Ukrainka z rasijskim pašpartam źbiraje «Minsk-Arenu». Try razy zapar
Rasijskaja śpiavačka Anna Asti źbiraje anšłahi ŭ «Minsk-Arenie» — i nie adzin, a try! Jana vystupaje ŭ 15-tysiačnym kompleksie 6, 7 i 8 śniežnia, i ŭsie bilety na kancerty daŭno raskuplenyja.
Fota: a.lobko_2421 / Instagram
Pieršy kancert Anna Asti prajšoŭ u «Minsk-Arenie» 6 śniežnia. Adtul raźlacielisia videa, jak usia zała śpiavaje pieśni vykanaŭcy, a taja ad zachapleńnia płača.
Častkova anšłah na kancertach Anna Asti možna patłumačyć tym, što ŭ Biełarusi ciapier prachodzić vielmi mała kancertaŭ takoha farmatu. Pahladzicie na afišu na najbližejšyja miesiacy: z pop-muzyki, akramia siońniašniaj rekardsmienki, tut tolki biełaruskaja «Pieśnia hoda» i Uładzimir Praśniakoŭ. Dla minčukoŭ, jakim chočacca prostaha adpačynku, vybar vidavočny.
Ale Anna Asti nasamreč vielmi papularnaja ŭ biełarusaŭ.
U kancy vieraśnia śpiavačku pryznali artystkaj, za tvorčaściu jakoj biełarusy bolš za ŭsio nazirali ŭ YouTube. A jaje trek «Carica» znachodzicca ciapier na 7 pazicyi ŭ rejtynhu top-50 u Biełarusi ad muzykalnaha dadatku Spotify.
Tvorčaść Anna Asti časta šukajuć praz muzykalny servis Shazam — pa hetym paramietry jaje «Carica» na čaćviortym miescy ŭ adpaviednym topie. A ŭ biełaruskim top-100 ad Apple Music hety ž trek śpiavački ažno na druhoj pazicyi.
33-hadovaja Anna Asti rodam z ukrainskich Čarkasaŭ, jaje sapraŭdnaje imia — Hanna Dziuba. Z 2010-ha da 2021-ha Dziuba vystupała ŭ duecie Artik & Asti razam z ukrainskim pradziusaram, kampazitaram i śpievakom Arciomam Umrychinym. U 2021-m Asti pačała solnuju karjeru.
Hod tamu jana vypuściła albom «Fieniks», dla jakoha ŭ tym liku zapisała pieśniu «Chobbi» razam ź Filipam Kirkoravym. U śniežni 2022-ha dziaŭčyna ŭžo vystupała ŭ Minsku solna, a ciapier jana znoŭ u Biełarusi.
Ukrainskija miedyja krytykavali Anna Asti za jaje maŭčańnie nakont rasijskaha napadu na Ukrainu. U kastryčniku 2023-ha stała viadoma, što śpiavačka atrymała rasijski pašpart.
«Naša Niva» — bastyjon biełaruščyny
PADTRYMAĆ
