspavioŭ, jak źbirajucca vykarystoŭvać palaŭničych
«Kolkaść miadźviedziaŭ hałapuje ŭ našaj krainie». Šunievič prapanavaŭ šlachi vyrašeńnia prablemy
