50 adcieńniaŭ Kučynskaha. Daradca Cichanoŭskaj raspavioŭ pra svaje halštuki
Na fatahrafijach Śviatłany Cichanoŭskaj z zamiežnych kamandzirovak časta milhaje Dzianis Kučynski, jaje daradca pa pytańniach dypłamatyi. Jaho vyraznyja halštuki adrazu pryciahvajuć uvahu. Prapanujem vašaj uvazie padborku samych cikavych ź ich.
Dzianis Kučynski na kanfierencyi «Novaja Biełaruś», 2022 hod. Fota: «Naša Niva»
U śviecie dypłamatyi, dzie ŭsio padparadkavana strohim praviłam dres-kodu, praktyčna nie zastajecca miesca dla prajavy svajho stylu. Adzinaja ščylina — jarkija i zapaminalnyja aksiesuary.
Hulnia ź imidžam
Byłaja dziaržsakratarka ZŠA Madlen Ołbrajt pieratvaryła svaje broški ŭ nievierbalnaje pasłańnie surazmoŭcam. Naprykład, na adnu z sustreč, na jakoj abmiarkoŭvalisia składanyja adnosiny ZŠA i Iraka, jana nadzieła aksiesuar sa źmiajoj.
Fota: Vogue.ua
U hetym žeście chavaŭsia tonki pasył: irakskija ŚMI, jakija całkam kantralavalisia ŭradam Sadama Chusejna, paraŭnoŭvali Ołbrajt z «niepieraŭzydzienaj źmiajoj» — nadzieŭšy brošku, palityk prademanstravała svaju vytrymku i dobraje razumieńnie paradku dnia.
Mužčyny, kamplekty adzieńnia jakich pavinny adpaviadać pratakołu, u jakaści «krasamoŭnaha» aksiesuara časta vybirajuć škarpetki.
Premjer-ministr Kanady Džaścin Trudo (źleva). Fota: instahram dziejača
Premjer-ministra Kanady Džaścina Trudo navat nazyvajuć pačynalnikam «škarpetačnaj dypłamatyi». Tak, na adnym z samitaŭ NATA, jaki prachodziŭ u Bruseli, žadajučy padkreślić, što intaresy aljansu pavinny stajać vyšej za nacyjanalnyja, palityk nadzieŭ škarpetki ź simvolikaj arhanizacyi.
Truk sa škarpetkami, imavierna, sprabavaŭ prakrucić i biełaruski dziejač Alaksandr Azaraŭ. Praŭda, chod akazaŭsia niaŭdałym.
Cichanoŭskaja, Viačorka i Azaraŭ na kanfierencyi «Novaja Biełaruś», 2023 hod. Fota: fejsbuk Siarhieja Padsasonnaha
Ale dadać piercu ŭ łuki možna i inakš. Naprykład, Dzianis Kučynski, daradca Śviatłany Cichanoŭskaj pa pytańniach dypłamatyi, zapaminajecca svaimi halštukami. Raskazvajem, jak jany trapili ŭ jaho harderob.
Što na šyi ŭ Kučynskaha
Nabor halštukaŭ Kučynskaha skłaŭsia vypadkova, a jaho sapraŭdnaje zachapleńnie — kalekcyja škarpetak z karcinami Marka Šahała.
«Ich ja admysłova šukaju, tamu što lublu tvorčaść hetaha mastaka: 8-9 par škarpetak u mianie ŭžo jość. A što tyčycca halštukaŭ — kali ŭ harnitury ty pavinien być 80% svajho času, to, zrazumieła, hety vyrab dadaje vobrazu niejkuju raznastajnaść»,
— raskazvaje jon.
Fota: Ofis Śviatłany Cichanoŭskaj
«Abirać kankretny aksiesuar pad kožnuju kamandziroŭku nie atrymlivajecca. Čaściej za ŭsio ty kidaješ u čamadan niekalki harnituraŭ, niekalki halštukaŭ i paśla, na miescy, užo ź imi raźbiraješsia. Ale byvajuć vypadki, kali ja paśpiavaju pra heta padumać.
Naprykład, na kanfierencyju «zialonych» u Hiermaniju ja ŭziaŭ halštuk sa słaniečnikami — hetaja raślina źjaŭlajecca simvałam adpaviednaj partyi. Kali my byli na sustrečy z Robiertam Chabiekam, vice-kancleram krainy, jon adrazu jaho zaŭvažyŭ i skazaŭ, što hety aksiesuar vielmi simvaličny».
Fota: Ofis Śviatłany Cichanoŭskaj
Daradca praciahvaje: «Uvohule, halštuk sa słaniečnikami časta źviartaje na siabie ŭvahu, bo jon vykanany u žoŭta-błakitnych adcieńniach. Kali ja nadziavaŭ jaho na vizity ŭ Šviecyju, šviedy adznačali: «O, aksiesuar u našych kolerach». Na što ja kazaŭ: «Biezumoŭna, u vašych, ale jašče i ŭ kolerach Ukrainy».
Fota: Facebook dziejača
Ja razumieju, što heta moža hučać dziŭna ci prastavata, ale vielmi časta da takich elemientaŭ — da koleraŭ, da nacyjanalnaj simvoliki — šmat uvahi».
Dzianis zhadvaje, jak u 2015-2016 hodzie ŭ jaho źjaviŭsia halštuk z elemientami vyšyvanki.
«Na adnym z pryjomaŭ jon tak spadabaŭsia adnamu z ambasadaraŭ, što pryjšłosia jamu jaho padaravać».
U Łondanie daradca nadziavaŭ bardovy aksiesuar z uzoram, što nahadvaŭ vienzieli na tekstyli, jakim upryhožvali damy anhlijskaj šlachty. Niahledziačy na bahaty vyhlad, kaštuje taki halštuk niadoraha:
Fota: Facebook dziejača
«U mianie niama halštukaŭ daražejšych za 20-30 dalaraŭ, akramia adnaho. Samy darahi — ź vitražami Šahała, jakija mastak rabiŭ u Čykaha. Jon kaštuje 45 dalaraŭ i, pa sumiaščalnictvie, źjaŭlajecca adnym z maich samych lubimych. Kali ludzi zaŭvažajuć tvorčaść mastaka, jany pra jaje pytajucca, i heta dobraja nahoda, kab zaviazać small talk. Zvyčajna ja raskazvaju, što Šahał naradziŭsia ŭ Viciebsku. Šmat ludziej hetaha nie viedajuć: im zdajecca, što Šahał — rasijska-francuzski tvorca».
Fota: archiŭ Dzianisa Kučynskaha
Palityk časta spałučaje kłasičny harnitur z vyraznymi aksiesuarami. Na pytańnie, ci nie parušaje heta dypłamatyčny pratakoł, Kučynski adkazvaje: «Dres-kod u śfiery, dzie ja pracuju, isnuje, ale jarkija halštuki hetamu nie supiarečać. U mianie ž niama vyrabaŭ z kupiurami dalaraŭ ci Donaldam Dakam».
Fota: Ofis Śviatłany Cichanoŭskaj
Kab nie apynucca ŭ niepryjemnaj situacyi i nie padvieści delehacyju, treba dobra raźbiracca ŭ farmatach sustreč i ŭmieć chutka reahavać na mahčymyja źmieny:
«Niekali my sa Śviatłanaj sustrakalisia ŭ Afinach z Donaldam Tuskam. U nas była zapłanavana viačera, na jakuju my pryjšli ŭ harniturach. Kali sieli za stoł, u niejki momant spadar Tusk kaža: «U nas ža siabroŭskaja hutarka, tamu nie treba prytrymlivacca pratakoła». Tady halštuki źniali ŭsie: ja, Franak i, viadoma, sam Tusk».
Sustreča biełaruskaj delehacyi z Donaldam Tuskam. Fota: archiŭ Dzianisa Kučynskaha
Zamiežnyja dziejačy taksama vykarystoŭvajuć adzieńnie jak elemient nievierbalnaj kamunikacyi. Časta jany padbirajuć svaje łuki dla sustreč sa Śviatłanaj Cichanoŭskaj i jaje paplečnikami:
«Pakolki ja adkazvaju za publičnuju dypłamatyju, ja zvažaju na takija rečy. Dypłamaty ci palityki, jakija prychodziać na sustrečy sa Śviatłanaj Cichanoŭskaj, nadziavajuć čyrvonyja halštuki i majuć biełuju kašulu — u vyniku atrymlivajecca spałučeńnie «bčb». Jany śpiecyjalna heta robiać, kab pakazać svaju padtrymku».
Fota: Ofis Śviatłany Cichanoŭskaj
Čytajcie taksama:
Što ŭ harderobie Śviatłany Cichanoŭskaj i kolki kaštuje
Što nadzieć na karparatyŭ. Ubory ad biełaruskich dyzajnieraŭ na luby hust i kašalok
Darahija žančyny! Što nosiać niaviestki Łukašenki i kolki kaštuje ich harderob
