«Ciapier zrabić pryščepku niama mahčymaści». U Biełarusi — rost zachvorvańniaŭ na adzior, ale jość prablemy z vakcynacyjaj
Pa danych Minzdaroŭja, za hety hod zarehistravana 140 vypadkaŭ zaražeńnia adrom. A ź listapada nazirajecca ŭzdym zachvorvańnia — užo zarehistravana bolš za 90 vypadkaŭ. Miedyki nahadvajuć baćkam pra vakcynacyju, adnak čytačy Onliner.by paviedamlajuć pra pieraboi z vakcynami ŭ dziciačych paliklinikach.
Ilustracyjnaje fota
Što kažuć u Ministerstvie achovy zdaroŭja?
Ciapier adzior rehistrujuć u Bresckaj, Homielskaj, Minskaj abłaściach i Minsku. Na dziaciej prypadaje 48% vypadkaŭ zaražeńnia. Takija źviestki ŭčora apublikavała Ministerstva achovy zdaroŭja.
Miedyki adznačajuć, što ŭ zonie ryzyki — niepryščeplenyja. Na ich prypadaje 74% vypadkaŭ zachvorvańniaŭ. A siarod chvorych dziaciej hety pakazčyk uźlataje da 90%. Ale treba zrabić paznaku: u statystyku traplajuć nie tolki dzieci, pryščepku jakim vyrašyli nie rabić baćki. Uklučajuć i tych, kamu jaje rabić niamožna praz uzrost (maładziejšyja za adzin hod).
Jak piša Ministerstva achovy zdaroŭja, śpiecyfičnaha lačeńnia adru niama. Tamu vakcynacyja zastajecca «samym biaśpiečnym i efiektyŭnym sposabam abarony» — APK (kambinavanaja vakcyna ad adru, paratytu i krasnuchi) uvachodzić u nacyjanalny kalandar prafiłaktyčnych pryščepak, i jaje robiać biaspłatna. Dziaciej pryščaplajuć dvojčy: u 1 hod i 6 hadoŭ. Ličycca, što paśla ŭviadzieńnia adnoj dozy bolš jak u 95% dziaciej farmujecca doŭhačasovy imunitet, paśla druhoj — amal u 100%.
«Ciapier zrabić pryščepku niama mahčymaści»
Pry hetym čytačy paviedamlajuć pra pieraboi z pastaŭkami vakcyny ŭ paliklinikach i pryvatnych centrach. U Darji dvoje dziaciej, 2 i 6 hadoŭ. Starejšuju dačku baćki pryščapili pa kalendary vakcynacyi — u hod. Małodšaje dzicia nazirałasia ŭ pryvatnym centry, dzie raniej była dastupnaja kompleksnaja vakcyna. Ale doŭhi čas jaje niama ŭ najaŭnaści. Tady baćki vyrašyli aformicca ŭ paliklinicy pa miescy žycharstva i zrabić biaspłatnuju pryščepku małodšaj dziaŭčyncy.
«Pryjšli naviny ad baćkoŭ adnakłaśnikaŭ, što ŭ paralelnym kłasie vyjavili vypadak zachvorvańnia na adzior. Razumiejučy ŭsiu surjoznaść zachvorvańnia, ja chacieła terminova pryščapić małodšuju. U paliklinicy pa miescy prapiski nas pastavili ŭ čarhu i paviedamili, što pieraboi ŭ pastaŭcy vakcyny doŭžylisia bolš za paŭhoda, tamu dziaciej u śpisie davoli šmat. Pryviezienych u listapadzie doz nie chopić. Tamu zrabić pryščepku ciapier mahčymaści niama», — napisała čytačka.
Onliner.by patelefanavaŭ u palikliniku, dzie nazirajucca dzieci Dašy, kab daviedacca pra najaŭnaść vakcyny. Vakcyny ciapier sapraŭdy niama, ale abiacajuć, što pieryjadyčna jana budzie źjaŭlacca.
A jak u inšych paliklinikach?
Onliner.by abtelefanavaŭ 12 dziciačych paliklinik horada. U vaśmi ź ich vakcyna ŭ najaŭnaści jość, u adnu pastupić siońnia. A voś u troch ustanovach pryščapicca pakul nielha. U pryvatnych miedcentrach situacyja składaniejšaja. Žurnalisty źviarnulisia ŭ try — vakcyny niama ŭ nivodnym. Dakładnych terminaŭ pastupleńnia preparataŭ tam nie nazvali.
