Va Ukrainie aryštavali hramadzianina Biełarusi za pieradaču infarmacyi ab padrychtoŭcy da abarony na miažy
Jon naradziŭsia i žyvie ŭ Rovienskaj vobłaści Ukrainy.
Va Ukrainie zatrymali i aryštavali na dva miesiacy hramadzianina Biełarusi, jaki naradziŭsia i žyvie ŭ Rovienskaj vobłaści, pa padazreńni ŭ pieradačy infarmacyi pra pieramiaščeńnie žyvoj siły i vajskovaj techniki dla abarony pamiežnaj ź Biełaruśsiu ŭkrainskaj terytoryi, piša «Radyjo Svaboda».
Jak adznačajecca ŭ apublikavanym u Adzinym dziaržaŭnym rejestry Ukrainy sudovym rašeńni, raniej jon užo byŭ asudžany za apraŭdańnie i padtrymku rasijskaj ahresii suprać Ukrainy.
U materyjałach spravy adznačajecca, što padazravany pieradavaŭ pa telefonie inšamu hramadzianinu Biełarusi infarmacyju, jakaja adsutničała ŭ adkrytych krynicach, ab padrychtoŭcy da abarony ŭkrainskaha pamiežža na vypadak novaha ŭvarvańnia ź biełaruskaj terytoryi.
Śledctvu taksama viadoma imia taho biełaruskaha hramadzianina, jakomu zatrymany pieradavaŭ infarmacyju pačynajučy z krasavika 2023 hoda. Zhodna z nacyjanalnym zakanadaŭstvam Ukrainy ab abaronie kanfidencyjnaj i piersanalnaj infarmacyi, proźviščy abodvuch fihurantaŭ spravy nie nazyvajucca.
Spravu rasśledujuć pavodle častki 2 artykuła 114-2 Kryminalnaha kodeksa Ukrainy. Za raspaŭsiud va ŭmovach vajennaha stanovišča infarmacyi ab pieramiaščeńni, ruchu abo raźmiaščeńni Uzbrojenych sił Ukrainy i inšych vajskovych farmiravańniaŭ, jakaja adsutničaje ŭ adkrytych resursach, praduhledžana pazbaŭleńnie voli na termin ad piaci da vaśmi hadoŭ.
