Žurnalistam viadomyja imiony ŭžo 40 tysiač zahinułych rasijskich vajskoŭcaŭ
Siaredniestatystyčny partret zahinułaha rasijskaha sałdata istotna źmianiŭsia.
Ukrainski bronietransparcior viadzie ahoń pa rasijskich pazicyjach blizu Aŭdziejeŭki ŭ Danieckaj vobłaści, 28 krasavika 2023 hoda. Fota: AP / Libkos
«Miedyjazona» i Bi-bi-si praciahvajuć vieści ŭlik strataŭ rasijskaj armii ŭ vajnie z Ukrainaj. Žurnalistam viadomy imiony ŭžo bolš jak 40 tysiač zabitych rasijskich sałdat.
Straty ŭ 2023 hodzie byli ŭ paŭtara razu vyšejšyja, čym u 2022-m. Minimum 15 520 vajskoŭcaŭ zahinuli letaś i 24 100 sioleta.
Što admietna: u 2023 hodzie dźvie traciny zahinułych — ludzi, jakija da pačatku poŭnamaštabnaj vajny nie byli źviazany z armijaj (dobraachvotniki, mabilizavanyja, byłyja źniavolenyja).
Siaredniestatystyčny zahinuły rasijski vajskoviec — 34-hadovy źniavoleny, jaki pajechaŭ na vajnu z kałonii. U 2022-m partret byŭ inšy — 21-hadovy sałdat-kantraktnik.
Acalełych u pieršy hod vajny desantnikaŭ i śpiecnazaŭcaŭ vajennaje kamandavańnie ciapier, naadvarot, starajecca bierahčy, vykarystoŭvajučy ich dla ŭtrymańnia pazicyj i snajpierskich apieracyj. Kaštoŭnych śpiecyjalistaŭ ciapier adpraŭlajuć u nastup tolki pry najaŭnaści spryjalnych umoŭ, adznačajuć ekśpierty.
Najbolšyja straty za ŭvieś čas vajny Rasija paniesła zimoj 2023 hoda — padčas sproby nastupu na Danbasie. Ź siaredziny śniežnia pa sakavik temp pryrostu strat u dva razy pieravyšaŭ siarednija pakazčyki 2022 hoda.
Pa absalutnaj kolkaści zahinułych lidzirujuć Krasnadarski kraj, Śviardłoŭskaja vobłaść, Baškartastan i Čelabinskaja vobłaść. Ale kali pieraličyć danyja z ulikam ščylnaści mužčynskaha nasielnictva ŭ kožnym rehijonie, to śpis atrymajecca inšym.
Dla žycharoŭ Tuvy i Buracii vierahodnaść być zabitym na vajnie va Ukrainie ŭ hetym hodzie była ŭ 30-40 razoŭ vyšejšaj, čym dla maskvičoŭ.
Adnak u hety ž čas bolšaść vajskoŭcaŭ, jakija zahinuli va Ukrainie, — heta słavianie i, u pieršuju čarhu, ruskija.
Bolš za toje, sioleta dola słavianskich imionaŭ siarod zahinułych rasła. Uviesnu 2022 hoda jana składała 75%, a praz hod — užo 85%.
Daśledčyki źviazvajuć heta z mabilizacyjaj i naboram na front źniavolenych.
