U aŭtamabili, jaki prybyŭ u Łatviju ź Biełarusi, znajšli tajniki na dystancyjnym kiravańni
Supracoŭniki mytnaha ŭpraŭleńnia Słužby dziarždachodaŭ Łatvii (VID) pry praviercy lehkavoha aŭtamabila, jaki prybyŭ ź Biełarusi, vyjavili tajniki, u jakich sprabavali pravieźci 1800 pačkaŭ kantrabandnych cyharet.
Fota: VID
Mytniki adznačyli, što tajniki pracavali z dapamohaj pulta dystancyjnaha kiravańnia, piša Delfi.lv.
14 śniežnia na KPP «Paternijeki» (ź biełaruskaha boku — «Hryharaŭščyna») ź Biełarusi zajechaŭ aŭtamabil, jakim kiravaŭ hramadzianin Litvy.
Supracoŭniki mytni nakiravali mašynu na renthien. Analizujučy atrymanyja vyjavy, supracoŭniki Słužby dziarždachodaŭ zapadozryli, što ŭ kanstrukcyi kuzava moža być schavany niezadekłaravany tavar. Da pravierki dałučyŭsia kinołah z sabakam, navučanym pošuku tytuniovych vyrabaŭ.
U vyniku mytniki vyjavili, u transpartnym srodku śpiecyjalna abstalavanyja schovanki. Jany raźmiaščalisia pa abiedźviuch ścienkach bahažnaha adździaleńnia pad ašaloŭkaj i byli abstalavanyja elektronnymi pieramykačami, jakija dazvalajuć adčyniać ich dystancyjna.
Mytnikam udałosia kanfiskavać 16 000 cyharet «NZ Gold» i 20 000 cyharet «Minsk capital QS» ź biełaruskimi akcyznymi markami.
