Znajści
Ałharytmičny łacinski varyjant
15.01.2024 / 17:492RusŁacBieł

Ad pakazaŭ Victoria’s Secret i vokładak Vogue da zdymak u Safii Kopały. Biełaruskija madeli, jakija skaryli suśvietnyja podyumy

Mnohija ličać, što dziaŭčaty ź Biełarusi — adnyja z samych pryhožych u śviecie. Biełaruskija madeli ŭsio čaściej zavajoŭvajuć suśvietnyja podyumy, stanoviacca tvarami samych prestyžnych damoŭ mody i padpisvajuć uražvalnyja kantrakty. Pra samych viadomych ź ich raskazała Palatno.

Kaciaryna Damańkova — supiermadel śvietu i anioł Victoria's Secret

Kaciaryna Damańkova — dziaŭčyna, pra jakuju ŭ 2006 hodzie ŭ Biełarusi było čuvać z kožnaha prasa. Mienavita tady jana vyjhrała prestyžny konkurs «Supiermadel śvietu» i stała sapraŭdnaj zorkaj.

Kacia naradziłasia ŭ 1988 hodzie ŭ Minsku. Vučyłasia dziaŭčynka ŭ politechničnaj himnazii i maryła stać nie madellu, a hiennym inžynieram.

Usio źmianiła vypadkovaja sustreča ŭ kaviarni ź Siarhiejem Nahornym, zasnavalnikam samaj viadomaj u Biełarusi madelnaj škoły. Toj paraiŭ dziaŭčynie pasprabavać siabie na kastynhach, zaprasiŭ u svajo ahienctva i zrabiŭ prafiesijnaje partfolia. Tak Kacia atrymała svoj pieršy kantrakt i stała tvaram papularnaha tady mabilnaha apieratara DIALLOG.

Kacia Damańkova

Nieŭzabavie paśla hetaha pryjšła pieršaja zamiežnaja prapanova pracy, i dziaŭčyna palacieła ŭ Łondan, a potym u Paryž.

Vyznačalnym momantam u karjery biełaruski staŭ konkurs Supermodel of the World amierykanskaha ahienctva Ford. Dziaŭčyna jechała ŭ Ńju-Jork tolki z adnoj metaj — pieramahčy. Na samim šou pierad finalnym vychadam było šmat niervaŭ, pryčosku Kaci mianiali ažno try razy.

Padčas abviaščeńnia trojki finalistaŭ u hałavie ŭdzielnicy była adna dumka — tolki nie druhoje miesca. «Druhoje dla mianie było b samym kryŭdnym projhryšam, samym balučym z mahčymych scenaryjaŭ», — skaža paźniej dziaŭčyna ŭ intervju. Ale jaje abjaŭlajuć pieramožcaj, i ŭžo praz paŭhadziny Kacia telefanuje baćkam u Biełaruś i kryčyć u słuchaŭku: «Ja vyjhrała, mama! Ja pieramahła!» U tuju noč baćki bolš nie zasnuli, a ŭvieś nastupny dzień davali intervju na hałoŭnych kanałach krainy.

Kacia Damańkova

Dziakujučy Damańkovaj i jaje pieramozie, ahienctva Siarhieja Nahornaha atrymaje pryznańnie za miažoj i stanie hałoŭnym «pastaŭščykom» biełaruskich madelaŭ na podyumy Ńju-Jorka, Miłana i Paryža.

Paśla vyjhryšu Kacia zrazumieła, što joj treba budzie nadoŭha pierajechać u Amieryku i budavać karjeru. Było vielmi strašna. Dziaŭčyna niekalki hadoŭ žyła ź siabroŭkami ŭ nievialikaj zdymnaj kvatercy, biaskonca jeździła na kastynhi i stajała ŭ čerhach u čakańni, što jaje vybieruć. Usio išło niadrenna, Damańkova supracoŭničała ź viadomymi brendami (Armani, Calvin Klein, Oscar de la Renta, Carolina Herrera), zdymałasia dla hlancu (Marie Claire i Harper's Bazaar), ale vaŭ-kantrakt nijak nie padpisvaŭsia.

Kacia Damańkova

Ale ŭžo ŭ 2010 hodzie biełaruska dabiłasia taho pośpiechu, pra jaki maryć lubaja madel — stała aniołam Victoria's Secret. Heta adna z najvyšejšych stupieniaŭ u madelinhu, jak «Oskar» dla akciora ci «Hremi» dla muzykanta.

Paśla defile ŭ raskošnaj bialiźnie ad VS Damańkova stała atrymlivać vializnuju kolkaść prapanoŭ ad suśvietnych brendaŭ, ale mienavita tady karjeru daviałosia pastavić na paŭzu — Kacia vyjšła zamuž za rasijskaha miljardera i ŭładalnika futbolnaha kłuba «Redynh» Antona Zinhareviča. Razryvacca pamiž Maskvoj i Ńju-Jorkam było składana, tamu dziaŭčyna vybrała siamju i paralelna pastupiła ŭ MDIMZ na žurnalista, a ŭ 2013-m naradziła dačku Marusiu. Praz dva hady šlub raspaŭsia.

Ciapier Kaciaryna Damańkova žyvie na Kipry, zamužam za IT-biznesmienam i vychoŭvaje ŭžo čaćviarych dziaciej. Za hety čas jana paśpieła stvaryć internet-partał ab pryhažości i maciarynstvie BeautyHack.ru, a taksama razam ź inšaj viadomaj madellu, rasijankaj Natallaj Vadzianavaj, stać inviestaram biełaruskaha IT-prajekta dla žančyn Soula.

Jaŭhienija Katava — ad brydkaha kačaniaci da lubimicy Dolce & Gabbana

Ženia Katava naradziłasia ŭ 1994 hodzie ŭ Barysavie i nikoli nie zadumvałasia ab tym, kab stać madellu. Dziaŭčynka doŭhi čas zajmałasia płavańniem, ale praz prablemy sa zdaroŭjem joj pryjšłosia šukać inšy zaniatak.

U Domie kultury pačynaŭsia kastynh u «Škołu modnic», i Ženia vyrašyła paŭdzielničać. Vykładčyca tady prapanavała dziaŭčynie pasprabavać siabie ŭ jakaści madeli, ale taja była niaŭpeŭnienym, zakampleksavanym padletkam i spačatku ŭspryniała jaje słovy jak žart. Ženia ličyła siabie brydkim kačaniom i časta praz heta płakała. Tolki praź piać hadoŭ dziaŭčynu ŭhavaryli, i jana pajechała ŭ Minsk vučycca ŭ madelnuju škołu Siarhieja Nahornaha.

Jašče adnoj pryčynaj dla pierajezdu ŭ stalicu stała žadańnie źbiehčy dalej ad adnakłaśnikaŭ, jakija dražnili i kryŭdzili Ženiu za vysoki rost i chudziznu: «Usio žyćcio ja čuła razmovy za śpinaj. Ja była chudaja, jak hlist, ź vialikimi brovami, jakija ja ŭvieś čas sprabavała schavać za hryŭkaj, i naohuł na fonie siabrovak hladziełasia vielmi niedarečna. Heta byŭ ceły kvest — apynucca dalej ad škoły, ad niadobrych ludziej, jakija mianie tady atačali».

Pieršuju sapraŭdnuju pracu Katava atrymała ŭ 16 hod na Tydni mody ŭ Polščy. A ŭžo ŭ 2011 hodzie madel pierajechała ŭ Ńju-Jork i ŭziała bolš zručny dla anhlijskaj movy psieŭdanim Zhenya Katava. Da taho času ŭ partfolia Ženi było tolki niekalki zdymak, tym nie mienš jaje adrazu adpravili na podyum.

Zusim chutka dziaŭčynu pačnuć nazyvać biełaruskaj Ajšvaryjaj Raj za padobnyja rysy tvaru i nievierahodna pryhožyja vočy. Ale Ženi takoje paraŭnańnie nie vielmi padabajecca, jana ličyć, što bolš padobnaja da Iryny Šejk i Miły Kunis.

Dziaŭčyna pražyła ŭ Ńju-Jorku da 2018 hoda. Za hety čas jana paśpieła pabyvać na vokładkach hlancu i papracavać sa šmatlikimi suśvietnymi brendami, siarod jakich Armani, Karl Lagerfeld, Vivienne Westwood, Bottega Veneta, Mark Jacobs. A jašče biełaruska stała sapraŭdnaj muzaj Dolce & Gabbana i rehularna źjaŭlałasia na ich pakazach.

Sapraŭdnym praryvam u karjery staŭ kantrakt ź Ćjery Miuhleram — Katava stała tvaram jaho kultavych duchoŭ Aura Mugler. Hetaj pracaj dziaŭčyna hanarycca bolš za ŭsio. Ale niahledziačy na pośpiech, u intervju jana budzie časta paŭtarać: «Ja nie liču siabie niejkim zvyšnaturalnym stvareńniem. Tak, ja viedaju, što simpatyčnaja, što čahości dabiłasia. Ale nie staŭlu siabie vyšej za inšych».

Ženia Katava

U 2018 hodzie Ženia pryjazdžaje ŭ Minsk adpačyć. U Amierycy jana tolki što razyšłasia z chłopcam — Arturam Kulkovym, adnym z samych vysokaapłatnych maniekienščykaŭ śvietu. Vypadkova dziaŭčyna ŭspaminaje pra svajho daŭniaha prychilnika, ź jakim paznajomiłasia ŭ sacsietkach. Jany damaŭlajucca ab sustrečy i z taho dnia razam.

Novym vybrańnikam madeli staŭ Vital Jacuk, spadčyńnik sietki mahazinaŭ «Vitalur». Jon atačyŭ Ženiu takoj uvahaj, što taja pieradumała viartacca ŭ ZŠA. Letam 2021 hoda para zhulała viasielle, a ŭ lutym 2023-ha ŭ ich naradziłasia dzicia. Katava całkam pryśviaciła siabie siamji i viartajecca da pracy madeli vielmi redka.

Maryna Linčuk — vokładki Vogue i zdymki ŭ Safii Kopały

Maryna naradziłasia ŭ Minsku ŭ 1987 hodzie. Siamja pieršyja časy žyła vielmi biedna i tuliłasia ŭ kamunałcy. Z časam ajčym zaniaŭsia aŭtabiznesam, źjavilisia hrošy, i baćki kupili svaju kvateru.

U 12 hadoŭ dziaŭčynka za kampaniju pajšła ź siabroŭkaj na kastynh u madelnaje ahienctva «Tamara». Jak heta časta byvaje, vybrali mienavita jaje, a nie siabroŭku. Maryna tady vielmi ździviłasia, bo zaŭsiody ličyła siabie «batanam», nijak nie pryhažuniaj, i naohuł źbirałasia pastupać na doktara ci jurysta. Ale žyćcio rasparadziłasia pa-inšamu.

Maryna Linčuk

Praz hod Maryna ŭpieršyniu trapiła na pakaz u Maskvu, kudy praź niekatory čas pierajechała i zaklučyła kantrakt z madelnym ahienctvam IQ Models. Praź niekalki miesiacaŭ joj prapanavali pracu ŭ madelnym ahienctvie Japonii, dzie Maryna prapracavała dva z pałovaj hady. Žyć u zusim inšaj kultury było składana, da ŭsiaho dziaŭčyna nie mahła spakojna vyjści na vulicu — vysokaja błandzinka pastajanna źbirała kala siabie natoŭp raziavak.

Biełaruska nie zdavałasia, nabirałasia vopytu i ŭmudryłasia za taki karotki termin praktyčna daskanała vyvučyć japonskuju movu. Paśla zakančeńnia kantrakta ŭ 2005 hodzie dziaŭčyna pajechała pracavać u ZŠA i pasialiłasia ŭ Ńju-Jorku.

Pierałomnym momantam u karjery biełaruski stała fotasiesija ŭ lehiendy fashion-fatahrafii Styviena Majzieła ŭ 2007 hodzie. Paśla hetych zdymkaŭ Marynie stali prapanoŭvać supracoŭnictva Christian Dior, Versace, Dolce & Gabbana i inšyja znakamityja brendy. Usiaho za dva hady Linčuk damahajecca statusu supiermadeli i ŭ 2009 hodzie ŭvachodzić u śpis «30 samych upłyvovych madelaŭ śvietu» pa viersii francuzskaha Vogue, pobač z Žyzel Bundchien i Natallaj Vadzianavaj.

Ad 2008-ha Maryna niekalki razoŭ stanovicca tvaram brendaŭ Escada i Dior i rehularna vystupaje na modnych pakazach kalekcyj ad Givenchy, Gucci, Alexander McQueen, Versace, Valentino, Chanel, Louis Vuitton, Yves Saint Laurent, Roberto Cavalli — śpis možna praciahvać biaskonca. Śledam iduć vokładki Vogue, ELLE i Harper's Bazaar i zdymki ŭ Safii Kopały spačatku ŭ roliku parfumaŭ Miss Dior Chérie, a paźniej u filmie «Dzieści», premjera jakoha adbyłasia na Kanskim kinafiestyvali.

Maryna Linčuk

Ciapier Maryna zamužam za amierykanskim biznesmienam, praciahvaje žyć u ZŠA i vychoŭvaje dźviuch dačok. Zredku biełaruska ŭdzielničaje ŭ pakazach. Naprykład, u lutym 2023 hoda 35-hadovaja Linčuk prajšłasia pa podyumie na adkryćci Tydnia mody ŭ Ńju-Jorku.

Jašče adnym lubimym zaniatkam dla top-madeli stali padkasty — razam sa svajoj kalehaj Hintaj Łapinia Maryna zapuściła šou «the Extra Stitch», u jakim adkryta raskazała pra karjeru ŭ madelnym biźniesie i sumiaščeńni jaje z rollu mamy.

Volha Šerer — muza Armani i niaviestka Stefana Habana

Volha naradziłasia ŭ 1987 hodzie ŭ Minsku. Madelnuju karjeru dziaŭčyna pačała ŭ 2005 hodzie z udziełu ŭ biełaruskich Tydniach mody. Adnak sapraŭdnym startam možna ličyć 2007 hod, kali jana zaklučyła kantrakt z madelnym ahienctvam New York Model Management i vielmi chutka stała tvaram Lanvin i Kenzo.

Pačatak karjery byŭ składanym. Naprykład, trapić u abjektyŭ topavaha fatohrafa było amal nierealna praź vielizarnuju kankurencyju. Treba było abaviazkova dobra vystupić na tydni mody, kab paźniej ciabie abraŭ niechta z kastynh-dyrektaraŭ Styviena Majzieła, Bena Chaseta ci Cima Uokiera. A praca ź imi — heta dźviery ŭ śviet vysokaha hlancu. Volzie ŭdałosia źviarnuć na siabie ŭvahu, i dziaŭčyna stała adnoj ź ich ulubionak.

U nastupnyja niekalki hadoŭ Šerer ličycca adnoj z najbolš paśpiachovych madelaŭ. Jaje hrafik raśpisany pa chvilinach, a partfolia rehularna papaŭniajecca rekłamnymi kampanijami dla Bottega Veneta, Ralph Lauren, Louis Vuitton, Christian Dior, Rick Owens, Alexander McQueen, Dior i Hermès.

U 2011 hodzie padčas dabračynnaj fotasiesii dla Dolce&Gabbana Šerer znajomicca z Maŭrycya Habana — supracoŭnikam kampanii D&G, talenavitym fatohrafam i bratam taho samaha Stefana Habana. Paśla troch hadoŭ adnosin u pary naradžajecca syn Valerya Mikałaj Habana.

Volha Šerer

Padčas ciažarnaści Volha nie płanavała pracavać, choć i była vielmi zapatrabavanaj. Amal ad usich pakazaŭ Haute Couture madel admoviłasia, bo bajałasia harsetaŭ, jakija mohuć cisnuć na žyvot. Ale dla Džordžya Armani zrabiła vyklučeńnie — jana daŭno stała dla jaho sapraŭdnaj muzaj. Biełaruska pryvabiła maestra nievierahodnaj krochkaściu i rudym koleram vałasoŭ — mienavita ź jaho padačy ŭ modnych kołach jaje stali nazyvać «rudoj šelmaj».

Armani chacieŭ bačyć na svaim pakazie One Night Only Rome tolki Volhu, jaho nie biantežyŭ navat jaje piacimiesiačny žyvot. Kali dziaŭčyna prymiarała adzin ź pinžakoŭ, a toj nijak nie zašpilvaŭsia, Džordžya kryčaŭ joj: «Prosta ŭdychni! Jašče macniej!»

Paśla naradžeńnia dziciaci Volha viarnułasia na podyum. Maciarynstva nie pieraškodziła joj praciahnuć karjeru madeli, i dziaŭčyna vielmi hetym hanarycca. Ciapier biełaruska žyvie ŭ Miłanie z mužam i synam, praciahvaje zdymacca dla vokładak Vogue, Harper's Bazaar i Elle i pracavać na pakazach suśvietnych brendaŭ.

Taćciana Dziahileva — samaja seksualnaja biełaruska

Tania Dziahileva naradziłasia ŭ Viciebsku ŭ 1991 hodzie. U dziacinstvie dziaŭčynka zajmałasia baletam, va ŭzroście 11 hadoŭ jaje zaŭvažyŭ skaŭt madelnaha ahienctva, i ŭžo ŭ 14 Tania ŭpieršyniu pryniała ŭdzieł u Tydni mody ŭ Miłanie. Debiut prajšoŭ paśpiachova, i adrazu paśla pieršych pakazaŭ biełarusku zasypali kantraktami suśvietnyja brendy. U 2006 hodzie jana ŭžo nasiła status «supiermadel».

Taćciana Dziahileva

Ad taho ž hoda Dziahileva pracuje na pakazach Chanel, Christian Dior, Hermès, Versace, Prada, Donna Karan, Calvin Klein. A praz toje, što dla inšaziemcaŭ słavianskija proźviščy składanyja ŭ vymaŭleńni, biełaruska stanovicca dla ŭsich Taniaj Dzi (Tanya D).

Dziahileva vyłučajecca siarod inšych madelaŭ svajoj jarkaj inšapłanietnaj źniešnaściu. Tvar «elfa» dazvoliŭ dziaŭčynie nie tolki skaryć vysoki podyum, ale i rehularna źjaŭlacca na vokładkach hlancu.

Cikava, što z usich «pryšelcaŭ» mienavita Taniu mnohija modnyja ekśpierty nazyvajuć samaj pryhožaj. U 2010 hodzie časopis Esquire, jaki stvaryŭ seksualny atłas płaniety Ziamla, nazvaŭ madel samaj seksualnaj uradženkaj Biełarusi. A jašče jana ŭvachodzić u vaśmiorku samych strojnych madelaŭ (tak, jość i takija rejtynhi). Darečy, dziaŭčyna nikoli nie siadzieła na dyjetach, taki ciełaskład pieradaŭsia joj ad baćkoŭ.

Taćciana Dziahileva

Taćciana Dziahileva ličycca adnoj z samych pracavitych madelaŭ. U niekatoryja siezony jana moža ŭdzielničać u bolš čym sotni pakazaŭ, što źjaŭlajecca rekordnaj kolkaściu navat dla takich zapatrabavanych zorak, jak Naomi Kempbieł abo Kiejt Mos.

Biełaruska niekalki razoŭ stanaviłasia tvaram kampanij Hugo Boss, Yves Saint Laurent i Jean Paul Gaultier, adkryvała i zakryvała šou Celine Elie, Saab i Nina Ricci, a taksama zdymałasia ŭ samych viadomych suśvietnych fatohrafaŭ. Jana nastolki natchniłasia pracaj ź imi, što sama stała vučycca mastactvu fatahrafii. Akramia taho, dziaŭčyna vyvučyłasia na dyzajniera ŭ Miłanie i skončyła biznes-škołu.

Viadomaja Dziahileva i svaim burnym asabistym žyćciom. Adzin z samych hučnych jaje ramanaŭ — adnosiny z rasijskim aliharcham Dźmitryjem Rybałoŭlevym. Toj časta ŭ intervju kazaŭ pra Taniu, što jana była ledź nie adzinaj jaho dziaŭčynaj, jakaja nie palavała na jaho hrošy.

Ciapier biełaruska žyvie ŭ Paryžy, zajmajecca fashion-fatahrafijaj i sumiaščaje pracu madeli i dyzajniera-stylista.

Čytajcie taksama:

Jak vyhladaje i čym zajmajecca biełaruska, jakaja ŭ 1990-m atrymała karonu «Mis SSSR»

Chto składaŭ biełaruski bamond 1990-2000-ch i što stałasia z hetymi ludźmi

Nie budź jak Saładucha. Što nie tak z «jadziernym» adbielvańniem zuboŭ

Dziaŭčaty, jakija jeździli z Łukašenkam u AAE dziesiać hadoŭ tamu — chto jany?

Nashaniva.com

Chočaš padzialicca važnaj infarmacyjaj
ananimna i kanfidencyjna?

Клас
24
Панылы сорам
0
Ха-ха
1
Ого
0
Сумна
2
Абуральна
4
2
Ojvej/adkazać/
15.01.2024
Dy niejak nasrać, kali česna. Hetkich pustych ruskamirnych lalek - proćmy. 
1
Chiejt/adkazać/
15.01.2024
A ja pra Marho zadumaŭsia 🥰
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera